聖誕出街哪有錢？CEO教你傾高啲人工
1 :
GS(14)@2016-12-21 23:35:32又嚟到聖誕佳節啦！一個毒L，留喺屋企空虛寂寞凍？出街？哪有錢？今年冇錢啫，不如下年積極搵份人工高嘅工，一年後過一個報復式燒錢嘅聖誕節！財經網站《BUSINESS INSIDER》引述一位專業訓練公司嘅CEO Bryant Galindo講到，一個人要喺事業上取得成功，有一個決定性因素就係傾人工！佢話每位老闆見工時，已經預咗面試者會進行人工談判，以下五式，可以讓面試者喺未來老闆面前立於不敗之地。第一，做足research。要了解自己嘅技能喺市場上面值唔值錢，可嘗試上網搜尋有關自己工作技能嘅資訊。最後要問自己一句：我有乜嘢價值同投資回報畀到未來老闆？假如你面對一間startup，對方未必畀到高人工你，假如間公司將會有增長潛力，你就有機會要求對方分公司股份畀你。第二，為人工set一個可接受最低價錢。做完research後，閣下可能了解到自己應有人工嘅範圍，你就要諗吓幾多人工先能夠接受。如果對方開出人工低到你不能接受，又唔保證日後加足畀你，你大可以坦承表達自己想要幾多人工，話埋畀對方聽，自信自己物有所值，對方咁都say no？大概唔使傾落去。第三，知己知彼，面試官/老闆要起底！你唔係未卜先知，或者唔知見你嘅人有乜喜好，但至少要知道乜嘢角色嘅人見你。如果見HR，喺人工談判嘅空間就較細，但喺爭取其他福利方面就有較大空間，可嘗試透過傾福利去收窄人工差距；如果見未來老細，對方唔會鍾意你喺僱員合約裡面雞蛋裡挑骨頭，乾脆爭取高啲人工仲實際；如果直接見管理層？佢幾乎咩都應承到你，但最緊要快快手手。第四，呢一式係心法，比較空泛，緊記面試傾人工猶如跳舞。正常情況下，面試官/老闆會主導談判，然後你跟住佢beat，所以要你盡量配合佢個beat，令對方滿意，就自然願意畀高啲人工，亦有機會爭取到幾時開始返工都得、工作時段任你揀、更多年假等等打工仔夢寐以求嘅福利。第五，最後一式，可能同爭取人工無關，係要畀對方知道，邊項因素對你來說最重要。或許你心底裡認為，返工開心先係最重要，又或者有時間陪屋企人對你嚟講係最珍貴，當未來老闆願意開出條件配合你，就更容易搵到自己滿意嘅工作。
來源:
http://hk.apple.nextmedia.com/financeestate/art/20161221/19872142