ZKIZ Archives


MSN之死

2012-11-22  NM
 
 

 

曾幾何時,MSN是每個網民必玩的即時通訊軟件,返工第一件事就是登入MSN,直至放工返屋企再連線,全時間全天候開着,同朋友網友同事吹水講是非約飯局,一日冇開MSN,周身唔自在。

不過,正如ICQ被MSN取代,今日的MSN亦已經走到盡頭,被smartphone的即時通訊apps淘汰,明年三月,MSN將會全面停用…… R.I.P。調查結果

MSN R.I.P(60)

微信講秘密

想八盡行內歌手秘密,要玩微信先得。

成日話九十後唔講嘢,淨係識得玩手機,搵六位年輕歌手做訪問,情況又唔係咁差,訪問全程未停過口。講到點揀即時通訊app,六把口異口同聲揀有錄音功能的微信,「唔想成日打字,錄段聲俾人比較快,WhatsApp係有得send錄音,但download時間比較長,微信無論相片同聲音都可以好快打開,唔使等,最緊要係冇得forward亦冇得留底,同其他歌手朋友講秘密,唔驚外洩,安全好多。」講八卦嘢靠微信,不過Karene話傾公事多數用番WhatsApp,「約咗幾多點去邊做嘢,如果得段錄音,聽完好易唔記得,用WhatsApp就可以check番history。返大陸登台,微信速度真係快好多,用WhatsApp有時會load唔到,焗住用番微信。」六個人之中,Jason玩微信最沉迷,「佢有得random搵人傾偈,夜晚悶得滯就會玩一陣,試過搵着個北京女人,同我訴苦話俾男朋友飛,傾到收唔到線,大家唔識對方,但係可以將最秘密嘅心事互訴,感覺其實好得意。」

無聲會議

開會無嘢講,要用WhatsApp先氹到班九十後員工講意見。

八十後Elice,曾參加商台「80後創百萬夢」活動,打入最後四強,成功獲得資金,開發亞太區首個酒店業市場分析系統。今年又推出「撲枱」iPhone app,以低至一折優惠價享用酒店自助餐作招徠,比起一般人眼中的八十後,更有長遠眼光。不過,做了兩年多老闆,Elice坦言仲未適應班九十後員工,「做生意今日唔知聽日事,壓力好大,而且唔係IT出身,要將idea講清楚俾技術部門同事聽,中間要做好多溝通。」以前在大公司打工,Elice為求突出自己,開會時會盡力表現,「到自己做老闆,諗住員工會有同樣心態,點知開會叫大家share意見,竟然全場dead air。」

遷就員工

原來同員工年齡層有關,「公司budgets有限,請嘅大部分係九十後,佢哋其實有好多諗法,例如開頭諗辦法推廣隻app,有人提議過搵bloggers試玩做宣傳,idea唔錯,但就唔鍾意面對面講。後來發覺佢哋成日WhatsApp問我嘢,而且比平時『健談』,唯有轉用WhatsApp問意見,甚至用群組group chat開會。」要特別遷就班員工,點解唔請其他人?「始終寫apps係年輕人生意,要班九十後先了解市場,有諗過請人幫手做番人事管理,不過仲未搵到啱心水嘅人,唯有兼顧住先。」

一雞死一雞鳴

1996年推出的ICQ,憑即時通訊功能瘋魔萬千網民,比起當年流行的chatroom更加直接,更易識到新朋友之餘,一旦加入contact list,上網狀態一睇就知,毋須逐個chatroom搵對方有冇上網,所以好快紅起來。其後微軟推出的MSN經過多次改良,終於憑個人化介面設定例如自改名稱、頭像相片(ICQ當時只得一串號碼),以及更多圖像icons,擊敗ICQ成為主流。MSN最高峰時擁有三億三千萬用戶,不過智能手機興起,流動即時通訊app例如WhatsApp等隨即爆出,即使2010年微軟推出手機版Windows Live Messenger app,由於功能上太多局限,加上WhatsApp已儲落一大堆用戶,微軟始終未能吸回舊客,用戶人數更滑落至一億左右。弱勢已成,所以微軟在十一月初公布,明年三月就會結束Windows Live Messenger服務(中國除外),一代即時通訊王者,終於下台。

投其所好

用WhatsApp同後生仔溝通,乘機輔導佢哋。

「逢星期五我哋都有練舞團,因為每次都喺唔同地方,要約班『仔女』跳街舞,以前要逐個打電話,幾嘥時間。」專門處理青少年個案的社工Catherine,同時負責帶領街舞團,「依家有WhatsApp,就可以用group chat一次過通知佢哋,大家仲可以吹吓水兼討論吓細節。」Catherine入行雖然只得四年,話班後生仔的溝通方式已經有好大改變,「以前接觸佢哋,通常都係打電話或面對面傾偈,但佢哋有時會嫌我哋成日打嚟煩住晒,又或者喺朋友面前怕醜、驚失威,所以唔會同我哋講真話,好難溝通。」為何不用MSN或QQ打聽?「唔使面對面溝通,佢哋會坦白好多,不過,佢哋成日出街蒲,好少時間坐喺電腦前面,冇機會講到嘢。」

打開心扉

近年smartphone加上WhatsApp之類的即時通訊apps興起,Catherine話最幫到手,「依家個個後生仔都袋住smartphone,習慣聚腳時連線打機或者喺WhatsApp度吹水,如果冇部smartphone基本上好難埋到堆。用WhatsApp要接觸佢哋就易好多,一來唔使等佢哋用電腦,發完短訊可以等佢哋得閒先覆;二來又唔怕阻住佢哋玩,同朋友一齊嗰陣都可以暗中放膽同我哋傾偈,由屋企、愛情、甚至性嘅話題,都肯喺文字上講,只要俾啲耐性都可以同佢哋傾得好深入 。」唯一問題是,部手機成日都要上網,電池玩半日就冇電,返工一定要帶埋嚿外置充電池先得。

潮爆伯伯

齋睇外表,曹建明同平時公園撞到的退休阿伯毫無分別,但提起一些高登仔話題,曹伯竟然搭到嘴!「其實係舊時食環署啲同事WhatsApp我知,得閒就會send啲搞笑短片、最hit話題過嚟,好似最近單『$500港女』新聞,都係佢哋forward話我知,所以雖然我冇上高登,都知後生仔講緊乜。」原來曹伯一年前退休後太清閒,除了每個禮拜返耆康會學電腦,仲學玩埋smartphone,「依家已經好少傾電話,同中心嘅同學都係用WhatsApp傾偈,講吓舊時後生啲嘢,仲啱channel!啲仔女唔夠我updateo架,我講啲新話題,佢哋都冇聽過。」

流行危機

由MSN轉用WhatsApp、LINE等即時通訊apps,好多人冇考慮過安全問題,其實用流動裝置上網比用電腦更危險。Patrick指出,「以前MSN收到訊息,見係熟人都會click嚟睇,後來大家中得招多,知道好易係病毒,熟人send嚟嘅link都識得問清楚先開。依家到手機,好多用家都唔熟電腦情況,又或者一心以為手機中毒危險極有限,防範意識就低咗好多,其實黑客已經用假電話號碼send出問題link,內容仲要講到認識嘅朋友換咗電話號碼,唔留神好易中招。其中常用招數包括用網址引導手機打出清除資料嘅指令、下載病毒apps等,更嚴重係安裝spyware,記錄埋你用鍵盤輸入過嘅資料,而家用信用卡上網買apps咁普遍,被人偷咗都未必知!」

自動分類

另外,允許apps使用定位功能,亦是驅使黑客襲擊的主因,「以前用電腦偷資料,未必知你確實位置,而家配合埋定位功能,一睇就知你身處位置。」由於有公司會購買特定地區個人資料作推銷用途,黑客就會更易收集相關資料。

筍盤直擊

用WhatsApp傳樓盤相俾客人,keep住有生意。

機不離身

「增加額外印花稅之後,大陸客少咗好多,但就多咗班香港用家入場。」訪問途中,見Kenneth在樓盤內用手機四圍影相,然後不停篤芒打字,偷偷一望,原來他正用WhatsApp發訊息。「係呀,依家方便好多,以前cold call要打電話同客人形容吓個單位,講到口水乾都未必嚟睇。亦有試過影完相email俾客,但效率奇差,因為唔係個個客都會咁勤力check email,send完多數石沉大海,到佢哋有興趣打返轉頭,個盤都俾其他經紀賣咗啦。」依家好多客都轉用smartphone,「就算上咗年紀嘅區內客,都識得用WhatsApp,cold call就話咁易。」Kenneth更話行家搵食已經有潛規則,「銀包可以唔跟身,但絕對唔可以唔帶smartphone。尤其係依家好多業主封盤,筍盤愈嚟愈少,一有客放盤,就要即刻影相WhatsApp出去,好多準買家都怕執輸,所以好快回覆,試過有客三更半夜叫我send樓盤相佢睇,甚至經WhatsApp同業主傾價,樓都未睇過就傾成生意。」

熱爆chat app

WhatsApp可以send文字、相片及短片外,仲可以將身處位置send俾人,又可以開群組,搞小圈子傾餐飽,幾乎是香港smartphone用家必裝app之一。

LINE比WhatsApp更強,提供類似Skype的即時通話功能,圖案又靚同得意好多,上年曾轟動一時,但後來傳出傳訊息會收SMS費用的流言,搞到人人「盲剷」,未及WhatsApp普遍。

微信功能同LINE幾乎一樣,不過出自內地騰訊之手,近期又搵Big Four代言,香港用家人數持續上升。

Viber以即時通話功能做賣點,是市場上最早提供此功能的chat app,由於用法簡單,仍然有不少用家去外地時用來傾長途電話。*以上chat apps均提供iOS、Android及Windows Phone版本。

商機無限大

開發TalkBox賺大錢,證明通訊apps有市場。

即時通訊apps大多免費下載,稍有噱頭就有大把人試,不過整隻app要請開發人員,又要租龐大伺服器俾用家傳相傳訊息,冇錢收點維皮?其實最緊要做起個勢,自然吸引到投資者入股揼水,甚至收購成間公司,一夜間發財。

引入投資者

如果你有成日試新app,又玩了smartphone兩、三年,應該記得前年曾有一隻叫「TalkBox」的語音即時通訊app,被香港傳媒煲起,搞到人人都爭住用app錄音send俾朋友。上得快跌得亦快,近年已好少香港人玩,Jacqueline表示,雖然香港人少玩,但外國依然有不少用家,而且之前贏得的口碑,已足夠養起公司,「推出一年,已經有外國創投基金見我哋用戶多,覺得有前景入股,揼成千幾萬港幣俾我哋開發。如果做得更好,可能會吸引大公司注意,到時買起成間公司,我哋同創投基金都會賺大錢。」她說今年四月Facebook用十億美元收購相片分享app「Instagram」,就是最好的例子。

facebook

只要在Facebook以「NEXT 3.0」為關鍵詞搜尋,或以手機的「QR code」app掃描,就可以睇到更多新聞同產品情報。


PermaLink: https://articles.zkiz.com/?id=40016

Next Page

ZKIZ Archives @ 2019