操盤手札記：尋找有「特息」股票
1 :
GS(14)@2018-03-19 04:37:18美國總統特朗普對關稅立場一時一樣，本欄早前估計，佢係想藉國際貿易秩序改變，令外匯市場改變，重建美元霸主地位。美匯指數已重上90關，港匯卻失守7.84關，逼近金管局需要接貨嘅7.85水平。貿易戰降溫，就業數據靚，美股連隨急升。雖然美國個人投資者協會（AAII）每周調查顯示，睇好比例由37%跌至26%，睇淡則由23%升至28%；不過，散戶睇法往往係反向指標。港股承接外圍升勢，升598點或1.9%，收31594，主板成交增兩成至1,197億元，價量齊升，技術轉強。然而，貿易戰始終硝煙未散，不宜掉以輕心。美國向鋼鋁加徵關稅，又打算向衣服、鞋履、電子消費品出手，相關股份宜避開吓。除咗睇行業，亦要睇美國收入比重，佔比越大，風險越大。利豐（494）、瑞聲（2018）、維珍妮（2199）來自美國嘅收入都高達六成，亦要留神。呢啲時勢，投資組合不妨增持高息股，尤其可能派發特別股息嘅股份。我比較留意電能（006）、建滔化工（148）、中國糧油（606），三者分別將於3月16日、23日、28日公佈業績。摩通估計，電能分拆港燈（2638）後，剩低202億元現金，有機再派特別息。該股現價68.8元，呈三重底突破。建滔化工舊年11月將所持9.61%國泰（293）賣晒畀卡塔爾航空，套現51.62億元，賺8億元；舊年12月又將深圳市南山區商用物業項目49%賣畀世茂（813），作價32億元人民幣，除稅前收益17.77億元人民幣（約22.35億港元）。公司1月中已發盈喜，預計多賺超過六成。該股現價41元，逼近50天線。至於中國糧油，舊年10月向母公司中糧集團出售生物燃料及生化業務，作價85.79億元，賺10.9億元，已表明將派特別息0.2至0.3元。公司1月初已發盈喜，預計多賺逾倍。該股現價3.48元，呈區域突破。割柑人本欄逢周二刊出
來源:
https://hk.finance.appledaily.co ... e/20180313/20330472