讀者Ｋ家住上水，常在火車站受到內地遊客擠迫困擾，睇見左丁山反對限奶令，反對反自由行，忍不住寫電郵嚟質問左丁山是否擁有店舖或連鎖店股份，昨日已經答咗佢：可惜自己冇呢。諗深一層，自己算係笨蛋，一早睇到大趨勢，又唔去買周生生與莎莎股票，失去搵錢機會，反而一位女士睇本欄（好似兩年前）講沙田第一城由置富REITs（778）接管，行將大裝修、加租，如想對沖，不妨買置富股票（即基金單位），呢位女士立即買入，依家價位升到近7.4元，每次見到碰頭，佢都多謝左丁山，可憐左丁山只擁有零單位。
2003年一月，校友地產Ｌ在校友午餐例會談及2003年投資前景，當時還未有沙士襲港，地產Ｌ大聲疾呼叫我地到銅尖旺買舖，大小不拘，之後不久，沙士將香港變成死城，地產Ｌ一啲都唔怕，繼續買舖，呢啲咪叫做投資眼光囉，2004年開始有自由行，地產Ｌ變得富上加富，我地還是不富，唔恨得咁多咯。
2004年之後，其實舖租及舖價未直線上升，香港零售總額在1997年創下高峰，2003年跌到谷底，有咗自由行，2007年零售額破1997紀錄之後，至2010年增長唔算好多，但2010年增長18%，2011年增長25%，2012年增長10%，三年間共增長53%之多，零售總值在2012年高達4454億元，咁就帶動遊客區地舖租金瘋狂，升完又升。道理一字咁淺啫，睇嚇同期之私人商業空間數字，2009年至2012年之間只係增加咗1%咁大把咋！
創辦「黃金十年」嘅林奮強最近公開講過以上數字之後，同我地吃晚飯，指出本港通脹未必可以怪責美元貶值，輸入通脹，本地通脹主要係本地供應不足所造成，租金上升就係供應不足之反映。香港勞工供應短缺，但不准輸入外勞，香港目前失業率係3.5%，總就業量已經創下歷史新高（372萬人），過往三年家庭入息中位數增加20%，簡單講句，做工人數多咗，收入多咗，遊客多咗，於是零售額自然增加，偏偏商場店舖數量面積冇升到，租金唔升至奇！解決方法只有一個，就係盡快增加供應，增加商店商場數目，否則通脹無法解決，商舖租金難以回落。 