孖展融資「搶錢」攻略 高仁
1 :
GS(14)@2016-03-23 15:39:442016-03-18 HJ
上文提要：有一些上市公司大股東的孖展融資，被迫斬倉搞到「一鑊粥」，其實有機會避免。雖然有時候大股東抵押股票融資套取現金都有限制，但卻有破解相關限制的大法。
「高仁指點」話你知，除了向私人銀行或某些券商抵押股票融資之外，上市公司大股東至少還有3個途徑可以「搶錢」（cash out）【表】，包括搵基金「巴打」幫手打救、把紙質股票抵押予銀行融資，以及向Qualified Lenders（認可機構）抵押股票。
抵押紙質股票要防蠱惑
在披露對話實錄之前，請各位「巴打」與「絲打」重溫人物背景，簡介如下：
戴孤劃——又稱為「戴Sir」，《信報》〈蠱壇辨虛實〉專欄作家，上市公司大股東，經常欺壓小股東；
程更計——本地證券行經紀兼財務顧問，除了招呼散戶之外，亦向上市公司出謀獻計；
李至成——「大孖沙」律師行合夥人之一，最叻教導客戶遊走法律灰色地帶。
李至成： 頭先唔記得提醒大家，如果戴Sir把嗰批股票射倉（轉倉）去其他證券行，之後喺證券行沽貨cash out，咁樣做交易使費可能會幾貴，仲要承擔股票買賣價格變動嘅風險。
程更計： 戴Sir每次做親都係大「刁」，呢啲交易使費應該濕濕碎啫。
高 仁： 呢種射倉嘅方法，如果買藍籌股都OK嘅，主要係相信股價變動會冇咁大；但係，如果買中細價股風險就會好大，皆因股價有機會大上大落，高台跳水更加會跌到渣都冇。
李至成： 其實，大股東都可以利用買賣單據同股份轉讓書，把批股份賣畀友好嘅基金「巴打」幫手打救cash out；但就要一早預先安排，證監會可能會check。
戴孤劃： 呢個方法好似比較麻煩喎。如果搵銀行抵押股份融資，唔知又得唔得呢？
李至成： 當然可以。有啲銀行會接受紙質股票做抵押，從而向大股東批出融資貸款。
程更計： 咁做銀行會承擔好高風險喎！因為紙質股票轉做電子股票需時，之後先可以喺二手市場沽貨，中間會有好大time lag。
高 仁： 點止呀！如果大股東蠱惑嘅話，仲可以報失紙質股票，之後向過戶處補領新股票，當中涉及嘅誠信風險可以好高。
李至成： 最近咪有一間上市公司大股東抵押紙票股票融資，貸款人過咗一排攞啲股票去過戶處搞轉名手續，點知過戶處回覆嗰批股票已經失效咗，最終搞到要報警處理。
戴孤劃： Mmm……呢樣似乎係個別大股東操守問題啫。Anyway，我見到大股東抵押股份融資，有時候要做披露，另一個時候又唔使披露，搞到我都矇查查，唔知道究竟要點做先至啱？
押股認可機構毋須披露
李至成： 根據上市規則【小檔案】嘅規定，其實並冇阻止控股股東把股票抵押去取得商業貸款；至於使唔使披露，如果受惠人係Qualified Lenders（認可機構），大股東就可以唔使做抵押登記嘅權益披露，呢一樣嘢相信就唔係咁多人知囉。
程更計： 高仁應該知喎，我記得佢之前講過（詳見2014年12月8日的〈大股東押股借錢蠱惑招〉文章）。
李至成： 因為高仁係人如其名嘅「高人」嘛，所以呢隻馳名燒鵝左髀，真係抵畀你食。
高 仁： 多謝晒！大家過獎啫。
後記：《無間道》都是3年，高仁在《信報》「開壇作法」（撰寫專欄）拆解上市公司財技、蠱惑招數，以至與各位「巴打」輕輕鬆鬆分享飯局對話，已差不多完成第二個3年（第6年）。要給予高仁原動力，各位「巴打」與「絲打」一定要繼續鼎力支持。
本欄逢周一刊出
歡迎交流上市公司的財技個案及招數，請電郵至
[email protected]。
?
#高仁 #財經拆局 #財圈識真假 - 孖展融資「搶錢」攻略