ZKIZ Archives


魔術師變身party搞手賺$14萬

2010-12-23  NM




小說《哈利波特》世界以外,真正的魔法界原來亦曾起過大災難。○四年美國「蒙面魔術師」及其揭秘節目《解開魔法陣》傳到香港,斷了不少舞台魔術師財路,趙廣軒(Conroy,三十五歲)是其中一人,半死不活捱足三年。

窮唯有變,一變果然通。變不走市場變化,見現今父母愈來愈捨得花錢在子女身上,便將自己變身成party planner,專攻兒童派對市場,成功吸引一班中產豪客父母,一個派對隨時願花上二十萬元。細心拆解,原來這位魔術師懂得利用掩眼法之餘,還有不少湊客秘技。

「今晚嘅最靚公主係邊個?我哋候選名單之中有:Snow White、Cinderella、Beauty同埋壽星女 ……要知結果,就要講多次今晚嘅『魔術法語』先。」台下小朋友大朋友齊聲叫道,「Happy Birthday!」一襲黑布垂落,打扮成公主的六歲壽星女被變出場,與一班小朋友相擁而傻笑。這時一個立體公主蛋糕徐徐推出,伴着生日歌,壽星女開心地 許願吹蠟燭……以上帶魔術元素的派對情節,由主意多多的Conroy度出來。

Conroy是娛樂製作公司「魔術創意」的老闆,專幫人策劃派對,魔術師出身的他,在派對中融入魔術元素自然是他強項。為求設計貼心兼獨一無二,每接到生 意,他都會花一、兩個小時與客人見面交談,了解主角喜好。上週二Conroy應周太邀請來到其位於九龍塘的家中實地視察,並為下月幫她囡囡的生日會做「起 底調查」。從周太口中得知十歲囡囡剛開始學騎馬「一睇到馬就癲咗」,Conroy即時出橋,「囡囡咁鍾意馬,我哋可以將屋企布置成草原,用氣球扭出一隻隻 馬,要所有小朋友都打扮成騎士來參加,我到時都會化身騎士魔術師,用馬鞭代替魔術棒,同囡囡一齊變魔術。」在旁的周太一邊聽一邊笑着點頭,「囡囡到時一定 會好開心!」Conroy還向周太拿了一些囡囡騎馬的照片,準備製作成短片在生日會當日播放,這個生日會,預計花費十八萬元。

「依家啲家長好捨得使錢,小朋友嘅生日會就好似搞一個結婚派對咁誇張,除咗一般嘅遊戲安排,仲要定派對主題、場地布置、回禮禮物等一條龍包辦。」 Conroy憶述,試過有極「疏爽」的父母為滿足女兒的公主夢,花二十萬替她籌辦一場公主生日會,由邀請咭開始照足童話故事中城堡晚會的設計,場地布置成 皇宮,他就做魔法小王子,變長棒改成變蕾絲傘、后冠等,配合玻璃鞋故事尋找公主,讓她隆重出場。還要適當時候休息,讓壽星女換足六套公主衫。Conroy 又試過將生日會現場布置成爆旋陀螺格鬥場,特別訂做一個巨型螺盤,讓壽星仔和一班朋友仔激鬥一番。

表演保持新鮮感

不過,這類十幾廿萬落樓的「大搞作」只佔生意三成,其他派對主要為介乎一萬至數萬元的中價派對。正因如此,簡單的派對Conroy也要帶起熱鬧氣氛,做好 口碑,「小朋友見到魔術表演都會很開心,但不可以單純只是魔術道具示範,要看示範的話,買DVD播就得了,根本不需要請你。」Conroy強調做派對策劃 一定要有創意,尤其熟客增加,不同派對亦會有同一班賓客出現,所以重複使用同一件道具,他也會研究新玩法,避免失去新鮮感。若同一班客人兩個派對日子太接 近,Conroy亦會搵拍檔Henry幫手,由他當魔術師,自己改扮聖誕老人等其他角色,「我哋兩個都可以單獨應付至少四、五十個人的party,變魔 術,扮小丑,扭波波,『張張刀利』,但都要轉下工作客人先唔會悶。」

主人家亦有驚喜

令主角、賓客開心不容有失,但Conroy沒有忘記真正的客人是付款的家長或老闆,所以每次都會留給他們一些驚喜。熟客鄭生的囡囡Athena兩歲開始由 Conroy籌劃生日會,公司年會、春茗亦找Conroy幫忙,至今已經四年。憶起上月底女兒的六歲生日會,鄭生依然興致勃勃,「一來就玩『收買佬』遊 戲,要小朋友鬥快搜集物件,佢一嗌『皮帶』,個女即刻拉咗我條皮帶出嚟,有啲家長條褲鬆少少都要拉住,哈哈哈哈……」鄭生續說:「最抵死係明明講好所有流 程,但最後都會有新嘢玩,舊年公司周年晚會,佢要人用一支又幼又長嘅吸管啜汽水,搞到個個塊面又紅又圓,連平時唔多出聲嘅人都玩到癲晒。」Conroy 稱,那些飲管剛從日本入貨,刻意不告訴鄭生的,「主人家玩得開心,有Surprise,下次先會搵番我。」

此外,一些氣球、糖果、扭蛋等小物資Conroy每次會多預備三倍,因為賓客數目經常會與主人家的預算有出入,「唔係每個家長都咁有經驗,試過有家長話生 日會大約有二、三十個小朋友,結果最後有成六十人,好彩我早有預備,唔會有小朋友嚟到無禮物,最後收到嘅貼士係活動費嘅一倍,客人開心,小朋友開心,我都 好開心。」他表示,坊間派對搞手選擇很多,要客人一次又一次揀自己,就要做到物超所值。

「一條數」收費

Conroy稱,每個派對的利潤約為客人預算額的四至五成,事前先付一半作訂金,派對後再交餘數。外間有公司不須客人落訂會容易「甩底」,又或者開一個超 抵價,再逐部分計錢,這些收費方法都有不足:「我哋做法係要客人一開始告訴我預算有幾多,我就睇餸食飯來安排布置及設計等,設計好個流程及禮物成本就會講 收幾錢,之後就唔會再變。」

目前「魔術創意」近七成生意額來自小朋友生日會,除了靠口碑由熟客家長介紹,很多客人是透過互聯網自行搜尋,「試過落網上廣告撞過板,買咗三百幾個關鍵 字,如magic、創意等,結果兩日唔見咗六萬蚊,但就一單生意都冇,嗰陣真係又急又驚。好彩一個偶然機會,我接觸到一個叫『如何在搜尋引擎全球排第一』 的課程,由『e One Net』公司提供,花五萬元及兩個月時間學成後,我重新優化自己的網站,增加簡潔的資訊及搜尋字眼,成功令網站長期保持在搜尋版面第一版的前五位。」

導演經驗增戲劇感

對生日會籌備如此駕輕就熟,除了自己都是「kidult」外,多年的電視台及廣告公司工作經驗也有莫大幫助。Conroy八歲開始玩魔術,初時亦只當魔術 是玩具,未想過憑此「搵食」。在澳洲畢業回港,修讀導演系的Conroy加入無綫電視戲劇部,「從PA(節目助理)做到導演,鍛鍊了我的協調組織能力,培 養了戲劇感及營造氣氛嘅能力,最重要係因此擁有龐大嘅人際網絡。」

Conroy○三年創業成立「魔術創意」,不料即遇上SARS襲港,很多公開活動都被迫暫停,Conroy為搵食主動聯絡學校開魔術班,並自薦做廣告和電 影的魔術顧問。捱過艱難的初生期,「蒙面魔術師」上電視表演揭密,大型幻象魔術師「無啖好食」,眼見香港小朋友派對風氣日盛,遂決意盡搏一鋪,購入適合小 朋友的小型刀鋸美人和扭蛋等道具,亦增加小丑、米奇、哈利波特和小王子魔法師等表演造型,專攻兒童生日會市場。

每個生日會的賓客都幾乎是潛在客人,賓客在派對上玩得開心,又會自己辦一個,在「客帶客」的情況下,Conroy生意愈做愈有,未來兩個月都已爆滿,預約 最遠一個是明年六月,兩個小時表演平均收費一萬。Conroy忙得開心之餘亦頗理智:「我哋呢行好睇經濟好壞,我而家係好天斬埋落雨柴,嚟緊都要開拓更多 業務,例如開班教女仔變魔術追男仔,幫人度橋求婚等等,實行賺多啲開心錢。」

入行條件

Party Planner

1. 性格開朗、幽默,有耐性聆聽客人要求,注重細節,具備協調及應變能力。

2. 最好有廣告、公關工作,或影視創作經驗,熟悉party策劃的要求和模式。

3. 有潮流觸角,並靈活變通,把流行元素包裝成party主題。

4. 社交網絡廣闊,與不同圈子有良好關係,在協調各單位合作時事半功倍。

開Party貼士

1. 派對前六星期開始準備工作。

2. 確定主題:決定活動及發邀請形式,並選擇當日的佈置及食品。

3. 確定日期和地點:一般安排在週末、假期等較空閒時間,確保家人與好朋友能參興,保證人氣。

4. 確定流程:兒童派對要避免小朋友太疲勞或無聊,小朋友的休息時間亦要考慮在內。

5. 確定嘉賓名單:兒童派對需要小朋友自己或其父母協助下制定。

6. 制定活動內容及時間表:選擇遊戲除了考慮派對主題外,還要考慮活動場地、主角愛好及安全設備等。

開業資料(9/2003)

租金:$28,000*

裝修:$30,000

入貨:$400,000 #

雜費:$100,000

總投資:$558,000

* 灣仔辦公室,三個月按金一個月上期

# 8歲起玩魔術累積的道具

營業資料(11/2010)

營業額:$250,000

租金:$20,000△

人工:$60,000 *

入貨:$20,000

雜費:$10,000

盈利:$140,000

△灣仔辦公室及油塘貨倉

* 包括1個全職,10個兼職,20個臨時工

 


PermaLink: https://articles.zkiz.com/?id=20602

Next Page

ZKIZ Archives @ 2019