📖 ZKIZ Archives

星期日專題：他們在尖碼的日子

1 : GS(14)@2012-08-12 13:30:15

http://hk.apple.nextmedia.com/news/art/20120812/16597082

[報販麥先生] 報販麥先生
報紙佬：見證66年暴動
人哋叫我報紙佬，唔好睇小呢檔報攤，養活阿爺、阿爸同我三代，記得1966年我仲係細路仔，出嚟幫屋企手，當年天星小輪加價引發大規模暴亂，好多人圍住碼頭抗議，連續兩晚立立亂，結果軍警出動鎮壓，我哋全家都要收檔避亂，呢次係報攤第一次冇開檔，之後10號風球都照常營業，風雨不改。
點解要喺天星碼頭出面搞個露天廣場？天星碼頭成79年歷史，以前火車站、渡海小輪同巴士總站三合一，人來人往，都唔知幾旺，整吓整吓火車站拆咗，家又話要將巴士總站搬走，搞到天星碼頭面目全非，乜嘢集體回憶都冇晒。
家擱置係好事，咁有歷史價值嘅嘢應該保留落嚟，一萬年都唔好變，拆咗將來呻笨就可惜啦。
我雖然係報紙佬，但都知道飲水思源，天星碼頭畀到我嘅唔單止係搵兩餐，仲有好多開心回憶，每逢新年聖誕，碼頭都聚集大批倒數人群，見到佢哋咁開心，我都好受感染，平日旅客暢遊天星，個個都四萬咁口又有禮貌，喺咁嘅環境，正能量都多啲！

雪糕小販朱仲華
雪糕佬：唔使拆即拍掌
一天光晒，巴士總站保得住！我哋賣雪糕嘅，成年只得一個旺季，如果冇埋巴士站，人流減少，生意一定大受影響。
我做小販唔攞綜援，都係想靠雙手自力更生，其實一路走過都唔容易，好多年前，我因為唔鍾意打工，喺旺角做無牌小販，之後申請到小販牌，幾年前轉到尖沙嘴天星碼頭賣雪糕。
有一次，食環署告我阻街，我嬲到爆決定打官司討回公道，好彩天有眼，法官判我勝訴，批評食環署搞大件事。
我以為之後有運行，點知黑開有條路，冇幾耐就傳出天星碼頭要搞露天廣場計劃，巴士總站冇得留低，我聽到都唔知幾擔心，如果計劃上馬，工程一展開，天星碼頭沙塵滾滾，唔趕客就出奇。
我已經有最壞打算，度緊去邊度擺檔，但雪糕車係天星碼頭標誌之一，最多人幫襯，好難再搵到好過呢個地方。
當我知道計劃擱置，即時就拍爛手掌，要知道巴士總站每日帶嚟咁多人流，有啲一見到我檔嘢，就嚟買雪糕，所以巴士站對我好重要，我舉腳贊成佢有得留低。

釣魚郎姜先生
釣魚郎：坑渠底好多寶
拆完皇后碼頭，又想搞天星碼頭，政府係唔係儍㗎？
呢啲咁有特色嘅碼頭，係香港旅遊業嘅寶藏，原汁原味保留最好，特別係天星碼頭，佢嘅好處就係多坑渠直達海面，渠蓋下面蘊藏大量「珍貴資源」。
我唔係吹水，因為渠底陰凉，好多泥鯭魚鍾意匿埋避太陽，我就鍾意釣坑渠魚，一日釣佢20幾條就夠皮，返屋企整多碟餸嘆吓。
呢個坑渠的秘密，係我十幾歲嘅時候，經過天星碼頭無意間見到有人釣坑渠魚發現，當時有人同我講，尖沙嘴天星碼頭由幾條柱壆撐住成個碼頭，地底就係海面，最多魚聚集，自此我就對釣坑渠魚樂此不疲，唔使開工就搭巴士到碼頭釣魚，風雨不改，邊個坑渠多魚，邊個坑渠冇魚我一清二楚。
好多人經過見我坐喺地上，以為我怪怪哋，見到一袋袋泥鯭先知我釣魚，有啲仲好奇影相，天星碼頭就係有呢啲各式各樣唔同嘅嘢先吸引，搞個露天廣場幾宏偉都係假，香港人要嘅就係見慣見熟嘅東西，一動不如一靜，好好保育落嚟仲好過。

---