ZKIZ Archives


親手打造另類形象出道張叔平難得達明敢言

1 : GS(14)@2017-02-26 13:24:07

■達明一派自八十年代崛起,以前衞形象見稱。資料圖片



【蘋果專訪】當年長髮飄飄的黃耀明和箭豬頭的劉以達組成達明一派,脫俗唯美的形象原來出自一代美指張叔平之手,大師級的阿叔為甚麼肯出手助初出道的達明?之後更幫他們打造多張黑膠碟封套?日前阿叔接受電話專訪解謎團:「係俞琤介紹我識,話有兩個後生仔出碟,我見吓佢哋,幾fresh,嗰時樂壇未有長頭髮,我叫黃耀明留長,叫劉以達剪短,咁樣開始囉。」



張叔平

■張叔平當年為達明一派塑造一長一短的髮型,形象鮮明。資料圖片

■黃耀明為少數肯為社會發聲的藝人。


似學生純潔

經過阿叔的魔術手,達明早期形象有不吃人間煙火感覺,阿叔說:「因為覺得佢哋好新鮮,好似學生,未經過污染好乾淨,所以影第一張《石頭記》,覺得黑白好襯佢哋,影完好開心,捉到呢個感覺。」原來阿叔不但為達明封套做美指,更試過親手為兩人化妝整頭,他說:「我覺得佢哋咁另類音樂嘅人,不如簡單啲去做,唔使咁複雜咁多人做一張相,通常自己搞掂,我又係冇耐性嘅人,自己諗好咗係點影,化妝整頭着衫好快,通常兩三個鐘頭搞掂,大家好舒服,傾下偈就影咗。」



■阿叔對達明一派的第一印象是未經污染,就如學生般純潔。

■阿叔為達明設計了這麼多個唱片封面,最喜歡的就是《石頭記》。


灰色作代表

問幫達明塑造形象,對他們音樂有否影響?阿叔說:「其實我畀佢哋啲音樂影響我做佢哋嘅形象,令我可以放開去做,因為佢哋啲音樂好另類,歌詞好反映社會現象,我唔覺得好大膽,我覺得應該有人咁做,我好怕成日聽到情情愛愛嘅歌。我幫佢哋拍過MV《忘記他是她》,我幾鍾意呢隻,因為詞寫得好好。」問到覺得達明最靚是哪方面?阿叔說:「係對世界咁敏感,呢樣好難得,佢哋唔係睇唔到嘢嘅人,各種人同社會嘅問題,佢哋都關心。」香港好在有達明?阿叔笑說:「有佢哋真係唔錯,你話之後有幾多達明?佢哋有自己好強烈睇法,對音樂對世界都有好強烈睇法,真係好少有。」如果用一隻顏色形容達明,阿叔會揀:「灰色,雖然兩個唔同嘅人,但兩個夾得埋,灰色好中間好乾淨,希望佢哋繼續做應該要做嘅嘢。」撰文:余燕儀


■張叔平日前接受蘋果日報訪問,大談與達明一派之間的小故事。

■明哥達哥指當年影相大多沒有化妝整頭,若然有需要都是阿叔親手做的。

■阿叔最後想跟達明說:「呢個世界轉來轉去,今日係負聽日係正,咁有咩關係?繼續你們的音樂,繼續做你們應做的事情啦!」



來源: http://hk.apple.nextmedia.com/entertainment/art/20170226/19940261
PermaLink: https://articles.zkiz.com/?id=327141

Next Page

ZKIZ Archives @ 2019