萬南 二五中環 3,000畢業生爭做合和MT
1 :
GS(14)@2016-08-14 16:42:13http://www.metrohk.com.hk/index.php?cmd=detail&id=316461&search=1
每年好多大公司都會請MT(見習生)，當然畀得起錢嘅大品牌，自然寧舍多後生仔女爭入去，但萬南發現老牌地產公司合和實業(054)，舊年竟然有接近3千人報名考佢哋嘅兩年MT Programe！根據某國際HR顧問公司做嘅指數，量度MT心目中嘅好公司，5分最高合和有4.1分，喺眾多香港土炮公司之中得分最高。
合和究竟有乜咁把炮呢？原來佢哋呢幾年積極吸納新血，搵咗個年輕有為嘅Garrick負責呢壇嘢，佢好知年輕人心態，經常走入大學甚至中學演講，最重要唔Hard sell合和，貼地咁將個Talk騷搞得好有趣，又會請後生仔女鍾意嘅名人嚟幫手分享，近期就有坤哥吳業坤、大埔Lulu、同埋加入咗興業證券嘅前新聞主播周嘉儀同年輕人傾偈，確實令合和洗脫一陣老土氣味，令後生仔女想投身呢間公司。
合和搞咁多大龍鳳，或者你會以為實要花好多錢啦，但據萬南收到風，唔計合和要請員工組成呢Team人，佢哋搵嘉賓原來都係碌人情牌，全部唔收錢捱義氣嚟，所以搞咗咁耐，額外開支只係兩皮嘢，效果相當好。聽聞合和太子胡文新好Buy呢個計劃，期望呢批MT日後帶出新思維，令合和更年輕化。
萬南 二五中環 759執笠「子烏虛有」
1 :
GS(14)@2016-09-04 21:48:53http://www.metrohk.com.hk/index.php?cmd=detail&id=318145&search=1
Tree根的威力真係無遠弗屆，由佢開創嘅「子烏虛有」認真深入民心，就連零食店759阿信屋嘅母公司CEC(759)都受感染。早幾日網上謠傳阿信屋就快拉閘執笠，搞到公司要喺港交所(388)披露易刊登自願通告，強調肥主席林偉駿冇講過公司執笠，相關言論係「子烏虛有」，結果當然被人笑到面黃，仲話熟讀毛語錄嘅林老闆冇理由中文咁差。
結果CEC翌日再發另一張新通告認錯，承認擺咗烏龍，糾正係想講「子虛烏有」，仲要加多句深表抱歉結尾。呢單嘢只屬小事一宗，並唔係關公災難，老實講隔幾日好多人都未必記得，難得CEC肯火速認錯，抵讚。
或者你以為有錯要認好正常啫，咁都讚似乎有啲誇張喎？大家有所不知，其實好多上市公司通告都有唔少錯漏，有啲離譜到銀碼單位都寫錯，有陣時遇上係萬男認識的公司，都會多事開聲話畀公司高層聽，點知佢哋回覆根據港交所規定，如果要改正錯處，必須另發新通告，到時會令更多原本唔知出錯嘅人，反而留意得到，於是選擇唔理便算囉。
萬南 二五中環 青島控股按樓食大茶飯
1 :
GS(14)@2016-09-04 21:49:22http://www.metrohk.com.hk/index.php?cmd=detail&id=318145&search=1
啱啱政府公布私人樓宇售價連續攀升4個月，證明揸磗頭真係大有錢途，可惜好多上市公司揸咗一籃子物業只識收租，未有好好發揮磚頭嘅功效。但最近萬南發現青島控股(499)有料到，公布將太古城在內嘅一批總值8億幾嘅物業按畀銀行，套現咗一大筆錢，以備新嘅發展機會食大茶飯。
可能有人話上市公司要錢，大可伸手供股集資啫，但咁做會降低每股盈利，小股東未必Like，更何況而家按揭息口咁低，今個星期銀行更互相劈價，平到推出H加1.4釐按揭計劃，絕對係唔借呻笨格局，難怪有高人話青島控股財技頂呱呱，識得利用市場平錢幫公司錢搵錢。再睇公司大股東係青島市政府直屬投資公司，底子夠雄厚，市值卻只得區區5億，至於股價呢排已經築底企穩，中短期走勢不俗。
2 :
Clark0713(1453)@2016-09-04 22:46:28499 ?
萬南 二五中環 卓悅逆市擴張 翻兜旺角巨舖
1 :
GS(14)@2016-10-09 23:35:36http://www.metrohk.com.hk/index.php?cmd=detail&id=320727&search=1
早幾日遇到資深舖位投資者黎永滔，問佢點睇租務市場，佢估計最差時候應該已經過咗，開始有啲實力公司趁租金回落，重新物色靚舖擴充。就以佢旗下旺角MPM文華商場(圖)為例，對正朗豪坊入口，又喺港鐵站隔籬，人流旺爆，5年前由美國大型服裝連鎖店GAP以320萬天價承租地舖至2樓，點知經濟轉差，連GAP都頂唔順，決定提早走人，之後丟空咗9個月租唔出。直到最近，佢將地舖連一樓啱啱租咗畀卓悅(653)，地方總共8千呎，月租160萬。
原來呢個舖同卓悅好有淵源，租畀GAP之前，上一手租客就係卓悅。萬南問過卓悅老闆葉俊亨，佢大讚呢個舖位置唔錯，趁而家租金回落，等咗幾個月，慢慢等到租金由260萬，逐步回落至160萬，認為價錢合理，先至翻兜租呢個優質舖。
葉老闆原來同業主黎永滔好熟，以前租過好多黎生嘅舖，黎生亦好明白零售業難做，所以肯以較相宜價錢租畀卓悅。對於可幫股東慳到每月一球，葉生話總算有所交代，佢仲話人縮佢谷，遇到優質筍舖會繼續擴充，藉此可以令卓悅長遠發展更加健康。
萬南 二五中環 MDRT一哥 友邦「還拖」
1 :
GS(14)@2016-10-09 23:36:05http://www.metrohk.com.hk/index.php?cmd=detail&id=320727&search=1
上星期萬南寫兩大保險公司爭認係MDRT第一，引發業內大討論，大家睇完保誠(2378)廣告，包括萬南在內，都以為佢哋今年贏咗友邦(1299)，得到香港冠軍。點知友邦立即「還拖」，向各界澄清自己先係冧把溫，仲要搵埋美國MDRT總會投訴，並獲總會確認自己喺一哥(圖)。
萬南據聞呢單嘢仲有手尾跟，友邦似有其他動作做，例如要求保誠澄清等等，不過統統未落實。至於事件另一主角保誠，究竟點解會搶認第一呢？暫時未見有回覆，就連自己經紀都唔知點樣答客人，大家不妨買定花生吧。
萬南 二五中環 初遇香港警察 小加「很溫暖」
1 :
GS(14)@2016-10-09 23:36:30http://www.metrohk.com.hk/index.php?cmd=detail&id=320727&search=1
港交所(388)行政總裁李小加再度成為新聞人物，不過今次就唔係好消息，事關佢位於赤柱龜背灣2號嘅三層高獨立屋(圖)，喺星期二晚畀賊人入屋爆竊，就連主人房嘅夾萬都慘被撬開，偷到所淨無幾，案件交由西區警區重案組調查，相信涉及兩名賊人。
不過小加講到呢件事嘅時候，就竟然話除咗難過之外，亦都感到溫暖！萬南聽到一頭霧水，畀人打劫都覺得溫暖？原來小加話，今次畀人爆格，令佢首次接觸香港警察，覺得對方專業敬業，因此印象深刻，而得到佢哋幫忙，仲令佢「心裏很溫暖」咁話！萬南聽到當堂打個冷震，唔知小加呢塊人肉生招牌，能唔能夠為喺紀律部隊民望包尾嘅警隊，攞番多少市民嘅好感呢？
二五中環 萬南 黑天鵝市掃貨攻略
1 :
GS(14)@2016-11-13 21:30:17http://www.metrodaily.hk/metro_c ... %e6%92%90%e5%a0%b4/
原本寫起今期專欄，但睇見特朗普勝出美國總統大選，搞到周街眼鏡碎，忍唔住將寫好嘅稿刪除再開筆，拉雜講講最新睇法。
一，民調分析廢到無倫。選前人人話希拉莉贏硬，唔少基金芬佬建倉準備迎接大升市，點知陸續公布結果先發現唔對路，於是滾水淥腳打靶減持，星期三午後更一度人踩人跌超過千點。好多經濟或政治分析員坦言大跌眼鏡，事實上民調早已顯示誤差有3%至4%，統計學上根本存在很大不確定性，偏偏大家視而不見，只睇自己想睇嘅事。
二，黑天鵝今年特別多。以前黑天鵝好罕見，幾年都冇出現一次，先至變得大大鑊，但依家一街都係，今年英國脫歐又輪到特朗普，講到世界末日咁款，結果股市跌左一陣就升番，證明大家根本唔驚，只係搵一個理由隊深啲落去掃貨，進行財富大轉移。下次大家記住，遇到大插市，只要唔係孖展，不妨利用分段入市策略先掃第一口。否則急急沽貨，你只會變成財富被轉移的一個。
三，棄弱留強。萬一你已經成手貨，冇錢加注的話，經驗之談係應該換馬，換走輸緊錢嘅股票，留低甚至加碼買入強勢贏緊錢嘅貨，因為股市要升，一定強勢股行先。聽落好易，但要肯斬蝕本貨，心態肯定並不好受，加上高追強勢股，冇番咁上下股齡同心理質素都做唔到。
四，炒殼股。例如有啲概念炒足一年或以上，就係食正殼股概念，市場靚殼買少見少，市值幾億嘅股真係好吃香，萬南知道好多老闆想要殼，尤其鍾情電影製作公司殼，據聞有間已經展開洽購，現時公司大老闆早排增持到剛逾五成，新手可有絕對控股權，莫非好事近？
二五中環 萬南 滙豐獅子 二變四？
1 :
GS(14)@2016-11-21 03:51:40http://www.metrodaily.hk/metro_c ... %e5%9b%9b%ef%bc%9f/
滙控(005)外號獅子錢莊，相信好多人都知，就連發行嘅鈔票都印有獅子嘜頭。但大家又識唔識分中環總行門口嘅兩隻銅製獅子(圖)呢？擘大口嗰隻叫史提芬，合埋口就係施迪，兩者守護總行超過80年，絕對係飽歷風霜嘅老獅子，曾經喺係二次大戰時中流彈，身上依然留有彈痕。
rn現時滙控共有三對一模一樣嘅銅獅，分別擺喺集團總部倫敦，以及香港及上海呢兩個發迹地。不過，據聞情況好快有變，事關萬南聽聞香港較早前再將一對銅獅倒模複製，令香港變成有4隻銅獅。唔知係咪凸顯香港乃滙控最多盈利嘅地區，可惜滙控決定唔遷冊，否則香港肯定贏硬。
rn據聞滙豐有意短期之內，一次過將4隻銅獅「晒冷」擺晒出嚟，屆時地下大堂前後門都會有銅獅坐鎮，莫非因為呢個緣故，5號仔近排股價特別凌厲？不過亦有人講，新一對銅獅是用作長遠替代舊有的一對，令老獅可以入廠維修保養。
二五中環 萬南 高管讀EMBA 方便交友「籌旗」
1 :
GS(14)@2016-11-21 03:52:24http://www.metrodaily.hk/metro_c ... %e5%9b%9b%ef%bc%9f/
rn內地企業樂視極度擴充，近日搞到燒錢過度出現財困，傳聞欠落過百億人仔，創辦人兼董事長賈躍亭(圖)宣布嚴控開支，自己更出動個人關係，向昔日齊齊讀長江商學院嘅同學仔籌旗，總共撲得6億人仔，雖然杯水車薪，但總算是及時雨。
rn金融圈好多叻仔叻女都讀番個EMBA，老老實實唔係為學識，最重要是識朋友，大家識於微時，如果曾幫忙頂咁啲功課，日後有事江湖救急都易啲。所以萬南幾時都話，一係唔讀EMBA，要讀就讀名校。
rn就好似長江商學院咁，係內地今年崛起最快嘅學校，由李嘉誠基金會出資籌辦，每年學費盛惠約70萬人仔。題外話，啱啱中大EMBA畢業生之中，有香港樂視總經理在內，同學之間都講笑話，唔知佢會唔會叫大家籌旗呢？
rn
二五中環 萬南 韓妝企淡市心雄 誓將旺角變明洞
1 :
GS(14)@2016-11-28 00:06:08http://www.metrodaily.hk/metro_c ... %e6%98%8e%e6%b4%9e/
個個都話香港零售市道疲弱，連「佔領彌頓道」嘅周大福(1929)，最近都話執咗6間租約到期分店。不過，逆市就梗係有奇葩，化妝護膚品集團Amorepacific今年竟然喺香港連開13間新店，營業額仲維持雙位數增長喎。
Amorepacific乃何方神聖？原來係嚟自韓國，近年美妝界大熱嘅氣墊產品(Cushion)就係由佢哋研發，2008年面世至今，呢款產品已經賣咗1億件。Amorepacific旗下雪花秀、Laneige、Etude House、Innisfree 5大品牌已引入香港，唔覺唔覺已經開咗63間舖，單單喺旺角西洋菜街就擁有8間，集團香港市務總監鄭載歡(圖左)直言，有意將條街變成香港「小明洞」。根據「唇膏效應」理論，經濟好，女士買化妝品自然會疏爽啲；至於經濟唔好咯喎，呢啲錢就更加唔可以慳啦，咁先可以增加「軟實力」提高競爭力嘛！所以Amorepacific咁有信心，都唔係冇道理喎。
當然，空有雄心壯志係唔夠嘅，營銷策略都相當重要，所以佢哋都好注重社交媒體宣傳，透過Facebook介紹新產品同發放試用裝，成功引導顧客「入店」，帶動線下銷售；個別品牌仲整埋手機App與用戶互動，據聞Laneige App喺香港已經累積50萬名活躍用戶，都咪話唔犀利。
Next Page