【精品家居】公屋大改造 花26萬變靚
1 :
GS(14)@2017-06-10 13:29:00■客廳大櫃以白色、深淺木及灰鏡的組合，增加光亮度，不因無窗感覺昏暗。
公屋交樓標準數十年如一日，例牌簡陋清水樓狀態，花錢裝修自置家電才可住得安穩，部份人甚至一住十多廿年或更長的時間。今次單位租戶雖然明知不屬於自己物業，仍一心抱着安享晚年的想法，對自己對家人好一點，長遠住得舒服，由幾乎「百冇」狀態，新鋪地磚、造櫃造特色牆，從無間隔劃出兩間睡房，廚廁亦執靚，花費26萬元在所不惜。記者：溫潤潔攝影：黃文邦
■公屋原裝廳房無間隔牆，交樓如清水房。
回帶裝修前，牆身及水泥地粗糙不平，需要造批盪、油漆及鋪磚等，新建兩房需增設燈掣，改造廚房拉過水電位，連雜項開支近11萬元，佔總數金額逾四成。搞好基本工程後，輪到木工及訂造傢俬共約15萬元，比例近六成，好處因應現場尺寸度身造，想幾大幾細都得，還可以在款式、選材及用色方面，完全滿足喜好要求。
客飯廳的訂造傢俬最巨型，雲集高櫃、矮櫃、層架及神櫃在內，但大得來都要有「唞氣位」，運用白色焗油、深淺木及灰鏡的組合，增加層次感及光亮度，不覺間完兩間房，客飯廳無窗昏暗。相同物料也應用於兩房入口及間隔牆，設計上有變奏，建構大方塊圖案鑲小巧粒狀閃石馬賽克，成為特色牆，「家」添創意。整體效果要理想，講求實用與裝飾外，細心無甩漏同樣重要。例子有主人房門造24吋闊，比起標準27吋減少3吋，精算借來丁點地方，恰好予睡房通道兩旁造5呎床及通頂衣櫃，兩個人瞓得鬆動，又夠位放衫褲。
■高櫃頂天立地，加層架「唞氣位」，以及灰鏡反映空間，消減壓迫感。
■新造神櫃以摩登設計，鋪砌玻璃馬賽克，擺脫傳統土氣。
■主人房門後剛好夠位造通頂衣櫃，提供充足貯物量。
■房間間隔牆連入口，建構方圖案鑲閃石馬賽克，形成點線面別緻的特色牆，令人想看多幾眼。
■主人房門亦鋪馬賽克，內外呼應，互相輝映。
■女兒房隱藏門頂部造隱藏櫃，具整齊美。
■女兒房衣櫃加入幾何圖案，視覺上有焦點。
■女兒房床頭造層架修正凹位，望落工整，又可予瑣碎物品有容身處，一舉兩得。
■梳妝枱前方其實是主人房衣櫃背面，以凹凸斜線美化，不怕面壁乏味。
女兒房屬長形間隔，窗前只需要造一張單人床，房內有更多空間造一個大衣櫃，櫃門以白色為主，消減笨重感，拼鑲一幅斜形灰鏡，當全身鏡用，照一照穿得滿意才去街。由於房內空間偏細，衣櫃對面只能造小型梳妝枱，以保持通道暢通。梳妝枱前不想淨白太悶，以凹凸斜線美化，拼湊幾何圖案，呼應衣櫃。
■設計師Ming Leung
歡迎讀者提供單位拍攝及介紹，請將資料傳真23703886或電郵mailto:
[email protected]
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170609/20049124