📖 ZKIZ Archives

中電首創 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130512/18256671

今年一月十一日，本欄寫「中電加價不會停」，論及中電與中石油簽訂二十年天然氣長期供應協議，指中電以後一定會有加價壓力。差不多四個月後，五月六日星期一，「蘋果」有一篇丘亦生專欄評及，亦提到嘉道理在中電股東大會聲言以後中電會申請加價，今年年尾加價幅度會達到10%。理由喺邊呀，咪係與二十年西氣東輸，特區政府在2008年否決中電興建LNG倉庫有關囉。
世界能源市場因美國頁岩氣（shale gas）生產大躍進，正發生結構性變化，石油價格以後易跌難升，石油輸出國組織想話維持油價在每桶一百美元，相當困難，金融時報五月五日頭版報道美國總統奧巴馬與國家安全顧問已放出訊息，美國可能會批准頁岩氣出口，已有企業申請在德州海岸興建頁岩氣倉庫碼頭，以LNG形式出口。此外，加拿大早已對美國環保團體阻撓Keystone氣管項目（由阿爾伯達省運頁岩氣至德州墨西哥灣，供應美國）感到不耐，正計劃改為興建由東而西嘅氣管，在卑詩省出口（不過卑詩省亦有環保團體反對），出口去邊？中國囉。為咗經濟與就業，美加政府有好大可能性否決環保團體要求，一於為頁岩氣開路。如此一來，由於天然氣比石油及煤更為乾淨，可減低排放，加上價格便宜，石油與煤嘅前景可想而知，美國憑頁岩氣成為能源出口國，大挫OPEC威風，大增美國之國際話事權！有此政治利益，奧巴馬抵受唔住引誘嘅。
中電就可憐啦，唔可以在世界市場採購LNG，未來二十年眼光光，俾二十年供應合約綁死，為中國石油貢獻9000公里輸氣管建造費，嘉道理應該攞番一個大紫荊勳章。中電雖然話搞風力、太陽能發電，但杯水車薪啫，未來始終係要靠天然氣發電，益唔到九龍新界大眾。之不過，中電係咁意做吓，都攞到個大獎，真係估佢唔到：中電在西貢對開海面晨曦島運用太陽能、風能在島上發電，加埋蓄電池，用672塊太陽能板，576組蓄電池，2台風車組上一個發電系統，過程零排放，首創全港第一個獨立運行可再生能源系統，早前就獲得香港工程師學會之2013年「21世紀香港十大傑出工程項目」之一！但全港用呢個環保方法發電得唔得？因規模要擴大九龍新界十萬八萬倍，好難咯。


左丁山
PermaLink: https://articles.zkiz.com/?id=55399
Next Page
ZKIZ Archives @ 2019