| ||||||
啟德郵輪碼頭六月十二日開幕，目標瞄準大陸豪客市場，但啟德設備還未完善，據了解，要等到明年四月才合共有十六艘郵輪靠岸停泊；但食住這條郵輪氣勢，在尖沙咀碼頭一帶，有廿多年歷史的賭船卻借勢反彈，近一年上賭船的賭客回升，引來黑幫爭客大打出手。這些賭船，標榜一晚消費，平過住酒店賓館；三千元泥碼任飲任食，又有海景套房、聲稱五星級招待，令大量自由行內地客上釣。賭船生意突然旺場，部分疊碼仔開始無視行規，搶客時起紛爭。上月十七日，「勝和」與「14K」兩幫人馬，就因碼佣及待客問題，在碼頭對壘，警方反黑組連日派出大批探員上船查牌。賭船生意以往由勝和一幫獨家壟斷，這宗挑釁事件，為一場賭船爭霸戰揭開序幕。 這些賭船，每日在尖沙咀公眾碼頭用駁船接載客人上船，然後駛出公海進行賭博，既是賭船，自然有俗稱疊碼仔的博彩中介人出現，負責替賭船拉客。 拉客落船 「上唔上船呀？海上假期，郵輪呀！老細。」只要行經尖沙咀五支旗杆、鐘樓、文化中心及廣東道一帶，總會不停聽到有賭船負責拉客的中年女子在吶喊，向途人以兜售賭船船票為名，實際則是游說買泥碼。「兩個人六千蚊籌碼，送房同埋船上早午晚自助餐任食，仲有表演睇！」由於生意轉旺，近期拉客中女由幾十人激增至二百多人，活動範圍更擴展至海防道、彌敦道上的柏麗大道及尖東一帶。「呢班師奶係下游，佢哋上線就係賭船疊碼仔。這班疊碼仔一早講掂數分晒碼頭，以五支旗杆為界，海皮一路向尖東由一班大哥睇，外圍一帶的廣東道由另一條水嘅人睇，因為人是會流動的，所以班師奶拉客時不時過界，亦會為咗爭客嘈交打交。」在賭船任職疊碼的老叔父權叔說。在廣東道，這班拉客師奶經常在名店門外守候；碼頭情況亦不遑多讓，的士站上落客地點，不時見一堆師奶兵團一擁而上。「下晝四點至八點返工，一個鐘五十蚊，sell到客買碼，每一千元泥碼拆到二十蚊，如果啲客買得多，仲可以再拆個總數攞百分比回佣。」在場搵食的阿香向記者透露，大部分拉客師奶都是熟人同鄉介紹。「要識普通話o架，拉客都姣（好）辛苦，不過工作時間好，出力搵客收入都可以。」阿香以半鹹淡廣東話說。 船上焗賭 記者喬裝遊客，買泥碼上賭船，推介的阿香笑不攏嘴，不停提醒記者：「等陣間登記，你記住講係我阿香介紹。」接駁郵輪船一日三班，傍晚六點半、七點半及十點半。幾個附近的師奶見阿香得米，就上前輕聲乘機問：「老細仲有毛（無）朋友啫，兩個五千喎！」記者隨着其他自由行遊客甫入船艙，賭船出到公海，全船廣播「娛樂場現已開放」，此時賭廳就熱鬧起來了。但船上的所謂「各類休閒娛樂設施」形同虛設，像卡拉OK夜總會、桑拿浴室、按摩房、美容中心、免稅店等，不是沒有營業就是乏人問津，連服務員也只有數人，泳池及露天酒吧亦烏燈黑火。進入賭廳範圍，氣氛更突變。賭場中，幾十名紋身大漢船上職員負責招待客人，他們個個虎視眈眈。賭廳內有八張賭枱：一張大小、一張牌九及六張百家樂，沒有老虎機及廿一點。賭客上船向疊碼仔買的是泥碼，不能兌回現金，變相焗賭，賭客要在賭枱上獲勝，才會獲賠現金碼，以兌換回現金。開賭初時，氣氛不熱烈，賭客多是觀望，不少疊碼仔為了營造氣氛，自己落場下注「做媒」。就這樣賭足一晚，直至清晨五至六點，賭客要不是疲憊不堪輸清光，就是欠下巨債被疊碼仔左右「夾住」等上岸還錢。 旺場 賭船在香港拉客到公海賭博已有二十多年歷史，其實賭船生意，近幾年本來一蹶不振。在賭船任職疊碼的老叔父權叔解釋：「搞賭船出一轉公海的油費、人工、設施使費一轉就要三十幾萬，近年啲油費愈來愈貴，加上賭客的賭錢能力不及從前，好多豪賭大客人全部走晒去澳門賭場賭，街客賭得幾多？所以賭船好難做。」不過，隨着香港酒店房價不斷攀升，油尖旺一帶的大廈賓館都要八百元一晚，令部分自由行旅客「回歸」賭船。「有啲大陸人又想賭、又想慳房錢，唔想過大海（澳門），所以就揀上賭船玩，賭船生意由舊年開始多了兩成。」權叔說。據旅遊業議會資料，過去一年，到香港「上賭船」的人次有上升趨勢，去年全年有一百一十八萬人次，其中四十二萬上賭船的是內地人，今年首三個月就有三十萬人次，當中內地人有十萬人次，比去年同期多出百分之七。 「14K」對「勝和」 據知，本港現時約有七艘賭船運作，當中以勝和猛人刀文龍經營的「大都會」、「明都會」、「東方神龍」及「海皇星」最為出名，其次便是由賭王何鴻燊經營的「澳門實德」及「中華之星」等。賭船疊碼行規，碼佣最高為百分之三，即賭客買一萬元泥碼，疊碼可獲三百元佣金。「另外賭船規定，任何疊碼仔只要成功招徠一名新賭客，呢個客跟一世，即永遠屬於呢個疊碼仔，未來所有買碼嘅佣金都撥入佢賬下，所以新賭客係疊碼仔必爭之地。」權叔說。由於這個江湖規矩，不少疊碼仔為爭奪新客時起衝突。上月十七日發生的一宗爭客案件，主角是荃灣14 K小頭目阿京。「佢帶咗幾個新的大陸客上『大都會』，點知班客賭十鋪輸十鋪，好無癮猛咁詐型，又同睇場爭執，阿京代為出頭，兩邊人紮晒馬，嗰個內地豪客之後更被拒絕上賭船。」 翌日阿京一幫人心有不甘，帶同卅多名兄弟，一連數日在尖沙咀碼頭滋擾客人上船，擺明向勝和挑機。有人吹雞拖馬數十人在碼頭伏擊阿京及其手下，雙方發生混戰。「其實14號一向都唔滿意勝和系人霸晒賭船玩，佢哋14號啲人一直淨係可以在外圍撈油水，佢哋覺得邊瓣多客源，邊瓣就應該有得話事，家陣世界有幾多錢可以搵？而家見賭船有啲錢執，仲唔爭住過來搶？」權叔解畫說。警方怕這場賭船爭執會演變成兩幫大廝殺，近兩星期展開連串反黑行動。兩星期前，聯同○記合共七十多人從紅磡碼頭，乘水警輪上兩艘賭船搜查，包括刀文龍當時身處的賭船「東方神龍」，最後該船至凌晨十二時才獲准啟航。警方表示，案件仍在調查中，現時並無拘捕任何人士。 刀文龍大有來頭 刀文龍全名都廣旺，來頭不小，○五年四月，台灣一名姓林遊戲機大亨之子被綁匪擄走，歹徒開價一億港元，雙方討價還價後，事主願意支付四百萬美元，台灣警方破案救出肉參。由於綁匪要求將贖金匯至澳門，其後澳門警方介入調查，拘捕四名人士，包括涉嫌藏有攻擊性武器的都廣旺，最後他被判監兩年九個月，獲緩刑三年。消息指，都為人低調，早前得到內地有力人士支持，染指賭船生意，除持有大都會郵輪外，明都會郵輪亦由他經營。記者翻查都廣旺的公司註冊資料，發現他另開設海岸線文化傳播有限公司及出口女裝T恤、電子產品為主的香港有限公司。 | ||||||