當然讀者是幾叻仔的了，製造了月入近100倍之財富，唔知你本金用幾多，亦雖未埋單計數但睇帳面已令不少人羨慕。成績已證明自己有一定膽色同能力，回報已有2000%，何不再進一步，利用手頭上資金再加上一個零呢? 人的生活是在於你怎樣過，你靠自己搵得更多，即見識更多，到死一刻只有更少遺憾，更少去問如果。諗樣的人生觀認為這樣過活令人生更有意義。
咁快就諗四百萬或八百萬夠唔夠守完場，只會輸完一球又一球。現在work hard play hard，過多廿年仲有命然後再諗點去「守」仲未遲。
建議賣出一層，因賣一層所得一百萬已可自己多年所儲金額了。留番一層原因是讀者弱點是借貸力不足，這亦可能是他為自己定下太低目標之原因。淨低一層，問題已由他自己所點出: 就是回報6厘的屋為何未給予正現金流呢? 筆者相信六厘之計法是用現年租金收入除以2010年之買入價。但如用現市價再計，即將8500*12/1.44mil，年回報只為4%。對於一間舊樓來說，4%是偏低的。如果買舊樓都只係得4%租，我不如走去買間翠屏或者好運收租了，又好租樓齡又較後生，冇咁多野煩。
如果讀者的人工未能再向前邁進，他只好努力在被動收入方面入手。倒不如將間屋變成劏房，再谷大回報至7%，然後搵返一個同係今日一樣相信花園街舊樓4%年回報為正常既人去接左貨佢吧。條數係咁計: (1.44mil+1)*7%，即係要造好間樓個月租收入為170000，你要再搵「專業人員」去度下，可否間到值錢套房決定在你的門窗位，當然此事是先投資，間房都要錢，平平地六至七萬做得成。事成搵好租客後，訂好租約作為下次賣樓之證明，話比新買家知你間樓收租都收成萬幾蚊，計番4%年回報，賣價係170000/4%=4.25mil。你咪平些少三百幾萬賣比佢囉! 當然你要搵另一個同當日的你一樣，覺得舊樓年收租4%冇問題之買家。
就當你間唔到咁劏房，租又加唔到咁多，你間返兩間套房執靚張租約佢，用增加租值去扯高叫價是坊間一貫用緊之法。投入金額六萬銀而又賣蚊成百萬，諗樣反向提供一個大賺廿倍之方法。希望可以同你2010年至今大賺二百萬之經歷，一起相輝亙映吧!