ZKIZ Archives


揸11間美甲鋪闊太文雪兒減12磅自薦《溏心3》做串星

1 : GS(14)@2017-06-26 03:26:17

2017-06-22 NM

現年57歲的文雪兒,16歲出道擔正女一,邵氏年代跟已故傅聲合作多部武俠片,後來轉投麗的成為哥哥張國榮的熒幕情人,91年淡出娛圈做人妻,千禧年玩票性質開美甲店,將擴展到十一間。13年曾被邀復出在《巨輪》做于洋老婆,最近又戲癮急call,她減十二磅自薦返大台拍《溏心風暴3》,雖然凌晨一點開工,清晨四點收工,但她說:「我拍得好開心。」元秋反對接劇

文雪兒目前開了九間美甲店,九月再有兩間新店開張。生意上了軌道,做了十七年老闆的她,生活悠閒寫意,突然簽約無綫復出拍劇,她說全因年初跟一班朋友聚會。「有日同亞視班舊同事傾偈,佢哋叫我減肥,我當時覺得減肥有咩用?都冇嘢拍,冇人搵。佢哋話人哋點會無端端搵你,以為你做少奶奶唔想做,你有興趣就主動搵吓人。快啲搵(劉)家豪哥,佢返咗TVB呀。咁第二日我就搵家豪哥,佢話會記錄在案,因為當時《溏心3》已經定晒人,加上去到第三集,重新安排我去做一個角色有難度。」文雪兒說。相隔沒幾天,她便獲安排一個客串角色,不過胞姐元秋卻說「拍乜鬼啫,又唔係等錢使」,她倒認為是良機,可以試水溫,看是否適應今日的拍攝方式。「最初我都驚唔知出面嘅人點諗,但之後又有另一個想法,就因為唔等錢使,可以嘗試拍一部少戲份嘅電視劇,冇咗呢個心魔,開工開得好開心好舒服。不過冇拍戲咁多年,究竟自己體力同記憶力仲得唔得,倒不如由少(戲份)開始,起碼唔會搞到人哋成日NG。」她坦言。

肥到一百三十二磅

同時她開始減肥大計,她說:「我向來比較瘦,得八十幾九十磅,不過之前去到一百三十幾磅,咪的起心肝減肥。我係用自然方法減,而家total減咗十一、二磅,睇起上嚟都精神咗。」

凌晨開工捱通頂

開工第一日,文雪兒凌晨一點埋位,清晨四點收工,習慣早睡早起的她,又得重頭適應。她懷念往昔拍戲的日子說:「我好唔捨得喺娛樂圈嘅日子,因為我好鍾意做戲。以前同張國榮、關之琳一齊拍戲,開工嘅時候已經好開心,放工會一齊去食飯,有時會打牌,有時去disco,成班後生有講唔完嘅話題。」

拍檔先後離世

提到舊拍檔張國榮和鍾保羅先後離世,她說:「鍾保羅好nice,佢走咗,係會唔舒服、難過,我記得佢走前,有打電話俾我,完全一句都冇提過,只係普通閒偈。至於張國榮,我睇到報紙先知道,當時毛管戙。或者佢哋都鍾意收埋,女人會講俾閨密聽,講吓講吓就冇咁難受,搵人開解就唔會鑽入死胡同,我覺得冇咩事係解決唔到嘅。」家人十分支持她全面復出,細女Jennifer一句「你都應該做番你想做嘅事」,令她十分窩心。老公知道她做事向來有分寸,所以給她百分百自由。而正在英國工作的大女Christy,比她還要勤奮,當然舉腳贊成。攞正牌重投幕前,文雪兒愈忙愈開心!

撰文、攝影、攝錄:娛樂組場地提供:Nail Bar
PermaLink: https://articles.zkiz.com/?id=337063

Next Page

ZKIZ Archives @ 2019