【馮仁昭四圍超】銀幕初吻頂硬上王思敏真咀林耀聲
1 :
GS(14)@2016-09-01 06:24:25■王思敏話導演陳志發（右）指唔可以借位，所以頂硬上同林耀聲錫錫。
【熱血點五步】現正上映嘅電影《點五步》入面，男主角林耀聲有位暗戀對象，佢個名叫王思敏（Sadie），今年20歲。Sadie日前接受本報專訪時話13歲隨父母由內地嚟香港定居，外表斯文但其實性格男仔頭，而且熱愛打遊戲機，一度打到入港隊。問佢點解會接拍《點五步》呢部戲？Sadie話好巧合：「嗰時啱啱考完DSE，喺學校附近行行吓，有人突然問我有冇興趣拍戲，就咁我就去咗面試，仲俾佢哋揀中咗。」
■林耀聲喺戲入面除咗棒球技術了得之外，仲暗戀王思敏。劇照
■王思敏日前受訪時話7年前嚟香港唔識廣東話，好彩有一班同學幫忙。
戲中冇對白
不過，Sadie喺戲入面一句對白都冇，但就要獻出銀幕初吻畀林耀聲，有冇覺得好唔抵？Sadie笑住話：「問過導演可唔可以借位，佢話唔可以，惟有頂硬上啦！」問係咪林耀聲靚仔，所以唔介意錫錫？佢即刻否認：「唔係呀，咁拍戲吖嘛，而且都唔係好激嗰種。」近年中港矛盾加深，甚至爆發仇恨情緒，Sadie就話過去7年都好開心，身邊嘅人都對佢好好：「我初初嚟一句廣東話都唔識，同學好幫我，最後我由聽唔明到聽得明晒，好開心。」Sadie話當年打網上遊戲機都試過有人講難聽說話，但佢唔會介意。場地提供：學園祭撰文：馮仁昭
來源:
http://hk.apple.nextmedia.com/entertainment/art/20160901/19755768