【add時尚】周秀娜 半熟女宣言
1 :
GS(14)@2017-04-06 07:41:41Blumarine刺繡紗裙Giuseppe Zanotti粉紅高踭鞋
年齡是女人的秘密，尤其去到三字頭關卡，女人更特別敏感。周秀娜（Chrissie）於去年踏入三十接拍了電影《29+1》，戲裏戲外體會這個年紀的微妙轉變，形容自己算有少少經歷，正值半熟狀態，向來於工作上捱得又拚命的她卻不禁撒起嬌，「我唔明白點解大家覺得30歲就唔需要人錫呀。」所以話無論女人幾多歲，也是樂於被寵的，你懂的。造型、撰文：趙潔恆攝影：郭賢興化妝：Circle Cheung of ndnco.co髮型：Amber Tse of Queens Private i由經典舞台劇改編拍成電影《29+1》，周秀娜飾演主角林若君是個能幹獨立的白領，堅強個性與Chrissie自己幾分相像，但當中有很多釋放情緒的戲份，卻令她面臨崩潰，「有好多發洩位，但我份人係內斂啲，導演要我再畀多啲力出盡力，好似有場要我喊，一roll機我對住離遠棵樹不斷大嗌同喊，連攝影師都話再唔嗌cut佢對手都會斷。」Chrissie拍攝此片亦發現自己一大弱點，「導演捉我嘅咬字，原來我有好多懶音，每次喺片場，我每講三句對白起碼NG二十幾次，係basic。因為第一次涉及咁多獨白，又要對住觀眾講，所以會執好多情緒、表情，不斷NG真係令我好多挫敗。」
Pierre Balmain條紋外套牛仔褲（Rue Madame）
Alice McCall白色背心La Boutique流蘇長褲
■周秀娜在新片《29+1》中演繹大量獨白與情感起伏的戲份，是很具挑戰性的一次演出。
感情學黎明
女人面對30歲，可能有很多外在與內在的愁緒，Chrissie說她的感覺來得遲，慢慢才逐點發現轉變，「有句對白係『其實30歲有乜好驚？』但個語氣係驚同唔驚之間，自己都唔肯定。最大感受係生活上，有朋友已經生咗BB，有啲話題你真係join唔到。」她身邊的同事也越來越年輕，更意識到自己真的升呢了，「突然間身邊的同事有20歲、19歲，佢哋做錯嘢都會原諒，因為佢哋年輕。但係我唔明呀，如果20去到29歲都可以俾人錫，我唔明白點解30歲就唔可以，可能因為大家都覺得你成熟喇。」去到某個年紀，另一個最怕被親友問到的當然是：「你拍拖、結婚未？」Chrissie坦言媽咪都有追問過，「但係學黎明話齋：『感情嘅嘢，同見鬼一樣，都係要講緣份嘅！』我以前都會諗27歲要結婚跟住生BB，咁我40歲就係好後生嘅媽咪。?家發現冇得計劃，未有一個人令我想改變現狀。」單身一人有時都會感到孤獨，「有時難頂都會想喊，想隨時有人分享開心唔開心。但可能一個人又習慣咗，有乜事一個人解決。」女人最需要的安全感，Chrissie也不假外求，「我覺得安全感係可以自給自足，可以控制喺自己手。我諗拍拖同結婚，如果兩個人生活，但我唔工作，我就會依賴嗰個人，我驚我嘅世界就只有佢，可能我嘅生活，我想要嘅嘢，我想去邊度旅行、想買乜嘢、想食乜嘢，都要因為有呢個人我先可以擁有，咁樣畀唔到我安全感。我覺得事業同工作帶畀我嘅除咗快樂、成就感之外，亦令我有安全感。」
買樓靠緣份
最近被拍到睇將軍澳新樓盤，做業主可能最有安全感？Chrissie說：「只係去睇吓樓盤，仲未落實買，其實早年都同家人合資買咗個單位畀父母安居。」香港人視上車為目標，Chrissie對置業都有一套見解，「有時買樓都睇緣份，又冇話有乜嘢心得，睇樓都係我興趣，睇多啲唔同樓盤了解多啲，都係合眼緣量力而為啦。無論買樓唔買樓，衣食住行係基本所需。而買樓就係『齊家』嘅想法，我較看重係一家人開開心心，除咗工作上嘅目標，同屋企人開開心心都係我人生目標之一，呢件事又唔係單單買樓就能夠達成。」
■（右起）周秀娜首次接演古裝劇，與胡定欣和劉心悠鬥演技。資料圖片
難倒古美人
周秀娜過往主力拍電影，今年首次接拍無綫重頭宮廷劇《深宮計》，原來Chrissie是古裝劇迷，煲過不少大熱劇集，「我都睇好多喎，《金枝慾孽》、《武媚娘傳奇》，仲有《甄嬛傳》，要追成七十幾集，我好鍾意孫儷，睇埋佢另外嗰套《羋月傳》。」今次也是她破天荒演古裝角色，「之前有人話我冇古典味，我又拍開時尚感重嘅角色，今次應該冇人想像到會點，都想挑戰吓自己。」近日Chrissie已投入拍攝工作，「劇組對戲服造型、宮廷禮儀都有相當要求，開拍呢段時間都逐漸適應宮廷古裝；宮廷式對白對我嚟講都確實有難度，都花咗好多時間記對白，以免影響進度，呢排跟同事對答都刻意修飾用字，真係變到『敏於事，慎於言』！」更多精采時尚內容，盡在
http://add.appledaily.com。
來源:
http://hk.apple.nextmedia.com/entertainment/art/20170406/19980924