中環在線：聖誕物價指數不跌反升 李華華
2008-12-03 AppleDaily
仲有廿零日就到聖誕節，男士開始大費周章為至愛選購禮物。花旗PNC財富管理每年都會以聖誕經典愛情金曲《聖誕節12日》（The Twelve Days of Christmas）歌詞所列出嘅禮物，編製「聖誕節物價指數」。雖然經濟不景，但今年照禮物清單每樣買一件，原來比舊年貴8.1%，要2.1萬蚊美金（約16.4萬港銀），拋離3.7%嘅通脹，睇怕今年男士都要大出血。呢首金曲歌詞係講聖誕節12日內向你所愛嘅人送12份禮物，第1日送1隻鷓鴣、第2 日送兩隻班鳩、第3日送3隻母雞，如此類推到第12日就送12個鼓手（見表），如果跟足數量買，更加要8.66萬美金，貴成11%o忝呀。大家聽到呢啲禮物可能覺得好騎呢，但千祈唔好奇怪，其實首歌有幾百年歷史，仲有聖經寓意，啲禮物梗係同現代人送嘅好唔同啦。雖然禮物騎呢，但某程度都反映到物價同工資，好似班鳩比舊年貴38%；請個鼓手助興，工資都升咗3%。不過，唔係樣樣貴咗，今年金價跌，金戒指咪平咗11%囉。想聽吓支歌搵買禮物靈感，華華推介 John Denver同布公仔合唱嘅版本（http://hk.youtube.com）。
《聖誕節12日》禮物清單
1) 隻鷓鴣2) 隻班鳩3) 隻法國母雞4) 隻唱歌雀仔5) 隻金戒指6) 隻生蛋母鵝7) 隻游水天鵝8) 個擠奶女傭9) 個跳舞女士10) 個跳躍男士11) 個風笛手12) 個鼓手