📖 ZKIZ Archives

香港失蹤 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120921/18020999
九月十四日本欄講及立法會選舉日，投票站內有職員向選民派三張選票，左丁山話係職員搞錯啫。稿件見報後，有朋友打電話嚟講：「未必係職員搞錯，我都見到一 個選民領到三張選票。」於是向競選大公關C小姐查詢，C小姐瞭解情況後回報：「有可能㗎，如果一位選民同時投（甲）直選區域一票，（乙）超級區議會議員一 票，（丙）佢同時又係功能組別嘅公司投票代表，例如紡織製衣界，佢又可代公司投一票，即係一共有三票囉。」後來收到好幾位讀者來電郵指出，凡公司選民代 表，係可以在投票站攞到三票嘅。
中秋節快到了，C小姐既係大公關，收慣而且送慣中秋禮盒及月餅，對左丁山講：「素知你鍾意食月餅，醒你一個貼士， 黃雙如嘅手造五仁金腿月好好味道，絕無油膉，一百四十九蚊有兩個，你買得起啫，你人在中環，可親自去買。」聽到心都郁，於是呢日吃過午飯就行去大道中陸祐 行地庫，點知冇黃雙如嘅，去咗邊呀？在大道中行咗一輪，搵唔到，最後都係打電話俾秘書V，佢話：「你真係好少幫襯黃雙如，間舖頭搬咗好耐嘞，家喺萬宜大 廈停車場出口對面。」
秘書V話呢間舖比以前細好多，中環租金昂貴，搵到個橫街舖位已算幸運。瑞信集團董事總經理兼亞洲區首席經濟師陶冬博士在佢嘅 財經網站寫食評，驚嘆香港租金太高，香港傳統美食菠蘿油、牛腩麪、奶茶、車仔麪等等店舖都受逼遷，驚呼the real Hong Kong is disappearing。九月十二日在Pato生日宴上，左丁山就坐在陶冬身旁，佢來港居住18年，基本上已經講得掂廣東話，已經係大半個香港人。內地 尖子讀書係幾醒嘅，陶冬在北京外語學院修讀日文，去咗美國居然又可以大轉身，在猶他大學攞到經濟學博士學位，而今係大型投資銀行嘅著名經濟師，轉型之成 功，唔到你唔服。佢人在馬場，與天真許一樣，根本就唔下注，理得我地係咁「捐錢」吖。陶博士話凡事要靠自己分析，睇真啲事物，唔好咁易聽他人貼士，佢講嘅 係股票與經濟大勢。此晚有大國手L在座，佢當日替一位病人做完通波仔手術，病人好心急想出院到馬場拉頭馬，大國手L當然唔批准，病人話俾佢聽是晚一定要買 佢隻馬！大國手好心轉述俾我地聽，於是齊齊落注齊齊搣飛呀！
PermaLink: https://articles.zkiz.com/?id=37754
Next Page
ZKIZ Archives @ 2019