自家創作涉抄襲潮牌 馬天佑：時裝嘅嘢好主觀
1 :
GS(14)@2016-12-31 10:18:07今年28歲嘅馬天佑，係林峰老死、千語BB閨蜜，亦係近年冒起嘅星級形象指導，最近佢仲踩過界，殺入樂壇做歌手，又開自家品牌賣埋衫，瓣數多多。不過人怕出名，有讀者向《蘋果》報料，話佢嘅品牌「SUGAR005」設計，有抄襲Vetements，以及G-Dragon個人品牌PEACEMINUSONE之嫌。《蘋果》聯絡過馬天佑，佢就話：「我自己的確好留意呢兩個牌子（自己都有買）。但時裝嘅嘢好主觀，好似神級街牌Fear Of God，開頭都俾人話好似Rick Owens，但係佢做到人人都想擁有，人人都想着，並唔係容易嘅事。」馬天佑又潮流教主上身，舉例話：「今季興長袖oversize tee，Vetements用歌德式設計，代表如Chrome Hearts，再演變成Oversize。我自己覺得每一個設計師都會崇拜某一位設計師，做一個品牌設計固然重要，但亦唔能夠忽略價格定位，尤其係街牌應該係大多數人都負擔得到。」馬天佑話：「好似Supreme一件Tee抄到3、4千蚊，係有大把人買，但我哋o依家係賣300蚊一件tee，希望大部份鍾意品牌嘅粉絲都能夠負擔得起。」
來源:
http://hk.apple.nextmedia.com/entertainment/art/20161231/19882558