馮仁昭四圍超：Chilam遭池昌旭搶風頭
1 :
GS(14)@2015-03-06 09:06:33
■Chilam話只得八歲嘅囝囝魔童已經開始追女仔。
韓劇《奇皇后》、《Healer》男星池昌旭同張智霖（Chilam）噚晚喺中環出席dunhill晚宴，現場近二百粉絲全部係嚟捧池昌旭場，佢仲被封「韓國理想情人節約會對象」，Chilam好奇一問：「佢幾多歲呀？係咪single？」記者笑問你想做男神？Chilam話：「我有家室，都係以欣賞角度去睇。」
■池昌旭噚晚甫出現，即吸引大批傳媒採訪。
池昌旭想食叉燒包
Chilam話最想同全智賢合作，唔知老婆袁詠儀會唔會呷醋？Chilam話：「我話可能會，但佢話我就唔會，因為佢都係鍾意出色嘅藝人，睇佢咁鍾意我就知。」而囝囝魔童暫時唔識韓流文化，反而鍾意睇閃電俠，不過已經開始追女仔，佢苦笑話：「魔童話有個鍾意咗幾年嘅女仔，但佢得八歲，我覺得自己好快做阿爺。」池昌旭噚日差不多中午十二點抵港，有過百粉絲去接機，又用韓文大叫「oppa」同「我愛你」，池昌旭收禮物兼握手；但期間出現混亂，有人差啲將部手機掂到池昌旭塊臉。晚宴上，池昌旭話好開心有咁多香港粉絲支持，最想食叉燒包，問最想同邊個香港藝人合作？佢識做話：「好多，唔能一一去數。」之前佢上《Running Man》俾李光洙嫌棄，佢話下次再去就會搵金鐘國做拍檔，因對方係自己中學同高中嘅同學，而且又大力贏面高。問佢就快服兵役心情？繙繹代佢拒答，然後就被拉走。撰文：馮仁昭
來源:
http://hk.apple.nextmedia.com/entertainment/art/20150306/19064943