ZKIZ Archives


中大校友Proxy War 左丁山

2010-6-21 AD






 

上星期五《蘋 果》李八方有篇「中大校友吹雞護校」,幾嚇人。不少在中環尖沙嘴搏殺嘅校友,睇完嚇咗一跳,互相打電話通報,因為佢哋平時忙於打工,養妻活兒或養夫活女或 夫妻同時在外勞動,上顧高堂,下養子女,幾難搵到時間嚟理會中大校友會評議會之事。曾有一位月報總編輯,港大畢業,在中大攞碩士學位,於是港大中大嘅校友 會評議會佢都去過。幾年前佢對左丁山講:「港大評議會開AGM,半個鐘頭之內就可以散會。中大評議會呢,我去過一趟,淨係校友辯論就似足立法會,一講就成 個下午,我開開吓會議,見唔對路,都要鬆人啦,邊度有咁多時間呀?」

中大人性好辯,最叻自己鬧自己,在校時一定罵校長,畢業後本來冇時間鬧 啦,要為前途着想,努力工作噃,但十年來興起一股潮流,就係有啲人畢業之後還是留戀學生生活,唔想在社會競爭搏鬥,而係想返回熟悉嘅校園搏鬥,在下一代學 生面前顯威風,究竟目的目標為何,旁人想不通。端午節在馬場碰到港大校董會主席梁智鴻及徐校長,兩人都唔知幾輕鬆,梁主席掛上一個「起錨」標記,十分搶 眼,如果佢哋係中大主席或中大校長,恐怕無此時間、心情矣!劉校長同是行會成員,如果佢亦掛個「起錨」襟章在中大出現,恐怕出唔到校門。港大學生會果然好 有理性。

李八方(港大畢業生)驚中大唔夠熱鬧,公然為支聯會常委李耀基(聯合政政2009),徐淑梅(崇基心理2002)及黃俊邦(逸夫政 政2006)三位拉票,徐、黃兩位曾做過亞視、港台及社民連,同是廿一世紀中大產品。李八方冇提及姓名嘅另外三位校友評議會常委候選人,據知係呂令意(新 亞英文70),前何文田官中校長,現任中大香港教育研究所兼任導師(擬任校長培訓班);李漢祥(崇基工管1993),曾任Oracle高級經理、現管理諮 詢公司董事;蔡明都(聯合會計1988)現任中大創業研究中心項目總監。以往本來冇乜中大人理會評議會選舉常委嘅,經李八方大力宣傳,好多成日話唔得閒嘅 校友紛紛起動,實行嚟一次護校行動,防止激進分子惡搞,將校友評議會政治化。六月二十六日本是平凡日子,呢日崇基利黃碧瑤樓演講廳勢必逼爆。



PermaLink: https://articles.zkiz.com/?id=16284

Next Page

ZKIZ Archives @ 2019