| ||||||
喺 現金為王嘅今日，坐擁46億盈餘嘅證監會，仲未肯將呢筆「巨資」退還畀市場，仲繼續按佢哋目標將筆錢用喺投資者教育度。噚日，佢哋「第二屆投資智叻闖三關 ─終極爭霸戰」搞咗個頒獎禮，冠亞季軍分別獲現金獎3萬、1萬同5000蚊， 唔單止咁，證監會由今日起仲換過首廣告歌，曲係黎小田32年前作嘅《問我》， 詞就換過晒，大家可以先睹為快：「問我基金價格幾多，問我孖展幾許風波，我如何能夠一一去搞清楚。問我點解會高興，究竟點解要苦楚，要記住投資風險必須要 問過。無論個市有百般對，或者千般錯，投資本來幻變多，面對世界轉變，逆市要如何，投資先要溫功課。明智投資，學『問』為先。」搵首阿媽年代嘅金曲去宣傳 掂唔掂，華華就唔知，但估佢都係因為歌名貼題，唔識投資就問多啲囉。首歌唔係由著名歌星唱，咁唔使得佢幾多錢，證監會傳統一向慳家，按佢哋燒銀紙速度，如 果46億銀用晒嚟做投資者教育計劃，睇怕點都夠用100年。 | ||||||