📖 ZKIZ Archives

三百萬樓盤選擇(答) Home Blogger

應該選擇那個價位的樓?
諗樣都係番之前用過既forumla，就係現時旺市只宜用總購買力既一半去買樓。就算樓市下滑都仲有資金係手加碼(或防守)。你同女友人工總數$47,000，按照金管比銀行指引，最多借月供$47000*50%~=$23,000既樓按比你，計番轉頭如果你用三十年按揭，2.15%年息借盡樓係6.09mil。而旺市load一半貨既建議，即係你應買3.00mil左右既樓。

聚唔到人而樓價升幅多跑輸
係三百萬budget之下，原本係兩年前可買大兩房，而家只可買細兩房或更細更舊既樓，但建議你都係上左車先，因為你估佢唔到幾時跌，再加上你家庭總收入未必低到政府會幫你既類別。相信你都睇緊樓，你提出既選項以你屋企附近為先，可惜西九樓價數埋都七千，如果要維持原區生活，希望方便探下父母，最為適合有美居中心，廿幾年樓可惜只提供三百幾呎單位為主，唔知你鐘唔鐘意，而索價竟要六千幾蚊呎先最離奇。講返深水涉區，由於樓宇集中舊樓，換樓客失去上流階梯而多搬出該區，所以聚唔到人而樓價升幅多跑輸。你亦都係其中一個改善了自己人工而未必留返係深水涉住既人，其他market player亦都一樣會咁諗。

三百萬樓下、不太殘舊而交通尚方便的，有幾個地區可以諗。首先係馬鞍山，有直接巴士去北角，搵日自己同女友去行下，已經唔係舊時你去烏溪沙YMCA宿營個樣。返大陸可以極快到大學站北上，出九龍好多巴士線可以選擇。新港城十八年樓仲有極多三百萬出頭既樓房考慮。第一間樓真係唔好買太貴，買四百萬樓都要交成七萬幾印花稅。如果你唔係根本係樓市賺過錢而樓換樓，用呢七萬蚊買個印真係好肉痛，直情係一條毛都買唔到。

 
如果決意死守九龍，咁就跟大隊去淘大，所以個度呢排越升越有。但當注意力集中在附近供應不斷增加，小心黎個反高潮。荃灣區供應多而交通方便，係另一個搵三百萬樓既選擇。你個budget如果買海濱花園仲勉強買到三房，第時唔駛煩換樓。爵悅庭附近「工廠三寶」仲有些少三百貨，細心搵下應該買到十年樓齡既上車盤。你提及愉景新城在間隔與呎價關係需要再思考，倒不如駁程車買附近舊些少荃景花園或麗城花園仲好過。相反荃灣地鐵站一帶已漸高水，廿幾三十年既兩房都要至少三百萬先有交易。

筲箕灣舊樓有三百萬選擇，但係以單幢主打，可以考慮。港島一頭一尾都會搵到合你budget既盤。你女方父母住係筲箕灣，如考慮生小朋友不如就落地該處，方面照應。該區新淨而又合你價錢既大型屋苑不多，如有網友知道可提供一下。

由於樓價較貴，如果借九成按揭分三十年還要先支付按揭保費十幾萬，可以問銀行加借但係都要比。建議買二百幾萬既樓分短D如十五年還可令按揭保費可大減。至於點解都要做九成上會，因為結婚裝修買電器少不免用錢，上述三項四十萬埋單「冇走雞」。你必定好燒一大筆錢，謹此祝賀你娶得美人歸!

點解每兩年買間樓? 樓市下的平均投資法 (答) Home Blogger

偉哥: 
是的! 大部份人買股票都係輸錢為主。要獨有慧眼加上高心理質素先可在股海淘金。根據諗樣之前「身無分文，必須賭博」既道理，如果你必須在短時間搵舊大錢，放在股票或期指市場博一博是必須的! 否則以偉哥既portfolio，就好似三國故事中荀攸進言曹操一樣，曹操勢大人多，只要堅守及囤糧，假以時日，只會比吳蜀日益強大，同佢地距離只會越遠。所以偉哥只要做好工作，將錢放係有意義既地方，要上岸不難，當然要做老闆或成大富，又要一番拚博。 

股票或基金每月平均投資法差唔多大家都聽過，但係樓宇平均買入呢? 相信冇咩人提及。其一當然係香港多買賣完整業權既物業，二黎樓根本冇得拆開黎買。施老闆成立中原領先指數本可衍生更多樓房買賣工具(如散買)，但樓宇買賣透明度不高令指數認受性被質疑。偉哥要平均咁買樓房，實在要手頭有番咁上下實力先掂。 

沙士升到而家既威力 
細心睇偉哥問題就知廿倍回報點黎。一間係沙士值1.1mil既樓而家升到3.0mil。如果你當時用十萬本金做九成上會，你而家賬面賺二百萬，真係好和味。所以投資最緊要睇時機，但係時機確實冇人肯定捕捉到，不如keep住投資係樓市，升同跌都有租收。 

大陸公幹人仕股票不宜 
其實樓絕不是唯一投資選擇，金、股、匯(外幣)皆可。但諗樣觀乎一眾至少星期一至五都係大陸工作既人，由於接收資料始終冇香港咁頻密，生活習慣令佢地trade港股都係輸錢收場。試下諗樣既方法幫唔幫到手。 

外國確實有公司成立投資項目(通常係爛地做起)，做到真係買一呎樓都得! 香港未有此工具。以下假設每年用二百萬買入屯門市廣場，買入呎數就係用當年年尾呎價去計(2012年除外)

如果用平均成本法買樓，十六年總投入36million，現值58million，增長83%。當然咁使係香港冇可能。但係證明左樓此一投資物，用平均成本法配合一樣奏效。當然你會諗三千六百萬我成世都冇，睇呢篇野做咩? 但用此一原則，套落偉哥個case又如何呢?? 

偉哥年收入RMB12*(8+5)=HKD1.87mil，減去家用，同假設偉哥出既糧可以完整咁帶到香港(好驚! 教人不法咁帶錢出境可能要打耙)，偉哥減去5萬每月支出一年可儲1.15mil。建議偉哥每兩年係屯門區買入樓宇，以2.30mil樓價以下為主，照做按揭上會，但係大陸出糧既佢要留意: 要提供大陸出既證明如糧單加稅單。做按揭未必間間銀行認受你的海外入息。提供聘書，大陸稅單都有幫助，不過入息要打八折。偉哥你既case係借得越多越好，因為你比少D首期，淨低人仔係大陸都有3-4%定期年息，而香港樓按只約2%。

點解係每兩年買間樓?

點解係每兩年買間樓? 因為要實行買樓既平均成平法，你要買得密先可以得出平均入貨價，及於比平均超高時出貨。至於買屯門係因為大家錢銀有限，屯門樓始終size細同埋有二百餘元既樓賣，買入收租印花稅貴極幾千蚊。試問買「天璽」點去平均成平法呢? 但屯門區內百餘至三百餘萬既樓大把，潛力極高，仲有偉哥你應該未結婚前住左唔少年屯門，應該合你口味。

買樓收租都有野煩，可以做既係搵個相熟agent大家長做長有，agent知你有米唔怕幫你應付埋租客既。如果真係唔想做咁長mortgage，你先用1.15mil比首期，做五成按揭買間2.3mil既屯門市廣場兩房開始學下做收租佬，名正言順租出去，淨低五成1.15mil分五年按揭(最短tenor)每月都係還約$20000蚊。你過兩年又買一間咁既銀碼又係咁做。再過多兩年你去睇第三間樓既時候，第一間已經還哂，如此循環不息，保有手上cash又唔使供得太辛苦，一定上到會。

每兩年買間樓夾五年按揭tenor，以偉哥月薪十幾萬計落就剛fit到。你冇偉哥咁強勁就唔好亂試….

單親媽媽更要買樓(答) Home Blogger

晉身小富，非結婚不可?

諗樣之前講過，如果庸才想借力打力，晉身小富，非結婚不可。但係我地唔可以將單親家庭遺棄，究竟有咩解救呢? 記唔記得諗樣提過樓奴故事? 當中單親媽媽一手帶大四個子女都可以，堅持絕對在持家或理財均適用。

主角小玲不能夠原封不動，因為單親人仕最大慘情係老年未必有所依，亦唔可以期望小朋友養你。可以佢係被逼要理財，盡早為人生下半場準備。

咁究竟退休需要幾錢呢? 駛唔駛搵個理財顧問同你計呢? 最簡單咁諗係你50歲退休(或冇得撈)，磨到八十五歲先死，如果你用五千蚊個月，條數會咁計: $5000*12*(85-50) = 2.10million。咁睇落好樂觀，有讀者係呢幾年升市係間樓都執左「百幾二百個」，但係醒目既你當然知道2.10mil係唔夠架啦!

通賬、唔知幾時死、唔知幾時病係令你不能信賴退休計劃既原因。點解你後生個陣唔會諗死同病既問題呢? 一黎發生機率少、二黎係你仲有睇落無窮無盡既payroll income(人工)。上面因素一留比個天決定，因素二係我地可以做野補充既地方，令你退休出糧有著落。回應上段問題，如果想退休後每月有今時五千蚊購買力既錢洗，50歲既兄台要有5.60mil先夠，仲要唔好病準時死(85歲，已假設手上資金肯定有2%p.a.回報)

又係年金計劃??

坊間有唔少年金計劃提供，供款十年八載後提供十至廿年既月入。計劃好處係監管你為退休儲錢，可惜係回報同埋提供收入方法未必如意。例如由六十歲開始提供入息，冇人能肯定該參與者八十歲就離世，特別係現金醫學昌明既年代「吊命過世」一點不難。有計劃提供月入至九十九歲，但月入太少，歸於計劃回報不吸引。筆者認為用聯名戶口買入國債，望3%年息回報，老公過身可由老婆攞錢最為簡潔恰當，債券到期自有本金歸還留比仔女，簡單易明。可惜香港債市不活躍，買國債要手握百萬港元cash至有得傾。如果想分散風險買幾條唔同地方既bond，你要有三至四百萬金額準備投資。債券派息多不會同通賬掛勾，要準備開頭幾年收十幾萬年息同先夠多去「貶到水尾」。

但係五十幾歲還哂兒女債仲要有四五百萬淨? 有幾多人得大家心知肚明。種種原因加埋產生現象，就係你見到街邊執紙皮既阿婆好多都係「有樓係手」既! 仲有就係「建設派」既廣東海鮮團成日爆滿! 點解? 你試想你都唔知自己幾時死，老左又冇人請，梗係唔敢洗咁多仲要開拓income啦。執幾張紙皮頂多一日得一日! 普遍退休人仕都有此想法，而除左早前提及買債外，買樓點可以幫到退休呢?

最好就係生小朋友之前手握兩間樓，因小朋友確實打亂你儲錢部署及洗費大增。一路湊大個小朋友之餘叫租客一路供滿你間屋。第時間屋收番黎既租係會同通賬上升，咁就可以自製通賬掛勾投資囉! 係資本社會要累積資本之餘，早去令資本出現係另一要訣，請結婚唔好咁大洗，三十歲適當去運用十萬蚊，到五十歲可享十倍回報。至於本篇主角小玲獨力承家，確實要比人更出力。諗樣建議先換出天水圍居屋再另覓居所。下篇「二百萬以下樓盤選擇」再談辦法。

高登仔打拚全方略 – 再談庸才晉富之法(答) Home Blogger

答:
首先多謝goldman收看諗樣網， 本文以高登仔作開題請勿見怪，絕無貶意。遲左回信希請見諒，請勿再用「再生父母」形容本樣啦，真係受唔起。睇來信已知Goldman係mr.aggressive一族，本文將不顧風險，為goldman出謀博殺。 

http://www.snb.hk/blog/front/blogdetail.aspx?postid=61256&blogid=27293
前文「成為千萬富翁的八個步驟 – 庸才免費有屋住篇」 已介紹將自住樓換細些少同舊些少試圖一開二既方法，此舉可令投資更靈活，隨時賣一間，另外係居住上既開支明顯減少，實在庸才適用。如家庭收入穩定地過十萬，又想做到五十歲，而預見人工升多跌少者實在可將樓越換越大，唔使用呢個無啦啦搬細屋既方法。 

一開二換取兩個兩房單位 
Goldman兩個車位都幫唔到佢贏錢，而家可睇成自住樓一注獨贏，手上冇cash係身。建議趁市高賣樓賣車位換貨，套現後實行「退休買落五層樓」既方略: 一拆二之法。 

其實goldman未必定要買兩個兩房，只要不嫌棄舊些少，用番原本budget買兩個三房都有辦法。而新界西一向三房單位少，政府限呎地都主打兩房，睇數據睇形勢都係三房更有投資價值。如果goldman搬入元朗同應該買到搵到大把新而又套三房既選擇，但goldman始終返工人仕，恐怕出入屯門元朗有所不便。 

建議由東涌搬去荃灣，一來荃灣更近市區，攪咁大輪野換樓起碼獲得交通之便。二來荃灣爵悅庭只要三百餘萬就可以買到六百呎兩房，唔怕舊可以去附近既麗城花園、海濱花園、灣景花園仲可以買到三房，單位實用之餘由旺角「打的」返屋企都係七十蚊，同住東涌感覺完全唔同。 

建議先沽後買，九月將係賣家市，好趁大量新盤未湧出同梁班子未出新招前鎖定利潤。如成功用6.0mil沽出，套到2.10mil cash，佢地計埋壓力測試「借到爆」可以借到5.0mil，即係add-up用到盡有7.10mil budget買樓。兩個三百餘萬單位係荃灣剛剛好。車位可以沽出，東涌車位未見有升值潛力，唔好令自己太複雜。由一單位搭兩車位轉做兩個單位一自住一收租，配搭更為妥當。 

攪掂自己自住一間可以搵收租一間。唔想去到咁盡可以睇大興花園，想方便收租就比貴些少買番荃灣，完成後風險在於樓市跌三成就變成負資產，只要準時還款好少call-loan。 

通漲可以減輕借貸的壓力 
早前提及時間可貶掉債務，但需時十年或更長(除非有黑天鵝)。Goldman借為期五年既信用卡貸款不能運用此特點，所以在車位投資上不見得心應手。其實私貸收取年息一向5%以上，除非諗到有極佳而又短線既項目(即係有計搵快錢)，否則借私貸用於投資多不利。唯獨年尾稅貸(其中一種私貸)可低至2%息先可考慮，但還款期一般兩年比私貸短。 

買入價值40萬車位收租 
好車位要搵「有地鐵住有錢人、冇地鐵住大把人」先有爆升潛力。且借貸槓桿一向只五成，違背後生應多利用時間去貶掉大量債務既原則，所以不常作推薦。唯老手可搵一D開錯價既車位(如basement 1/F用basement 3/F價錢賣，轉角位大平賣)投資，於四十有多既人仕想減低槓杆，逐漸以收租多於賺價者為適合。原因係車位易打理、條數較易計。 

手快有手慢冇 
諗樣都建議goldman快手開始一開二既做法，遲下「梁老師」又出D九唔搭八既政策如SSD增長到四年可令樓價先跌後爆升，打亂部署。倒不如先趁呢次大浪做好一開二，專心儲錢等下個浪再買第三間。仲有agent加裝修師傅叫佢地一次過做兩單望會打折慳些少。如此就算goldman在事業冇大進展，十幾年後都可以手握兩間樓收租，乖乖地用儲起既錢供斷佢然後享受生活。Goldman係一個典型想脫困既讀者，係香港做極人工都唔覺「爆」! 淨靠人工就不見天日而好需要辨法去「埋岸」。諗樣希望有更多機會同大家傾下點去解決呢個問題，祝大家投資得心應手。

解答買唔買多間樓好?(答) Home Blogger

答:

是的,確實是做錯了。應該先將元朗問樓加按1.30mil出黎用作映灣園既首期,可以保有自己手上多40幾萬cash之餘又唔駛比十幾萬按保保費。兩人月入超七萬應該供得到。而照你月供$14500既金額映灣園成交價應在4.0-4.5mil左右。

  
收入許可有時買平價樓收租如2.0-3.0mil仲著數,因印花稅同裝修(化妝)費慳埋都有五六萬,等於半年租。但係收入少相反槓盡買大買貴仲好,因為人工有限博得就博,你冇咩收入銀行見你買到第四間都唔想借比你。當然,平樓收租最怕遇上煩租客, 在此推介馬鞍山、沙田區你會搵到賣三百萬樓下,收到成一萬蚊租既樓而租客是有人性的。屯門或居屋租客質素實在要時間改善，初下海者不宜冒進。 

至於煩惱人實在不能再煩落去，佢自己都知已失戰機，錯過了四十出頭定大局既機會。看收入煩惱人係有能力食住沙士後「條水」幫自己四十歲搞掂物業ABC既，諗樣估計可能因為九七年出身(投身社會)原故，看見太多負資產故事而每事遲疑，將買樓投資計劃拖到2012年才進行(買入映灣園)。另一方面要提醒煩惱人勿心急，佢十幾年只買了一間樓(元朗)自住，而家(2012年)一買完第一間又諗添食，係投資市場冒進係大忌。現雖不能見到煩惱人但憑紙觀察有「不能過驕過燥」之建議，如本樣理解錯了煩惱人懇請不要介意。 

機械式既投資方法
此類(燥底)讀者建議同太太定立一個機械式既投資方法。先將自己係銀行可以借到盡既數計出，於地產行業不斷擴充時持一半貨(即總借貸額及借盡額既一半)，及後如施老闆講進入冰河時期就入夠80%至100%滿。係45歲前適用，永遠都用分三十年還，現行息率加上本身家庭收入去計借盡個數。 

投資組合係不斷要去rebalance個portfolio既，呢個方法都一樣。係加息、人工調整、家庭情況更改既情況下我地要再input過此forumla函數 ，重新計過借盡額一次。

點計?煩惱人用此forumla

我地呢個諗法係同你平時買樓倒轉。平時你會攞樓價黎計月供幾錢，而家要計既反而係咁既人工可以買到幾錢樓，所以係2.2%按揭年息下，分30年還, 一萬蚊月供計到可借2.65mil。而煩惱人家庭入息(44000+30000)=$74000下，再根據金管指引負擔比率少於50%，供盡係74000*50%=37000，但煩惱人有$6200銀行私貸，減除後等於借盡係(74000-6200)*50%*2.65m=$8.98mil。

煩惱人現時負債約3.84mil(映灣園)+0.7mil(元朗)=4.54mil，剛好是8.98mil的一半，附合旺市持貨一半既原則。煩惱人應多享受家庭生活，待兩年過後再考慮買樓是也。

你開始計劃儲錢結婚買樓了嗎?(答) Home Blogger

共同理財既一步

如果一對有志向既戀人，希望早著先機，係結婚之前就踏出共同理財既一步，應該有咩地方要注意呢?

未儲到錢既戀人，又決定開始共同理財的話，可到銀行開個理財戶口。兩年內諗住結婚的話，你只宜存錢咩都唔好做。若未諗住短期結婚既可以月供股票，雖月供傭金計埋要1%(比平時0.125%-0.25%貴)，但在此淡市(成交不足500億)買貨擺兩年衰極有個譜，不願冒風險或其中一方未有買賣股票經驗者不宜入貨。冇咩諗到可以供盈富基金或內銀H股。

下一個問題係每人要夾幾多落個戶口呢? 如果冇儲錢習慣請由人工三成逐漸加上去，三成都儲唔到睇黎你要每人月入5-6萬先可以唔使儲咁多。在此諗樣建議年青人，就算搵到幾錢都應該養成儲錢習慣，一時因人工大增而自我膨脹猛fing錢好多人都試過，通常以負上更多卡數告終。本身仲有卡數係身既要問自己係咪中左marketing人既計，買埋成堆無謂野。

討論家用問題

成家要男女都要有所犧牲，連錢都唔肯開始commit去儲實在困難。當然有人屋企傳統係儲係自己戶口度，冇問題! 係另一家銀行開個單名戶口分開儲比埋internet banking 密碼大家知就可以。再而進之後討論家用問題，係單親家庭或女權當道成長既男子真係冇比家用既概念，佢未必係扮哂野唔比錢，而實需時間去解決。睇到呢度你可能覺得使唔使咁煩? 諗樣認為財務問題係結婚前要一步步解決，總好過米已成炊後才恍然大悟去面對。

朗尼同女友夾埋都儲左七十幾萬，算叫唔錯。牛池灣既麗晶花園、新麗花園可搵到符合budget既選擇。但留意資金睇落較緊絀，買完2.4mil價值既樓比完洗費如印花稅、傭金、些少裝修費後所餘無幾。想收租而budget又向下行一格係本樣介紹過既翠屏花園，或荃德花園可以係個好選擇。

令浮薪被承認

至於上會方面，女友要比過去六個月糧單最好有埋稅單先可令浮薪被承認，若資料不足只會用底薪計算。朗尼自己當然叫到partner出autopay比自己就最好，如果唔係工資證明書，每月乖乖地將出糧支票入哂去同一戶口都有幫助。睇你地兩個人工加埋，如出面無重大負債都可以上到會。假設佢地買2.3mil既樓借七成，分25年還就當加埋壓力測試都係月供八千幾蚊，應該無問題。所以入好D票同埋女友六個月proof最重要，開個file有系統地儲起佢吧! 用statement，唔好再用銀行薄仔啦，會唔記得打薄!

「 聯權共有」 及「 分權共有」

當然未結婚咩野都唔可以諗得咁idle。買樓時唔好用長命契，用分權共有去共同擁有呢間樓，有咩事都可以賣走自己一半權益「走人」。

M型社會你攪清楚未?(答) Home Blogger

答一:

租樓定買樓實是香港人top5要discuss既hot-topic，今次再撰文討論。先講租樓實是市場必現產品，唔好以為租親樓既人一定冇樓係手，其實大把人因工作實要將新界間樓租比人，自己又走去九龍租樓住既。而家市場多左批新力軍就係越黎越多既大學生，遲下深圳放寬來港簽證，北區會有更多住宅比人租左黎當倉用。比現象解釋點解今年租金升得特別勁。

諗樣之前既庸才文章頗受歡迎，在此謝過各位讀者。今日再用庸才文章既concept為阿俊解難。

香港正進入後發展時代，社會貧富懸殊嚴重。為令自己日後擁有安身立命之所，需要及早認為自己係邊類人，做好準備。以下有五大類，cover到社會上九成既人。

窮人

做窮人唔緊要，最緊要承認自己係懶同埋keep住攞政府福利就得!由細到大學校加上阿爸阿媽教你要進入第二個族群即「打工仔」既行列。亦即上任特首成日講既「向上流」。

打工仔

呢個行列係最xx既! 搵既錢又唔係多，稅又打得重。政府同學校都不斷灌輸打工仔既生活模式，而資質平庸既大部份人都難免進入呢個行列。政府同阿媽都教你為左尊嚴，寧願打工都唔好做窮人等人養，可惜而家香港人為左保住份工，有人尊嚴已盡失、有人要偷呃渡日，咁不如簡單些少做窮人好過。

打工皇帝

諗樣原本想歸類為搵到錢既打工仔，不過係物價越來越貴之下，一個月入七萬，家庭總收入十萬既「搵到錢」打工仔其實同大部份既人(包括諗樣)冇咩分別。該月入十萬既家庭交稅約二十萬一年，買間4.50mil既兩房昇悅居都要月供18,000一個月，一年洗費220,000，假設每人要用$4000/月 供養父母，高收入既人交稅好易計，因扣稅項目金額變得太渺少，就咁用17% standard rate計都可以! 究竟每年可以儲起幾多呢?

你睇下@!!一日得三百蚊用，住假毫宅昇悅居(有怪莫怪…)，揸架二手日本車聽落都唔係型既profile，但係相信大部份係香港既讀者家庭月入都冇十萬! 而上述個案每月淨低既錢只有$(1.2mil – $0.854mil)=$0.346mil。又假設佢地三十歲做到五十歲將呢舊錢儲起，而人工又可以隨通賬上升，佢地到五十歲就約有$0.346mil * 20= 等於今日6.92mil既購買力! 如果好辛苦咁「慳慳地」養一個小朋友，用四百萬既一半，得番4.92mil，夠買多間樓收租。就係得咁多! 多謝哂!

以上假設，係該夫婦冇係股場損過手先有約五百萬加MPF揸手早少少退休(可能係被迫)。高人工既打工仔通常都做唔到六十歲。買股票賺錢定蝕錢多，閣下自決。所以結論為叫得打工皇帝，你要家庭月入去到二十萬先會有大把錢洗同埋「買番間house」住既感覺。搵得呢個收入你通常兩公婆都係專科醫生，或大brand入面既regional manager。

老闆

大部份既人創業都係失敗，做得老闆又搵到錢應該係個專才: 即識搵客又睇得住下面班伙計。老闆其實可歸類為資本家，因公司錢銀既流向，點樣運用有限既錢(或人)做多幾轉生意係成功要素。諗樣唔係個合適既老闆，不過見成功既公司董事都係懂得運用手上資源之仕。

有錢佬

有父蔭，或無需再為錢而工作既為有錢佬。打工皇帝及老闆無不以此為重大目標。打工皇帝要去到有錢層次，好似穿梭機擺脫地球既地心吸力咁，要用好多能量(即係要去到好高人工)先做到。老闆係順景時確實有錢湧入黎既感覺，加上生意多是自己同少數partner一齊創立，有錢之餘亦有成功感，行步路都挺直D!

做咩解決阿俊既問題要講到咁遠呢? 因為買樓係人生planning既一部份。以阿俊呢個歲數同呢個人工，睇黎呢世去到廿萬月入近乎冇可能(除非到時老麥平均賣三百蚊個餐)。諗樣無得罪之意，為左認真咁答讀者先講真說話。至於你問點解冇咩可能到廿萬? 就好似睇奧運百米飛人保特咁，真係「跑得出」既去到廿幾三十歲已經知道。阿俊可以比多幾年時間自己，等踏足社會工作十餘年已大概有結果。真係大器晚成既人無幾多個。

攪清楚未?

攪清楚自己未係打工皇帝亦都退唔到落窮人呢一步，阿俊可以早一點開始運用資本去幫自己加快累積財富。跟住自己咁諗用九成買樓再偷雞放租，最好用單名(即阿俊自己)，博兩年後樓價升一至兩成阿俊已經可以將第一間樓轉七成按揭，銀行好少番check呢類case自住定租。幾年後結婚買另一間樓比老婆揸手，用老婆名又做九成上會而阿俊自己做擔保，到時三十出樓有兩間二百餘萬既樓，希望用年複年既通賬貶去爭銀行既借貸。三十餘歲極多錢洗，只望淨番些少又等手上兩間樓升值，等時機加按錢出黎買埋第三間，如此附合一間自住兩間收租既策略，四十歲就算比人裁左出黎都仲有收入來源。

觀乎你十年前做落按揭，今時今日收番跟通賬升既租金已夠你供樓加清淡茶飯。建議阿俊快手開始倍大資產，再打工落去都唔會令自己有所躍進，倒不如冒些少風險用槓桿爭取被動收入。相反如你係打工皇帝或有錢佬，絕對可以按兵不動等跌市先入市，因跌市要有錢人先可以出街掃貨。

今次結語係身無分文，必須賭博。大跌市時無風險施施然入市要實力雄厚既人先做到，打工仔唔駛諗自己會靠此賺大錢。頂多比你四十蚊用幾十萬入匯豐，八十蚊放賺幾十個而矣。平庸既人要係香港晉身小富，實在需要借力打力。攬清楚自己position，做不停比稅既「中產」最無謂。

答二: 陳小姐: 首先瓏門開賣，二手一般冇成交。屯門好耐無大型新盤出，餓左咁耐既經紀會力谷新盤，冇agent會為二手樓個一萬幾千實袋既傭而理你。要睇該區二手可等到十月。

小女子自強不息儲錢有法 vs 男人冇憑據而又十分強烈的自信(答) Home Blogger

回覆小女子:

首先睇小女子個case，證明左誠哥講既野係正確既，有能力又負擔得到不妨買間自住，炒樓則可免則免。小女子可以諗第二間樓全靠佢幾年前做左上會既正確決定。

小女子人工大家都同意唔係高啦，但係都可以計到數買到第二間，做法確實比較複雜。關鍵係佢要放棄二年前做落既低息hibor plan。諗樣相信小女子三年前買第一城細單位應該係1.5mil左右成交，按息只約1%及分25年還符合佢月供五千之說法。

姑勿論佢做hibor定p plan，間樓而家爭銀行約1.2mil，而市價應估到2.5mil樓上。只要小女子肯轉按去另一個plan做五成，佢可以名正言順將而家間樓趁租貴租出去，每月多了九千至一萬蚊租金收入。

樓租左出去，你要搬返去同屋企人住半年，更好既係搵一D可租可賣既盤，先同業主租番半年，用租金抵銷租樓支出。半年後搵銀行先做pre-approval，到時儲齊半年既租金銀行入數結單可作你買第二間樓既收入證明。一般銀行信租金收入七成，咁你收入就可以upgrade到$23000啦。而再買間樓月供七千樓下應該no problem! 你到時可以同你租住緊既業主傾有冇興趣賣埋比你，咁又慳番筆傭，減低呢個movement需要用既洗費。

如果唔想搞咁多野，你就要用你呢一百萬cash去搵間連約樓，可惜冇租金收入證明銀行多數唔好加大你個人總入息。買樓放租亦要注意傢俱全包、租客質素、化妝裝修種種問題，趁後生多學習吧!

小女子月入只$15000，如佢將手上第一城出售應可再good一百萬cash出黎，手上可達兩百萬cash。 有此同人工極不對稱既流動資金，全靠由細樓先上會做起。以大數目統計，女性投資表現確實比男性好，相信原因有三個:

1. 1.      謹慎及慬得分散

有時男人會話女人成日買埋D「雞仔注」，投資應該有大食大。可惜男人一係就投資係架車或模型上面，再唔係就一鋪過買大輸大….

1. 2.      有耐性

男人較女人冇耐性應該唔使check都可判定真確。最大鑊就係男人一鼓冇憑據而又十分強烈的自信，見到個股票number就成副身家訓落去。買一次贏唔出奇，就係唔信你贏足幾十年，even股神都唔得! 買樓投資就係一樣要等既野，所以局長將劏房交比老婆打理十分正確!

1. 3.      較認真

有研究指女人一般都守成十年寡，點解? 因為女性一向嫁大自己四到五年既老公，而女人平均去世年齡又大男人5-6年(好似香港係女88男83)，當你知道呢樣野仲唔認真「儲定彈藥」咩!

男人唔好睇完話諗樣啊, 希望你唔係呢種人，本樣最尾都係想你好!

樓市投資必勝法(答) Home Blogger

睇手上鋪牌 先睇賭幾大

讀者睇到個標題，可能覺得諗樣講緊廢話。其實人就係咁，鋤大D睇牌差唔多人人都識，而家由賭台去到買樓投資又夾硬要將賭錢同買樓投資分開。以諗樣而言其實要係錢方面做正確決定不出博奕理論範疇。今日個案理先生都算有米，本樣想先計下佢最盡借到幾錢，先至部署物業投資。由咁去開始諗點買同買咩樓，希望比讀者新思維上既體驗。

為左做個buffer，假設理先生真係一蚊收入都冇，銀行睇佢既入息證明等於零。係真實情況下當然一萬幾千收入，就算係生意人都有辦法整到出黎。

理先生太太收入兩萬，即係每月按揭還盡係一萬蚊，係咁情況下太太就算單拖借2.70mil分三十年還係冇問題。(當然上會間樓樓齡要少於二十，理太太唔係發達太太周身街數個隻啦!)

理先生既麗城花園剛入選全港租金回報高既屋苑第五位，恭喜哂! 一間4.0mil樓套現2.0mil出黎冇問題，但係要搵個人啃左月供$7600條數。

手頭上3.0mil資產，心雄起黎梗係可以套哂佢買樓，如此一算理先生比三百萬現金出黎，再借(2.70+2.0)=4.70mil係好有可能。咁講佢槓到盡買4.70+3.0=7.7mil既樓房係上到會做業主的!(當然加按兩百萬個度要搵擔保人，如理先生真係一蚊收入都證明唔到)

計左7.7mil做max之後，我地target7.7一半既樓，即約3.3mil樓宇，點解呢?

仲要係先搵太太加按麗城間樓用一百萬做首期去買呢間樓，唔好用自己現成既資產(等自己唔好犯本)。

借用必勝投資法(假設樓市升50%)

睇完鋪牌而用借盡既一半買樓，為既係令自己跌市時保持購買力。理先生買入3.3mil同區爵悅庭，假設樓市升50%，理先生可沽出樓房獲利1.65mil，到時佢有4.65mil流動資產，手上麗城花園市價6.0mil，夾埋有成千萬係手。

樓市下調50%

萬一樓市下調50%，理先生爵悅庭價1.65mil(些微負資產)，麗城只值2.0mil(沒負資產)，手上流動資產3.0mil。到時咩樓都平哂冇人同你爭，理先生可「施施然」用1.65mil全數比哂買多間樂悠居，個陣有三間樓係手，(3-1.65)=1.35mil現金，供樓冇比之前多左。

如幾年過後原本跌左五成既樓市又升番一倍，即返回現時水平，理先生麗城同爵悅庭平手，沽出樂悠居賺一倍即1.65mil!所以無論樓市先升後跌或先跌後升，只要理先生留番一手，有錢係跌市入貨根本必勝!

當然你會同諗樣講如果跌完五成再五成，理先生可以輸到成世無得番身，咁諗樣都知大亞灣核爆香港連條草都生唔到既機會都有，可行與否足下自判。投資永遠先問自己可承受幾多風險，同埋自己願意承受幾多風險。上半部已有本篇交代，下半部留番比理先生。而點解知道必勝法而仲未發達既人，係嚴守紀律方面有問題。

仲有就係，如果唔升唔跌開圍骰，理先生都贏。

手頭資金較充裕者既置業要點(答) Home Blogger

答:

現時港人退休準備大多不足，原因一係貧窮層有增無減致冇錢既人大把，政府現時只係將問題拖延，唔想同大家講其實到你退休時「連x都冇得你食」! 較有能力既人，希望在本篇文章能帶給你更多想法。先引用卓百德先生發表的報告: 「Long Term, Your Government Will Leave You In The Lurch」（可譯作﹕長線而言，政府會在你潦倒時離你而去）。

卓百德為前大摩亞洲區董事總經理，可算是現任行政會議成員林奮強既先輩。林奮強對香港樓市發展有宏圖大計，以改造大嶼山最為人知。而卓指長線而言，不單樓價升幅一般可追及通脹，而租金亦然，而將樓價升幅（卓百德稱為名義回報）加上租金收入（實質回報），其總回報極為驚人（如圖1顯示的香港住宅投資回報），而就算是日本，雖然20多年來樓價疲不能興，但如計入租金收入，則總回報也能「力保不失」（圖2）。

健叔個案較為獨特，唔同在佢既長俸可用作計供樓上會時的入息。一般人在退休時領取既年金、子女家用、唔同類型既津貼均不可計作入息而長俸卻是可以。就因為咁，62歲既健叔竟仲有唔錯既借貸能力。建議健叔係呢半年物色稍低水物業，趁退休前為自己開拓更多收入來源。

沙田市中心既樓宇固然好租，但樓齡太舊未必符合你買入收長租既策略。相反馬鞍山由新城港至帝堡城地帶樓齡平均十至廿年，唔新唔舊又可比4%以上收租回報。如手頭資金更充足可考慮雅典居，此屋苑大部份為上哂岸既用家，樓價硬淨，不過該屋苑起錶都要港紙「五球」。以上三個屋苑既租客質素頗高，比起而家興買居屋收租，呢幾個屋苑既客確更有實力!

買新樓

你而家睇樓又有四百萬左右既budget，肯定捉你左去睇屯門同將軍澳既新盤。買新樓好處係慳返經紀傭同可能有印花稅津貼，不過租金回報可能低至2%! 你睇下大圍名城萬幾蚊租成千呎樓，度度有放盤，你就知買新樓收租要捱過頭四至五年「甩唔到」既情況，成先苦後甜之像。

手頭資金較充裕者既上會方法

搵到心水樓，預番幾萬銀執靚佢出租。健叔可以用資產證明上會，即係show 銀行月結單比銀行睇叫佢借錢比你。一般係四百萬資產可借一半比你，最盡都係分廿年還，同埋要趁年中銀行未收水時去借，年尾一般唔想做呢類生意。畢竟資產可隨處走，你有證明都係排係後生仔之後。假設健叔睇中間3.80mil，借一半即1.90mil，分18年還每月要供$10800。出示左證明，選plan係另一要點。建議健叔唔選最大路既P plan，反而做靈活按揭，即係借左1.90mil，銀行開番個同樣最多存1.90mil既活期戶口比佢，年利率等同按揭收你既息口。這樣一來，健叔可藉此對沖利率上調既風險。此為手頭資金較充裕者既上會方法。

印花稅稅階冇變過

再盡D健叔可走入大埔買兩個太湖或翠屏細單位，二百萬有售。如有心機可等相連戶，可惜相連同售可遇不可求。分兩個單位買可慳返八萬蚊印花稅。冇錯，而家大部份樓都升左，四百萬既樓根本唔算係咩，可惜印花稅稅階冇變，正常兩公婆想買入間兩房安樂窩已經要成四百萬，同時進貢比政府竟高至八萬幾。還掂都係做五成上會，年紀大始終係買樓方面唔可以用大槓桿，不如分兩間細買入慳返印花稅都是一策略。

健叔其實仲有好多招可出，過幾年阿仔結婚搬出後又可售出新城市廣場轉細些少單位套舊錢，長俸更可作入息證明，如健叔早十幾廿年前利用公務員最易借錢既要點去運用槓桿，退休有四至五間樓供斷係好正常。諗樣謹此祝你生活愉快，畢竟錢銀係幾時都可放在旁邊的事。