孟加拉全國有四千五百間製衣廠，製衣工人過百萬，每年出口總值二百億美元，佔全國出口（貨總值）百分之七十七，孟加拉製衣業之咁興旺，全憑歐盟美國對佢有特別優惠，孟加拉成衣可免稅進口，無配額限制，加上孟加拉人口多，工人供應似乎無窮盡，十二歲童工嘅人工係每月三美元，工人平均工資係10美仙至30美仙一小時，低過香港最低工資時薪30元好多好多。有此廉價勞工因素，一啲國際牌子如Wal-Mart、Gap、H&M、 Sears、JC Penny、Joe Fresh、Benetton、The Children's Place等等都有貨物在孟加拉製造。發生四月二十四日之塌樓事件後，歐盟考慮制裁孟加拉成衣業，逼孟加拉政府加強工業安全標準，加拿大零售議會召開緊急會議商討對策，Joe Fresh與沃爾瑪有參加會議。歐洲方面，沃爾瑪、家樂福與Gap、H&M在法蘭克福開會。英國零售商Primark宣佈向供應商（孟加拉工廠）之死傷工人賠償，還算有點情義。至於迪士尼，就話在意外發生前，已決定停止向孟加拉、厄瓜多爾、委內瑞拉、白俄羅斯及巴基斯坦採購製成品。
跨國公司與政府聯手施壓，甚至制裁孟加拉成衣業，是否可以為孟加拉工人帶來好處？唔係直覺咁簡單啫，學生Y自孟加拉學習回來，深知彼邦工人苦況，認為一旦有制裁，外國訂單不來，大量製衣工人會失業，首當其衝嘅就係最弱小嘅族群──女工，女性在男性當權嘅伊斯蘭國家，搵工十分困難，若然冇咗份車衣工作，會立即失業，生活比現在更艱苦！
幾十年前就有經濟理論指出，落後國家走向城鎮化嘅過程，就係工業化過程，大量農村農民移入城市（如迪卡），為城市帶來極大社會、教育、衞生、房屋壓力，首要工作就係為呢類城鎮移民（urban migrants）提供勞動密集工業嘅低技能低薪工作，等佢地有啲收入先，否則大量失業農民聚居城市嘅話，暴動難免！中國過去三十年，就係沿着呢個模式前進，好彩中國嘅組織及管理能力較強，冇出到亂子，但在孟加拉，就環境不一樣，製衣業係勞工密集工業，適合孟加拉吸收工人，提供就業，但如果話唱高調，孟加拉女工加薪五成嘅話，又會大大損害孟加拉競爭力嘅啫！西方消費者肯唔肯用錢嚟證明佢地口對心呀？ 