ZKIZ Archives


電子書未必啱用 左丁山

2011-12-27  AD

唐英年在造勢大會上講到教育,話:「提升教育開支,由現 時佔 GDP 3.5%增至 4%,減輕家長在教科書、補習的不必要開支。」似係原則性講法,提升教育支出在 GDP嘅比例,當然人人歡迎,香港名義人均 GDP約二十四萬七千元( 2010),零點五個百分點就係 1,235元,七百萬人計就有八十六億四千五百萬元左右,算多不多,算少不少,如果動用新增教育支出之中嘅十億元來資助全港家長買書,就乜嘢教科書售價問 題都冇晒,天下太平,如果唔計現在已接受書簿津貼嘅學生,上述數目會更加降低。教育局局長孫明揚與副局長陳維安與教科書出版商糾纏近三年,造成三輸局面, 教育局無面,書商耗費氣力,家長無得益,真係不知為何,講到尾,就係本地學校無錢買分拆教材、政府不肯承諾撥款買教材、書商唔願蝕本,於是弄至如斯收場, 孫局長之病雖不是由此而起,但為此而費心費力,導致身體更弱,就好值得同情。如果政府唔係將一個小小問題搞大到成為政治問題,教育界一早安樂晒!

 

孫局長話以後會大搞電子教科書,潛台詞係用電子書逐漸消減印刷教科書,等啲印刷書商冇得亂 搞,一了百了。表面睇,電子書係潮流所趨,政治正確到極,但電子書之真正教育作用、效用,是否能為學生成績帶來好處,誰也說不準。美國係電子科技最先進 國,但「紐約時報」曾有報道(九月三日, In Classroom of Future, Stagnant Scores)大力質疑美國電子書與電子教育嘅成效。科技之都矽谷所在地,大把科技專家將佢地嘅子女送入一間叫做 Waldorf嘅反潮流學校,就係在校內完全沒有電腦,禁用 iPad,要學生背誦乘數表,學算術只係用鉛筆與白紙。啲家長係十九世紀人物呀?儍仔呀?唔係噃,家長包括 eBay嘅首席科技總監、蘋果高層、 Google、惠普、雅虎嘅職員,呢啲家長認為學生學習要從基本做起,愈靠電腦電子幫助,學子頭腦愈笨鈍!呢間 Waldorf School位於 Los Altos,地區鄰近 Google、 Apple、 Yahoo總部所在地,教育局不妨派人去考察吓,咪人云亦云,空言電子書取代傳統印刷書,會禍延下一代㗎。 \

  •  
PermaLink: https://articles.zkiz.com/?id=30281

Next Page

ZKIZ Archives @ 2019