ZKIZ Archives


零售英語 apps 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120519/16349599
泰國 A自曼谷回港探父母,搵埋人力資源專家 T(專搞培訓課程,訓練零售界前線人員講英語)一齊,與左丁山到上海總會吃午飯。
人力 T首先講樓市,關心梁特首上台後,樓市會升還是跌,呢個問題最近非常熱門,地產代理專家王文彥研讀梁振英政綱、兩年來關於地產嘅言論文章,得出嘅結論就係將來會增建居屋夾屋公屋,無時間或足夠土地兼顧大單位(俗稱豪宅),於是預測好簡單,六七百呎以下嘅樓宇會受到壓力,千呎以上所謂「豪宅」嘅價格由於供應少,繼續堅挺。人力 T好幾年前賣咗一個陽明山莊單位之後,買入灣仔臨海區一個千零呎住宅,於是感覺良好,唔怕「梁風」吹襲樓市。
泰國 A多才多藝,在曼谷管理高級「服務式住宅」,在1999年至2000年間與朋友設計網站,曾有創投基金有意入股,可惜傾傾吓因文件延誤,阻延交易,竟然等到科網股爆破,一切告吹。呢次佢原來義務為人力 T做「科技監製」,將佢地出版嘅兩本零售業英語應對書本,變成 iPhone apps,試用版免費,足本就賣美元兩個九毫九,咦,係一條財路噃,但人力 T講,試用版已有免費下載七萬幾個,但願意付款買入足本者,仍是少數,咁嘅情況,不足為奇,左丁山自己往往都係下載 apps試用版本啫。
將印刷本變為 apps,是否好容易?非也,人力 T先要搵專業程式人來寫程式,但設計圖片、互動、錄音、發音方面,就由泰國 A提供大量意見,花掉不少時間,書內每一句英文嘅發音,由母語人士在錄音室錄製,並非想像中咁容易,計計埋埋,成本亦有相當,故此人力 T話:「我睇你專欄講電子教科書,好有同感,我地本小書變成 apps都要用不少心思,你話將一本物理學課本變成互動嘅電子教科書,足以誘發學生閱讀興趣嘅話,加插一些圖片動畫,要有多大成本呢?」問佢最厭煩係乜,佢話當然係版權啦,每張圖片都要研究清楚有冇版權,唔清楚就自己搵專業攝影師去拍照,又係成本啫,可嘆嘅係,孫公與陳副局長好似總唔明白教科書版權之複雜性,一切以為好容易。
PermaLink: https://articles.zkiz.com/?id=33687

Next Page

ZKIZ Archives @ 2019