ZKIZ Archives


【果籽人話】做35年燈飾未厭過 「青春賣畀時代廣場」

1 : GS(14)@2018-01-07 16:24:57

今年是黃劍山投身燈飾行業的第35個年頭。

「你問我,天生都係做燈架喇,走唔甩,聖誕燈飾玩咗我35年,你話我一生人係唔係同燈結下不解之愁?真係唔知究竟係燈揀我,定係我揀燈,一生人有幾多青春?有幾多個十年?我全部都畀晒燈喇。」59歲的黃劍山如是說。


每年聖誕前夕,黃劍山這位「聖誕燈飾大王」總是特別忙,不止要籌備維港兩岸的聖誕燈飾,還要接受傳媒訪問,他說今年特別多訪問,無他,只因今年是他投身燈飾行業的35周年,是值得紀念一下的。你和我從小看到大的聖誕燈飾,大部份都是出自他手筆,「永安廣場、九龍香格里拉、尖沙咀中心、帝國中心1、南洋中心、新鴻基中心、中信泰富大廈、和記大廈、銅鑼灣信和……太多了,記不到那麼多,以前成個尖東,18座樓都有聖誕燈架,而家少咗好多喇。」


尖東海旁的一組燈飾,多年來都由黃劍山負責。

銅鑼灣信和的聖誕樹燈飾和新鴻基中心的「三皇來朝」,都是黃劍山的大作。



以前的聖誕、元旦和農曆年,他例牌要留守尖東海旁,直至燈飾熄掉,確保無事無幹才能安心歸家大覺瞓,天寒地凍,都咪話唔辛苦,還要應付不少突發事,「試過見到一串燈着火,要即刻9秒9跑過對面馬路熄消防掣,好危險!因為以前技術冇咁高超,啲燈成日壞,做完一次聖誕燈,真係會虛脫。」這一行,令他從來沒有假期觀念,「你唔好同我講holiday同星期六日,唔關我事,我好細個已習慣,做呢行就預咗,我年初一要開工,食食吓團年飯收到電話就要出去,初二開年,一樣瞓醒又要開工,每年12月31日,我都要喺時代廣場撳蘋果(倒數),搞一個倒數唔係咁簡單,要好小心,你知嗰度幾鬼多人!又要做直播,有乜冬瓜豆腐就會瀨嘢,如果蘋果唔着燈,你話會點?咁緊要你夠唔夠膽交畀伙記做?點解我廿幾年來都堅持自己做倒數?因為我有句格言,『做好一百鋪,唔夠衰一鋪!』我呢世人就賣咗廿幾年青春畀時代廣場。」「做好一百鋪,唔夠衰一鋪」,這句格言,他在訪問中說過不下五次,因為他在1986年英女皇訪港前夕,曾經衰過一鋪,「嗰年我做咗4件燈飾,香格里拉、尖沙咀中心、帝國中心同假日酒店,但一個三號風球,吹走咗,要重新再做,得返兩、三日時間,發生時我已經兩日兩夜冇瞓覺,臨急搵一大隊人幫手做,做咗18個鐘,英女皇上船一剎那,着燈,完成。」這一鋪,令他清袋,蝕了很多錢,「當時本身儲咗三十幾萬,準備買舖做批發行,但輸咗,咁點呀?又再重頭來過囉,一直做到今時今日,都開心架,你問我,叫做有高有低囉。」但樂觀一點想,這一鋪,間接令他有今日的成就,未必是壞事。


麼地里的雪花燈飾,又的確幾靚。

他不時會「微服出巡」,看看途人對燈飾的評價。



和他在尖東遊走了一回,從他的眼神,看得出他很欣賞自己的大作,經過麼地里,很多人駐足欣賞懸掛在帝國中心和尖沙咀中心之間的雪花燈飾,又有大量人set好腳架影相,黃劍山有點得戚地說了一句:「點解咁多人影?因為靚囉!」的確,又真係幾靚的。再走到南洋中心,燈飾是一隻狗圖案,他又爆了一句:「因為下年係狗年,所以整狗,我哋都做到隻狗咁呀!」說話爽快兼語速像機關槍的他,原來幾風趣。很多時他會去尖沙咀碼頭一帶,為的是看看途人舉起相機影哪一個燈飾,「如果有二十個人,有十五個人都影同一個燈飾,就即係好靚囉,聽到人哋讚好靚,你話開唔開心吖?呢種無形嘅開心係用錢買唔到。」同一份工,打了35年,點解可以唔悶?黃劍山說:「係囉?點解?最緊要一件事,就係夠我生存,養到家,兼搵到多餘錢,一日唔係搵三餐,係搵五餐,我又可以做得開心,活在其中,享受其中,樂在其中,係好難得,我可以同你講,我未厭過,仲諗緊出年啲燈點做。」聖誕燈飾每年五月就要開始準備,令黃劍山忙得不可開交,但他仍然很喜歡這節日,「我唔怕聖誕節,仲好開心過聖誕,咁多人陪我睇燈飾過節,絕對係開心嘅,其實我每日都過緊聖誕節架。」


1989年,中港城的聖誕燈飾是米奇老鼠。

1990年,尖沙咀新文華中心的農曆年燈飾。



香港的聖誕燈飾,老老實實,我覺得每年的變化不大,甚至有點老土,仍停留在十幾廿年前的款式,黃劍山說:「其實燈飾係有變化,只係你哋普通人留意唔到,有時係因為大廈業權賣了,預算唔多,所以燈飾演變都唔大。南洋、永安、東海,呢三十幾年都冇乜變過。」近年,尖東海旁看燈飾的人,比從前少得多,氣氛也不及以前濃厚,「其實都多人欣賞,只係喺唔同角度欣賞箒,主要因為商場多咗,食肆又上咗大廈,可以邊食飯邊睇,唔一定要行到海旁,我覺得仍然有聖誕氣氛的,不過分散咗,唔係聚埋一齊嘅氣氛囉。」今年已屆59歲的黃劍山,一同工作的戰友,大部份都並肩作戰了幾十年,但有部份已轉行揸的士、裝修,他卻從沒有想過轉行,「都係嗰句,燈揀我,我揀燈,我應該係同燈合為一體。」育有三名子女的他,大女已碩士畢業,二女都大學畢業,么子則正在英國讀書,等候升大學,他們又可會是爸爸的接班人?「之前我冇諗過退休呢兩個字,但年紀大,會開始諗諗,但唔會係呢兩、三年,如果我啲仔女有興趣,就留畀佢哋囉,冇興趣的話,就有能者居之。」既然未言休,他還有一個小小的目標,「例如整一套音樂配燈飾畀人欣賞,或者在海中心做一組燈飾,冇人做過嘛!我諗應該好過癮。」記者:黃子配攝影:伍慶泉、張志孟



來源: https://hk.lifestyle.appledaily. ... e/20171225/20254657
PermaLink: https://articles.zkiz.com/?id=346233

Next Page

ZKIZ Archives @ 2019