他們的畢業禮 人在中環
http://manincentral.blogspot.hk/2013/07/blog-post.html響外國讀書既時候，參加過好幾個畢業禮。響畢業禮既場外，與及畢業禮場內進行既過程裡面，有學生示威抗議，也見識過唔只一次了。那時我覺得自己係局外人，對果啲學生抗議既原因，我也冇嘗試深究。道聽途說大概係因為同學們對該校既校長、高層有所不滿吧。
做這種事情到底係對定錯？上個星期演藝學院既畢業禮，成為好多人既話題。大家既焦點，都係呢班學生所做既事，到底係對抑或錯。
類似既事，響西方既校園其實時有發生，大家都見怪不怪了，而且大部份人都已經接受，呢樣係「大學生活」既一部份。是對是錯，當地人其實大家都冇乜興趣討論。同樣既事情響香港發生，變成了大新聞，多少因為香港人習慣了絕大部份事情都必須「守規矩」同「服從上級」既文化。特別係一班成年人認為呢班只係「乳臭未乾」既學生，響一個「長幼有序」既社會裡面，這班還是「食物鍊」裡排得比較低既一群，當他們居然夠膽做出一啲所謂唔守規矩、唔服從大佬既行為時，就為好多成年人既脆弱心靈，帶來特別大既震撼了。
對同錯，要拗其實都只會係搵交嗌。我比較傾向咁諗：一生人裡面，其實冇幾多時間，係可以無憂無慮，冇包袱既環境底下表達心中既意見。學生們一畢業，生活壓力隨之而來，責任越黎越多，包袱亦會緊隨其後。當佢地踏出社會，好快佢地就會發覺，自己已經唔再能夠好似讀書既時候咁，隨意將真心說話表達出嚟。畢業禮嘛，其實可能已經係佢地人生之中，最後既一次響冇包袱既情況之下表達自己。這樣既一次「最後放縱」，我等成年人去評價佢地既時候，態度其實又何必太過批判？
*****
又想講一點點唔多關係既題外話。好多人都迷信做人應該「守規矩」同「服從」，否則就係唔尊重人、又或者被人認為在搗亂搞事。商業社會裡面，有好多固有既規律，呢啲規律，永遠都會係向某啲人、某啲團體傾斜的。學生自細被教導，一生人都要好好「配合」呢啲規律，先係一個「好孩子」，唔願意配合，又或者對固有規律有所質疑既學生，就會被認為係「壞份子」。然而要做一個人家心目中「好孩子」既思維模式，到底最後會令人步向成功既慷莊大道，還是會讓人不自覺地接受「集體平庸」？