金城營造集團於十一月一日在會展舉行盛大宴會，慶祝創業五十周年，點解揀在呢日慶祝？原來創辦人王錦輝老先生就係在十一月一日出生嘅，今年九十一歲咯，因利乘便，佢位公子王國強（現任金城集團主席）就選此日舉行公司及創辦人壽宴，筵開百幾席，因為佢係東莞人，屬「愛國建制派」，特區政府高官及中聯辦人員，包括梁振英與張曉明，都俾面出席，台上大合照人群中，有兩位洋人，來自中華電力，包括行政總裁藍凌志。
大凡公司上市，分析師必定查詢公司業務及主要客戶數目，如果營業收入來自三幾個主要客戶，分析員就會提出business concentration risk（業務集中風險），試想一兩個大戶如果撤銷訂單，該公司嘅業務就會受到打擊。舉個例子。假如一個出口商嘅最大最主要客戶係J.C. Penney嘅話，依家J.C. Penney生意受壓，理論上香港出口商亦會憂愁不已。
但金城嘅生意策略剛剛相反。王國強講過，佢在1980年代中回港接管金城，當年夥計只有十幾人（現時超過二千），主要客戶係中華電力。別人會諗到開拓客源，周圍落標，但王國強諗完又諗，決定集中精力，只係做中電嘅鋪電纜工程，其他客戶一於唔理住，佢嘅理由係：（一）中電生意長做長有，足以提供發展擴大機會，（二）嘉道理有人情味，中電看重長遠關係不會睇短綫，（三）只要金城能成為中電工程嘅「專家」，為中電工程購置專用設備儀器機器，中電會識得揀，其他工程公司唔會夠金城競爭。以後嘅發展路向，果然如此，中電與金城建立咗拍檔關係，別家公司想搶生意，冇咁易。
金城營造集團如果搞上市，大概會俾分析員質疑concentration risk，但佢係私人公司，就不必理會他人意見，當然，金城壯大至今天規模，也會做其他工程生意，但中電嘅工程，仍然係優先。
此晚宴會客人極多，東莞人嘉賓編在J區，左丁山聽到好多東莞鄉音，幾乎以為返咗鄉下。 