笑到最後：未來十年不會餓親的行業
1 :
GS(14)@2016-04-18 12:04:48揀行業，相信係人一生最重要嘅投資之一。本欄預言，未來十年入行做記者，將不會餓親。好多行業，都係第一個做就最好，之後待遇慢慢變差。睇落好好嘅金融業，如果家陣先入行，待遇前景肯定冇十幾年前咁好。另一啲行業，就係已經衰到貼地，再衰就會滅亡，但如果冇滅亡，就會物極必反。其中一個例子就係體育界。過去十幾年艱苦經營，好多從業員都係兼職做運動員。就知行業幾難捱。近一兩年出現曙光，香港足球隊和中國隊，最近又有羽毛球手伍家朗打贏中國「一哥」等等。見底唔代表每名從業員都即刻好搵到食，但至少，體育界個氣勢返咗嚟，香港普遍對運動員尊重多咗，有人尊重，其他收入自然易啲有，如果成為名校入學條件之一，退役後任教將會做到手軟。梁振英喺2014年10月話，香港體育同宗教界冇經濟貢獻嘅時候，似乎就係香港體育界見底之時。佢喺施政報告高唱「一帶一路」之後，「一帶一路」就接連受挫。所謂「我討厭政治」，純粹投資角度，梁振英叫你買乜，你相反做就啱。至於記者行業，亦都係高明過去十年至今嘅職業，歷來都聽過唔少行家怨難撈及唔好叫人入行，點解今日突然咁睇好？因為未來十年，香港將會係輿論界嘅重要戰場，喺中國有錢有地位嘅人，個個都會插隻腳落去傳媒度，記者撰稿始終係行業運作嘅開端，要做傳媒就要請記者，做記者點都唔會餓親。點解香港傳媒過去十年咁慘淡？因為中國太過強大，毋須要利用香港做中間人，自己直接出外，傳媒販賣影響力維生，而香港傳媒影響力唔重要，所以傳媒越做越頹，記者當然難撈。今時唔同往日，A股「暴力救市」係一個轉捩點，證明中國做嘢係亂嚟，着晒西裝最後都扮唔到文明。全世界又想同中國做生意，又唔想血本無歸，好多嘢無可避免要喺尚算有規有矩嘅香港度做，例如香港最原始嘅功能：幫中國發債。當一啲重要事件要喺香港發生，為免交易最後一刻被本地輿論、立法、司法機關推倒，本地輿論就會變得重要，五顏六色嘅資本開始喺香港傳媒界插旗，開業首要條件請記者。所以，記者呢一行，衰運應該已行完，未來十年做呢行唔會餓親。至於點解要用「餓親」呢兩個字？因為搵兩餐冇問題，發達有困難。高明
https://www.facebook.com/bigricetea本欄逢周一刊出
來源:
http://hk.apple.nextmedia.com/financeestate/art/20160418/19575502