ZKIZ Archives


職場慧眼:Last minute老闆

1 : GS(14)@2017-09-17 12:51:02

「Son媽,我未做過老闆真係好想好想知究竟做老闆嘅係乜嘢心態。係唔係佢哋覺得我哋冇嘢做得閒得滯,定係覺得請我哋返嚟用得唔夠盡會蝕底畀我哋,所以係要玩到我哋殘先至安樂?日日臨放工先至搞新嘢出嚟叫齊所有人開會,次次都係講埋啲無謂嘢,就係你講嗰啲領導人發表講話。一早約好又唔早啲同我哋講,係要臨時臨急朝頭早六、七點鐘突然send個message嚟要乜要物,又要準備乜嘢乜嘢陪佢九點鐘去見客。咁樣趕頭趕命做出嚟嘅嘢都唔慌好啦,所以次次俾佢鬧到狗血淋頭,根本就係搵我哋嚟發洩。唔知係唔係我黑仔,定係老闆個個都係咁上下?」隔住個mon都感覺到你的憤怒怨氣,相信你都應該忍了好一段日子。年輕人,這正正就是問題所在!我說過無數咁多次揀工不如揀老闆,你的老闆如何你的日子定必如何。像你老闆般五時花六時變,令員工疲於奔命的老闆絕不罕見。我不知道你做的是甚麼行業,不過你老闆的樣樣事事last minute,不一定是你認為的為了玩殘員工。只是今時今日科技不斷創新資訊不斷更新市場瞬息萬變,不管做的是甚麼生意,以不變應萬變是坐以待斃。不過老闆想點就點完全不顧懶理員工下屬感受,職場的確很常見。實在是百貨有百客,甲之熊掌乙之砒霜,套用打工仔面對不公不快不合理最愛用來自嘲的那一句口頭禪「人工包埋吖嘛!」自己條數自己計,值得不值得,關鍵在於從中除了忍讓受氣,過程中有沒有你學習的成長的空間及價值。如果你認定揀錯老闆揀錯工,你的選擇竟然是繼續忍而不是搵工跳槽,當中必定有原因。不對我坦白冇問題,但你一定要對自己坦白。張慧敏




來源: http://hk.apple.nextmedia.com/financeestate/art/20170906/20143927
職場 慧眼 Last minute 老闆
PermaLink: https://articles.zkiz.com/?id=340927


ZKIZ Archives @ 2019