ZKIZ Archives


福臨門之變(下集)

2013-09-05  NM  
 

 

「富豪飯堂」福臨門爭產風波,糾纏多年。去年底,五哥徐沛均高價奪得港九福臨門,首戰敗陣的七哥徐維均,近日高調在灣仔另立門戶,新店取名「家全七福」,下週四正式開業。表面上各有各做,但對陣味濃,更盛傳七哥為啖氣,高薪從福臨門搶人,洗碗兩萬、收銀三萬。搶客戰未開波,新一輪官司已一觸即發。先是七哥為接管一事再入稟,另一邊廂,五哥亦欲收回海外福臨門。兩兄弟,舊恨新仇,傷疤無法癒合。「家全七福」剛好在中秋前夕開張,七哥嗤之以鼻:「團圓嚟做咩?」

「家全七福」位於灣仔杜老誌道的群策大廈,食物款式與同處一區的福臨門無異,連價錢都接近,擺明車馬打對台。七哥官腔回應:「有競爭才有進步,各有各做。」不過,單看店名,已有「挑機」味道。「家全七福」以嫡系正統自居,除包含創辦人﹑父親徐福全的名字,還諧音「傳七」,以此強調排行第七﹑自小跟父親學廚的徐維均,才是家業的傳承者。

強調歷史傳承,但「福臨門」這三隻字,卻是禁忌。新店公關新聞稿內,以「高級粵菜食府」代之,訪問期間,七哥亦只說「以前嗰間」﹕「香港八成人都知(福臨門)我有份啦,講出嚟費事話我沾染佢。」提到餐廳拱門裝飾與福臨門的圓形招牌相似,他反駁:「拱門香港周圍都有。」但習慣,有時改不了。從福臨門跳槽過來的樓面副經理,介紹菜式時,說漏口﹕「幾十年福臨門……」馬上收口,但已落得滿臉尷尬。若無芥蒂,何須忌諱。

冰封三尺,非一日之寒

一世人兩兄弟,五哥管樓面及掌數,七哥統領廚房,何以弄至如斯田地,七哥感慨:「冰封三尺,非一日之寒,廿年前已經想分家,只係羅安(九龍福臨門總廚兼股東)㩒住。」何故起爭執,他不願多談,只說:「幾十年都有拗撬,次次都係我拗贏。佢被啲伙記蒙蔽。佢做會計咁巴閉,但真係『做』係我哋做,做完佢先有得計o架,但錢就一樣咁分。」兩兄弟原本各持有福臨門四成半股權,其餘一成由其他同父異母的姊妹持有。○九年不和升級,五哥控告七哥誹謗,指七哥誣衊他刪改遺囑。翌年雙方皆入稟要求收購對方股份,最終聽從法官勸告,改為互相競投對方股份,價高者得。兄弟早已發達,各手持兩億物業,但福臨門年賺四千萬,兩個鋪位共值六億,要「食起」對方股份亦不易。當時,二人協議只憑自己財力競投。有指糖王郭鶴年為七哥撐腰,他即擰頭﹕「佢無幫手,求人借錢好慘,爭人錢會頭耷耷,最緊要有骨氣。」他回憶,投標當日,二人各自在獨立房間內,將價錢寫在紙上,逐口叫價。「我計過條數,唔夠錢,人哋有外援,點同啫!」

我收到錢,向前看

最終,五哥一方靠兒子徐德強,找來外援華人飲食集團(8272)幫拖,盛傳收購價達八億元。七哥指對方違反「唔搵外人」的協議。為何不上訴?他不以為然道﹕「我收到錢,向前看,唔係輸,唔係贏。唔通好似鏞記上訴又上訴?幾時先甩到身?」而誹謗一案,亦隨着七哥撰寫一封私人道歉信而告終。新店投資二千多萬,上下共三層,月租五十萬,每月單是成本要五百萬。七哥持有八成股份,內地明星趙薇牽頭的公司持股一成半。消息人士指,背後的投資者除了其丈夫黃有龍,還有背景神秘、有「喬老爺」之稱的喬華,以及喬華妻子、以主唱《我的1997》聞名的內地歌手艾敬。七哥笑着反駁:「唔係咩大水喉,我好等錢使咩?只係去大陸開分店,佢哋幫到手。」現在,上海浦西分店已在籌備階段。另外,熟客仔「股聖」莫應基的兒子莫慶雄醫生,亦有百分之五股份。合作不怕又撞板?七哥坦承﹕「怕!兄弟都咁麻煩,何況外人?不過細細哋,佢哋盛情支持,十個percent玩吓唔係問題。」

老闆鬧伙記,天經地義

十四歲入福臨門打工,六十五歲的七哥常掛嘴邊的是:「我對住佢(福臨門)五十年,仲多過我老豆,最有感情仲唔係我?」落敗離場,他直認「唔開心」﹕「希望開番一間,有地方落腳,唔係約人食飯都唔知去邊。佢(福臨門)唔歡迎我,我亦唔會返去,費事以為我帶啲客過嚟咪仲慘。」不過,盛傳他為啖氣,三月開始從福臨門高薪挖角,洗碗人工高達兩萬,收銀有三萬,更開出半年有薪假期,及請員工到日本旅行等福利。七哥聽後即笑道﹕「咁誇張?佢哋咁咪好肥,笑到牙都甩?升職當然有加人工,但你估我唔使計數咩,收到幾億就係好多錢?」他表示,有三名廚房員工及樓面部分職員從福臨門過檔。有指七哥性格火爆,十足十花名「鬧鬼福」的父親,他曾拋出「老闆鬧伙記天經地義」的金句,昔日大廚陳祐良及樓面經理陳錦年被他鬧走,連客人也不能倖免。「鬧,係袋錢入你袋,你先有機會升職。(我)說話,(客人)聽到唔高興,可能有誤會,但都要維護伙記嘅尊嚴。」他沉默數秒,再說:「都要睇吓伙記鍾意邊個老闆,要挖都挖唔到。總之,曹操也有知心友,關公亦有對頭人。」

用財技,蛇吞象呀

七哥對五哥兒子、現已掌舵福臨門的徐德強,不滿更是完全浮面。「佢(徐德強)搞上市公司咁多年,隻2324(上市公司德華中泰,現為首都創投)有無賺過錢?問吓David Webb囉!」七哥勞氣說。○九年,徐德強在德泰中華任職執董時,被指以虛假交易推高股價,結果被罰款百多萬,及禁止出任上市公司董事或管理層兩年,據了解,徐德強正排期上訴。在競投福臨門股權一役,徐德強將福臨門逾四成股權,以兩億元可換股債券,「即入」創業板上市公司華人飲食集團。「又話自己點叻,老豆都被佢瞞騙,仲搞埋財技,用十幾釐息借錢引入外援,蛇吞象呀!」七哥再嘆口氣說:「唉,早分好過遲分,(免得)下一代仔女仲慘。」七哥又回憶起,○四年郭鶴年邀請他合作在國內的香格里拉酒店開設福臨門,七哥曾提出將內地一成股權交給徐德強,方便將來接手管理。「點知佢話:『七叔,我要五成一。』最終我分咗一成俾佢,仲話想話事,但等極佢都唔返嚟幫手,(做人)唔好下巴輕輕啦。」七哥不屑道。官司過後,七哥已購回徐德強手上的一成股權。

改名無限期

接近五哥的消息指,這兩家人就接管福臨門的手續,再次對簿公堂。「七哥話五哥無喺董事會議通告上,交代清楚接管細節。咁小事,佢都要入稟打官司,好似仲未放得低。」消息人士說。對此,七哥只說是按律師指示,做足手續,但訴訟屬內庭聆訴,不便透露詳情。而七哥私人持有的四間日本福臨門,以及與郭鶴年合作、在內地香格里拉的三間福臨門,按雙方協議要改名,但由於無設期限,七哥遲遲未見行動。該消息人士透露:「五哥有興趣打入大陸市場,攞番嗰三間嚟做,而餐廳嘅事郭鶴年交晒俾嘉里建設主席黃小抗去搞,七哥一早埋咗佢堆。」另一邊廂,七哥淡定回應:「改名無限期,但要先喺香港搞好家全七福個名。佢要返大陸開,咁就寫信俾香格里拉,想點就寫信過嚟俾我啦!」對於七哥的指控,五哥兒子徐德強回應:「我哋無違反任何和解協定,我唔明點解七叔話我哋引入外援、玩財技,當初佢去日本開餐廳,都將一半股份俾咗日本人。」至於早年合作開內地福臨門一事,他感慨道:「當日我只係話,要攞幾多股份都無所謂,只係希望七叔退休後,就俾我做番大股東。因為無可能我做咗嘢,佢將股份交俾其他人。無論福臨門定係家全七福,都係爺爺傳落嚟,希望大家都做好啦!」

依家仲係一家人咩

家全七福試業,不少昔日熟客已率先捧場試食,包括郭鶴年一家。下週四開張,日子乃堪輿名家蔡伯勵所擇。開張之日離中秋僅一星期,一家人還有沒有團圓的機會?七哥輕蔑地說:「團圓嚟做咩?依家仲係一家人咩?你引入外人,呢間酒家唔係姓徐喇!」但家全七福亦有外姓人,他激動反駁﹕「新嘅唔好講,呢一間唔係老豆傳落嚟,無咗『一定要係屋企』嘅包袱。但係你嗰間口口聲聲話係徐福全傳落嚟,你話依家姓咩?你叫佢因住,睇吓對唔對得住祖先!」店名為「家全」,實不全。月有圓缺,人有離合,此事古難全,但願故事結尾如七哥所講般﹕「恩怨情仇,講多無謂;各有各做,向前看。」

福臨門 福臨 之變 下集
PermaLink: https://articles.zkiz.com/?id=74759

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019