孖展融資新潮流 高仁
1 :
GS(14)@2016-08-03 02:02:262016-08-01 HJ
今年3月，細價股孖展斬倉風潮，高仁就推出一連兩集的〈孖展融資套現大法〉及〈孖展融資「搶錢」攻略〉，成功拆解大股東4種不同股票融資攻略。
「高仁指點」話你知，大股東孖展融資有新潮流， 利用人頭一次過抵押3至4隻股票，因投資組合夠分散，較受證券行歡迎；另外，大股東孖展融資被斬倉， 有時會故意不護盤，希望檢便宜貨賺錢。
在披露對話實錄之前，請各位「巴打」與「絲打」重溫人物背景，簡介如下：
戴孤劃──又稱為「戴Sir」，《信報》〈蠱壇辨虛實〉專欄作家，上市公司大股東，經常欺壓小股東；
程更計──本地證券行經紀兼財務顧問，除了招呼散戶之外，亦向上市公司出謀獻計；
李至成──「大孖沙」律師行合夥人之一，最「叻」教導客戶遊走法律灰色地帶。
戴孤劃：話時話，阿程，如果大股東想做孖展融資，而家有乜最新方法呢？
程更計：而家大股東流行用人頭去做，一般會一次過抵押3至4隻股票，即係margin portfolio。由於投資組合夠分散，唔會咁容易造成火燒連環船，所以比較受證券行歡迎。
高 仁：點止呀！大股東揸住友好人士嘅倉，一樣可以攞嚟再抵押，循環再用夠晒環保。最重要係唔好超過5%，一來唔使披露權益，二來chain effect火燒連環船上嚟，就真係「大檸樂」啦！
程更計：如果孖展經紀做得小心嘅話，可能會要求大股東抵押嘅股票，只可用嚟reinvest喺其他高流動性嘅股票，例如藍籌股或二線股。即使佢哋做三成孖展畀你，都唔會火燒連環船，因為把其他股票賣清光之後，應該可以cover到大部分嘅exposure。
李至成：點解大股東咁都願意做呢？
戴孤劃：無他嘅，既然人頭攞住股票都唔可以賣，可以cash out當然最好啦；就算唔得嘅話，起碼批股票可以活用嘛。
高 仁：大家記唔記得我之前講過，沽空機構最鍾意喺上市公司出業績前一至兩個禮拜郁手，令到上市公司隨時要「以一敵五」（詳見2014年6月〈破解Glaucus狙擊旭光策略〉）；但其實，大股東仲有一個致命弱點，就係blackout period（緘默期）前一般係唔可以抵押股票，甚至補孖展都唔得【表】。
程更計：我記得有一個類似嘅case，雖然長港敦信（02229）唔係被沽空機構狙擊，但大股東抵押股票被貸款人私自攞左去沽貨，大股東為保控股權夾硬要喺市場買貨（詳見2015年3月〈長港敦信的奇幻押股旅程〉）。
李至成：其實，大股東咁做唔係咁啱規矩，相信最後要證監會畀返waiver。如果佢真係要在緘默期護盤只有兩個方法，第一係搵朋友或用暗手補倉，第二就係申請喺極端情況下抵押或處置股票。
戴孤劃：之前咪有一隻被斬倉嘅股票，老闆明明有銀在手，偏偏唔護盤任斬孖展，引發小股東恐慌性拋售，老闆低價供股再收貨，洗盤後再嚟過，高手！
程更計：有一次，我遇到一個老闆嘅股票炒到好高，想趁機會派貨出街，攞到錢後再炒上。佢於是叫我幫手搵對沖基金接舊股，折扣仲高達五成，點知佢搵咗另一班人幫手做margin。嗰班人幾日後嚟搵我，話要喺我間行做margin，但我間行孖展跌兩成係要斬倉！頂！
高 仁：OMG（Oh my god）！So stupid！
戴孤劃：高仁始終都係最醒，開創財經拆局文章的先河，以我哋「鐵哥們」飯局對話形式，為讀者輕輕鬆鬆拆解最新財技招數。
高仁：多謝戴Sir讚賞！
本欄逢周一刊出。
歡迎交流上市公司的財技個案及招數，請電郵至
[email protected]。
?
#高仁 #財經拆局 #財圈識真假 - 孖展融資新潮流