【搵銀初哥】漁村仔視一億如無物「我搞教育唔駛理吳克儉」
1 :
GS(14)@2016-11-13 11:28:42「點解investment pitching好似啲佳麗，然後求個皇帝，你揀我啦。」今年只有31歲的盧炳棠（Tommie），去年成立初創Speaking Textbook，希望發揮影像潛能，令學生在家睇片當補習，向補習名師宣戰。值得注意的是，Tommie今次第三次投身教育生意，「我想建立一個Ecosystem，係可以自給自足，唔使睇投資者面色。」
Speaking Textbook的生意模式，簡單一句，就是聘請退休老師、來自法律系、教育系等大學生，將坊間教科書每一個概念、每一條題目的解說拍成影片。然後將影片庫以月費100元售予用戶。「既然你去補習社都係睇片，咁點解唔喺屋企睇？我希望我哋可以用現代嘅手法去拍片，例如訪問街邊魚蛋佬，從中睇到經濟學理論。」你可能會問，Tommie憑咩去教人教書？如果你數數他擁有的沙紙，你就會明白。皇仁書院畢業、然後負笈美國UCLA（加州大學洛杉磯分校）讀完大學，主修的數學及經濟更以全級第一名畢業，繼而到英國LSE（倫敦政治經濟學院）修讀經濟學博士。你以為他天生至尖子？如果你與他講多兩句，他會告訴你幾個令人震驚的真相。西貢布袋澳漁村長大的他，小時出海多過讀書：「我初中成日全級考尾幾。」、「中學我最低分就係數學同經濟，會考之後我諗住一世都唔掂數學。」今日學有所成的轉捩點，來自中六時課餘睇經濟學大師穆罕默德•尤納斯（Muhammad Yunus）著作《Banker for the Poor》開竅，令他明白「無人係有嘢會學唔識，只係你未遇到一個啟蒙老師。啟蒙到你嘅，可以係真人，可以係一本書，甚至一條片。」自己有經歷，加上於倫敦讀書時瘋狂幫人補習，令他掌握教學竅門。他坦言，曾有不少投資者接觸，希望收購Speaking Textbook，甚至有內地基金出價1億元，不過一一被Tommie拒絕。他表示，曾經與一名投行銀行家洽商合作，「我喺太古廣場同佢講到鬧交，原來佢係出版社顧問，佢話我做嘅嘢，佢掟少少錢都做到啦。咁我話又唔見你做？」Tommie又以Google投資Uber作反擊，「Google要抄Uber唔難呀，但佢都投資，係真係信Uber有自己DNA，我哋相信，我哋公司嘅DNA係複製唔到。」
Tommie表示，除非找到認同他們理念的投資者，否則Speaking Textbook不會賣。目前項目投資額已過千萬元，至於資金來源，他自有一套「搵錢」哲學。Tommie於2011年回港後，先後成立真人補習社及自設筆記網上補習平台Prologue，兩公司盈利均會作為Speaking Textbook資金來源，三間企業互相支撐，自給自足。目標2017年，Speaking Textbook有10萬名付費用戶，每個月1000萬收入，「到時就算我要入大陸市場，我都係有格調咁入，唔使求人。」被問到如果見到教育局長吳克儉，他會有何反應，「可能未必會同佢講Ｄ咩，因為你明知佢冇乜用，喺香港暫時最民主係D咩，已經唔係個選舉制度，最民主既依然係市場主導，如果我地真係做得好，我覺得我地學生每個月俾既補習費，係一人一票俾你。」記者：倪敏慧攝影：陳家文（新加坡、香港部分）、馮鋒（香港部分）編導、剪接：陳家文
來源:
http://hk.apple.nextmedia.com/financeestate/art/20161113/19832287