【add】紅人主場：張智霖 超級愛妻號
1 :
GS(14)@2016-09-17 16:15:54Gucci刺繡西裝褸恤衫
如果有廣告明星好感度調查，張智霖（Chilam）應該是老少通殺型，無論是針對一家大細的月餅，又或是二十多至四十的保養品，他都如斯稱職地代言。大概是因為Chilam的愛妻愛家形象也太入屋了，令他在觀眾網民心中加分再加分。埋位拍攝硬照時的他眉宇間自然一chok，型到零死角，但鏡頭一轉講老婆仔仔，又立即暖男上身：「我最鍾意縱人，縱我老婆，縱阿仔，縱屋企隻狗仔，縱到全部人都軟賴賴。」統籌：林妙萍造型及撰文：趙潔恆攝影：周樂恒化妝：Hetty Kwong髮型：Tommy Leung@ ii hair& nail張智霖和袁詠儀（靚靚）實在是圈中模範夫妻，兩口子近年密密以夫妻檔拍真人騷、出席時尚活動，今年二人與仔仔先後去意大利、馬爾代夫旅行享天倫，在微博上不忘狂晒恩愛場面。月初靚靚生日，公開炫耀Chilam送上的生日禮物──Hermès古董手袋，羨煞港女。
Ports1961栗子色bomber jacket白恤衫黑色運動褲
Burberry珠片間紋毛衣格紋外套黑色長褲黑色sneakers
買手袋馴情
Chilam出手闊綽地買Hermès來哄靚靚不是秘密，究竟買過幾多個卻已成一個謎，「真係計唔到喎，唔知呢，買到個人都馴晒，知唔知有斯德哥爾摩症候群，即係有賊綁架咗啲人，而嗰啲人同個賊傾偈，仲慢慢認同咗個賊，我咪就係個人質囉，買得多就會覺得買袋係啱數嘅。」夫妻倆近年一起拍攝內地真人騷《一路上有你》，奉旨公開地肉麻死人，Chilam稱一切實屬戲劇效果，「好多嘢都硬要我哋去做，唔會咁肉麻囉，不過係工作一部份又無可厚非，我又唔太抗拒。但私底下會唔會成日講住：『我好珍惜你呀！你享吓福喇！』我諗應該係做咗啲嘢好大鑊，先會咁講。」節目中二人曾化老人妝經歷白頭到老，但Chilam覺得一段真正的夫妻關係，不需要想太多怎樣維繫下去，「咪就係兩個人去過生活咋嘛，唔會去諗點樣先可以白頭到老，諗得嚟已經白咗頭又再染番黑啦！」
■Chilam與靚靚於真人騷內曾重演婚禮。
■阿靚是Hermès手袋忠粉，Chilam也樂於買袋氹老婆。
有顆玻璃心
近年港星北上拍真人騷成風，Chilam也收過很多真人騷提案，「都要睇吓乜嘢性質，你話歌唱比賽我諗就未必喇，入咗行已經二十年，要好似新人咁畀人評頭品足，覺得自己好脆弱，有顆玻璃心呀！」幽默自嘲的Chilam反而會考慮一下格鬥類節目，「都有諗過，但係怕自己會猝死，除非有支持可以操練多個月，安全啲，又好睇啲，但臨時拉伕去操練兩三次就去做，咁就好似對唔住觀眾喇。」未見到Chilam挑戰新實況節目，多棲的他最近就有新戲上映，與另一型男古天樂合拍《S風暴》，兩大男神相遇火花四起，「同古仔合作冇鬥型冇扮型，做好自己角色。今次做一個好賭警察，因為賭波而家破人亡，想藉破案而振作。而同佢嘅火花位就係ICAC同警察之間對立，係劇情牽引出衝突。」他同時籌備新專輯，又落實為ViuTV拍攝節目《Hero》，工作不停手，「咁啱自己出新碟，都係講家庭嘅Hero，通常都會有好多歌去歌頌媽媽，但係一講爸爸就已經係《空櫈》，想大家一家人齊齊整整同爸爸講我愛你。」
■Chilam於新片《S風暴》中飾一名嗜賭警察。
■Chilam今年與靚靚仔仔兩度旅行享天倫。
老並不可怕
學45歲的Chilam話齋：「皮膚keep住咁彈唔係冇可能㗎！」但要keep住fit的狀態是一種壓力也是一種blessing，「如果唔keep就會好似後期嘅馬龍白蘭度（Marlon Brando）咁，但我又冇話要戒口，食方面好放任，食得是福嘛，最多跑多啲步。」另一必做運動便是跟老婆去練瑜伽，「練開會成日去，扭來扭去咁係幾好嘅活動，成班朋友跟Almen（黃佩霞）學，成日見面。」金曲高唱叮噹可否不要老，偏偏不老男神Chilam就話老並不可怕，「老係必經階段嚟，老唔可怕，冇記性、好多病就可怕喇，雖然而家都成日唔記得嘢。」
更多精采時尚內容，盡在
http://add.appledaily.com。
來源:
http://hk.apple.nextmedia.com/entertainment/art/20160915/19770762