ZKIZ Archives


強勢居屋 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130328/18209388

買居屋有幸有不幸,買天頌苑即使係價錢便宜,因存在先天性缺陷(短樁)及丟空十四年所衍生之漏水諸如此類問題,將來升值會慢之又慢,係典型之「弱勢樓」。地產代理老闆W以前教訓左丁山:「買樓要買強勢樓!」佢講嘅強勢,係指(一)位置好,(二)交通好,(三)建築物料好,(四)發展商商譽好,(五)圖則好。(六)會所設施好。知道嘅,可惜六好強勢樓嘅價錢特別貴,買唔起呢。一啲樓一聲話賣,即刻有人排隊睇樓,當然係強勢樓,一啲樓話要賣喎,三個月都無地產代理帶人上門,就係弱勢樓嘞。舉個例,沙田第一城就係強勢樓,沙田某個地產商開發嘅乜花園物花園就係弱勢樓囉。房委會建造嘅天頌苑當然亦係弱勢樓,弱勢居屋。
居屋之中嘅強勢樓,據講係赤柱之無敵海景居屋,經常有西人家庭出入,有西人住就係強勢樓?西人未必有資格買居屋嘅噃?一位知情人士對左丁山講,赤柱多西人居民,赤柱居屋常有西人居民出入,應該係居屋租客,但居屋點可以租俾西人呀?一位居屋居民話:「補咗地價咪得囉,但亦有業主偷雞嘅,幾難判定邊間居屋補咗地價,邊間居屋係偷雞租出。」
赤柱居屋補完地價之後,如要賣樓,聽講(在SSD、BSD前)市道甚佳,依家就乜樓都歸於沉寂啦。但赤柱公屋就冇咁受歡迎噃,因為赤柱出外交通不便,赤柱西人多、遊客多,物價較貴,公屋居民負擔較重,雖然幾近海灘,海水不能當水飲。當年王䓪鳴做房協主席,大力擁護董特首之八萬五政策,搶赤柱地興建公屋及居屋,曾受反對,但有人講:「公屋居民點解唔可以享受海景?」係啦,邊個敢話唔可以呀,冇飯食,食COVA蛋糕都得,如此「公屋狂熱」,結果就係冇贏家。新近認識一位房協委員,佢就好務實喎:「浸大學生話如果李惠利用作屋地,應該起公屋,唔可以起豪宅,我就認為咁樣做係違反善用社會資源原則,李惠利係珍貴豪宅地皮,賣出去值好多錢,將啲錢用在較便宜土地興建公屋,可以起得更多單位,有益輪候冊上人士!」此乃務實與嗌口號分別,只係怕梁先生政府鍾意嗌口號啫,例如「共圓中國夢」!

PermaLink: https://articles.zkiz.com/?id=54081

Next Page

ZKIZ Archives @ 2019