ZKIZ Archives


財經評論:銀行員工按揭利弊

1 : GS(14)@2018-01-15 03:21:50

香港地買樓要靠父幹,銀行職員可能更加幸福,事關銀行員工按揭計劃低息之餘,只要過到供款佔入息比率,按揭成數將不受限於金管局限制,甚至可以借足十成按揭上會。買樓無難度,銀行直頭等於再生父母。先講銀行Staff Mortgage有幾筍,銀行為挽留人才,會為職員提供高成數按揭出首期,比如渣打最高可做9成,匯豐、恒生甚至有10成,而且貸款額上限不低,前者據聞達2千萬,後者最多可借月薪120倍。舉例匯恒行政見習生(MT)做幾年升到月薪4萬,唔貪心借400萬上車,仍然輕鬆過到壓測,唔使勞煩財爺提供按揭保險。而且銀行職員按揭利率遠較市價低,目前正常實際按息為2.15厘,但有大行職員按息可低至H+0.8厘,實際按息僅約1.8厘。以貸款額400萬元為例,分25年還款,一般買家月供需17,248元;但若買家為銀行職員,每月供款降至16,567元,全期利息慳逾20萬元。不過,世界上並沒免費午餐,再生父母講到尾都唔係親生。如果銀行職員採用高成數按揭入市,只要樓價輕輕下跌,已經成為負資產。雖然只要收入穩定,銀行不會向員工「call loan」,但潛台詞則是員工繼續乖乖打工,簽嘅唔單止係樓契,仲係賣身契。想贖身?唔係唔得,但離職後按息、按揭成數就會回復正常市價及規定,除非跳槽至福利相若的銀行,否則轉行就要有心理準備一次過補回按揭差額。記者:陳洛嘉



來源: https://hk.finance.appledaily.co ... e/20180110/20270299
PermaLink: https://articles.zkiz.com/?id=346781

Next Page

ZKIZ Archives @ 2019