魚油一樽 - 方俊傑 捧政治明星做主角 2016年07月29日
1 :
GS(14)@2016-08-07 02:31:14http://www.am730.com.hk/column-323232
書展，一向以來，都是寫真做主角。唔通真係武俠小說咩？今年，最爆是市民朱先生排足七粒鐘，打算搶購雞排妹寫真，仲話要早買早享受。衝到入場，先發現根本無得賣。還有甚麼寫真可買呢？崔碧珈？孫慧雪？姚紫茵？跟昔日周秀娜大戰Angelababy的確是兩個星球的事。更加多人品題的寫真，反而是執相執到認唔出的一本。當事人更親身到場宣傳，熱到中暑。
當然，不能排除部分購入寫真的顧客，其實以為是一本軟件使用手冊，教你如何將一個醜中女執到變美少女。千辛萬苦謊話連篇，也只不過希望將自己變成另一位政客，並非將自己變成電影中的靚靚女主角。都說香港娛樂圈已經沒有明星，明星盡在政壇。我信到十足。如果我是電影公司老闆，除了忙於想盡方法「改良」金像獎推選制度，也會想想不如簽幾個候選議員，趁風頭火勢快快開套戲搶飲頭啖湯。
劇本當然要由少女最愛的作家執筆。逗號奇多又有甚麼問題呢？即是節奏明快，咪適合新一代觀眾群囉。比較麻煩只是演員們讀出每一句對白時，都可能要重複幾次自己個角色的名字。舉例：經典電影《無間道》，劉德華與梁朝偉在天台攤牌，梁朝偉要說：「陳永仁，想，做個，好人，啫。」劉德華便要接：「劉健明，都係，一個，好人，呀！」聽聽下便會習慣，問題不大。
女主角唔使諗，一定係佢，人人爭住執相都要執到似佢，咁都唔係佢？扮演佢阿媽的，可以是那位寫真女皇，也可以是曾經鬥到叮噹馬頭的另一位，寫真女皇可能較相似，以執樣後計，但以近日表現衡量，演技流於表面，我情願選擇曾經話過女主角得個靚字的後者，張力會更大。男主角，假設有兩個，第一個，必揀被針對的那位。整個選舉管理委員會搞咁大場大龍鳳，只為針對一個人。那個人一個轉身，開新專頁擁護基本法，一晚即吸過萬like數，人氣及觀眾緣爆燈。想電影票房好，必定要有呢位先生坐鎮。
另一名男主角，頭痕了。有意參選的，沒幾多個有匹配的知名度。沒份參選的，未夠秤的黃之鋒聲勢大不如前，馮敬恩又分分鐘要入冊。想來想去，可能只有曾鈺成最適合，他做立法會主席，尚且有空寫謎語讓市民估來估去，現在只會更得閒，要他扮演高高在上運籌帷幄的智者，可能會比周潤發更有說服力。劇情講乜？由逗號才子創作，當然係新一代愛情片啦。曾鈺成介入年輕情侶。戲名也想好了：《有一種選戰：叫愛情》。雖然不似《寒戰2》，抽走北京高官有份做幕後黑手，便可票房大收，再上埋大陸市場。但要比起《三人行》的抽象比喻香港生態，更加得到本地街坊們的注目，應該不難。
方俊傑
觀塘長大，壹仔打滾，現職商台，偏愛西片、
西劇、中日韓美女。
利物浦悲慘球迷，
娛樂與感性並重。