📖 ZKIZ Archives

清湯 Paco 黃高

1 : GS(14)@2015-02-16 17:26:53

[table=100%][td=3,1][table=100%]2015-02-12 NM
[td=3,1]

估不到黃高近日才開火鍋店，那種生張熟李同撈同煲，其實最配合他作風。他倒先搞意大利餐廳。西餐比較靜態。「幾年前我人都靜態啦，直接講就係霉。」霉，指娛樂圈本業；飲食從來只是與朋友夾夾。Paco向我推介牛骨湯底，讚到眉飛色舞，卻order來一鍋滿是芫荽的清水，邊撈邊說：「但我戒牛肉，灑幾粒鹽就夠，哎，唔記得叫連馬蹄都唔使落。」叱風雲的經理人便是如此，一方面很hard sell很colourful，願講真心話時，卻清澈見底。灼熟鴕鳥肉後，Paco教路，豉油也別沾。「年紀大了，醬料有配額，留番食真味道。」他的故事，由三上三落說起。打不死

湯可清，酒仍是要喝的。侍者依照Paco指示，將單一純麥以室溫水考究地1:1稀釋。——你不是獨創了威士忌溝綠茶的飲法嗎？「唏，俾人搵笨，我向公眾道歉。知道更好方法就要改。」錯就要認。離開國際名牌華納公司，創辦正東唱片和金牌經理人，之後遭削權，沉寂數年，現替賭業猛人周焯華主理太陽娛樂，事業如坐過山車。一頭白髮，他坦言憂出來的。「早年要諗好多，一星期內白晒。」黃高一時軍裝look，一時愛執到正。「任職國際公司時，著到乞兒咁都唔怕冇人俾面；到搞正東，外間起初看不起是細公司，我便日日老西，愈唔可以衰俾人睇。」他笑道：「現在做番自己。」這晚，黃高和我不約而同穿皮褸。「飲杯啦！」——六十開外了，怎能每次都保持鬥志？「也是我幸運。搞正東，我引入經理人制度，因為早看通單靠印唱片冇得做。最失意時，我涉足電影，我敢說我係第一個勇於轉型，其他行家通常不熟不做。現在年紀大，但太陽娛樂的IT概念刺激到我。如果不是每一次都創新，我反而未必有咁大動力。」

流水宴

黃高衰不怕認；威，更加要認。但怎說呢？起起落落，拉勻可能正如威士忌溝水般1:1打和，其他著名經理人專攻一兩位巨星較合乎經濟效益，例如小美便不諱言成世幫郭富城已夠。黃高經手的巨星數唔晒，但總是進進出出，何況百足咁多爪，其實幾。「過程過癮嘛。」他攪拌火鍋語帶雙關說：「打邊爐有樣好，anytime歡迎加入，冇話要等齊邊個開席，永遠新鮮熱辣，後來者也不是吃頭尾。「鄭秀文曾經提出，想我專做她一個，我話我喜歡開放式。我喜歡做新人，先不說新人有機會爆出驚喜利潤，行業需要延續，到一天班巨星退休，巨星的經理人同時退休，如何延續下去？我們要對行業作交代。」天下有不散之筵席，方法是流水宴。他團隊台前幕後便有以舊帶新，有離過場又重投（例如許志安）。「飲杯啦，朋友多。」——總有合作不來吧？「目標不同，他要太陽，太陽我都俾到佢，點知佢要宇宙，就冇辦法。」心領神會了。「對我不好的人，我會對他特別好，好到令佢措手不及。以眼還眼，他反而知點做。」——那何以報答真朋友？黃高拍拍胸膛：「講呢度。」

酒醒酒醉

可能不只指心，指胃。吃作為代替品的鴕鳥肉，黃高憶述，第一次戒牛肉是為了昏迷中的陳百強（華納戰友）祈福，那時沒告訴人，Danny一睡不醒，他便食番。「今次始於三年前，知道有咁好機會搞太陽娛樂，我許下心願。鴕鳥肉的味道當然不及牛肉，我不知幾鍾意食牛，正因為鍾意才戒，否則怎稱得上決心？人要give and take的。」——兼營飲食，同正業有何關係？「的確冇乜，除慶功宴。但它可以令客戶知道我細心，一個食都精益求精的人，做生意點會唔用力？所以我酒量不用好，吃亦貴精不貴多。失意那一兩年，我愈不讓人見到飲醉，因為醉貓只會更被睇死。「現在唔怕，飲杯啦。「我從不摸酒杯底簽約，最好邊食早餐邊簽，彼此頭腦清醒，有什麼猶豫可以即刻查清楚。飲酒，應該留番relax、慶祝的晚上，所以我成日話，我黃昏五點講都唔算數。」筆者看錶，就快七點……

老土的事

黃高想談多些電影，談多些娛樂IT化，sorry我比較睇淡，甚至覺得他的鴻圖大計，是賭業附屬品。「太陽城以賭業為主，冇得唔認。但太陽娛樂在兩年內，以最短時間帶起整個集團知名度，這是娛樂事業的長處，永遠有價值。」我更想問的是淡中之淡，音樂。各項年度頒獎禮剛完結，曾經，Paco號稱劈獎專家，幫歌手們爭取獎項縱橫捭闔，面對今時今日大家鬥唔去獎的倒行逆施局面，豈沒一點戚戚然？「天地良心，我不劈獎的，四大天王時期有劈過，幫劉德華，那時劈得有動力，一首金曲能令產品（唱片）由五萬跳升至廿萬；但現在，頒獎禮已喪失此功能，主辦單位自定了遊戲規則。我叫旗下歌手，常規的《勁歌金曲》照上，去爭獎？咁老土。」出身自唱片公司倉務部的黃高，痛心於老本行，加上酒意上湧，愈來愈多真說話。「我仍想延續廣東歌文化，係廣東歌，唔係鳩叫！那種鬥嗌破壞了風氣，鄧麗君去比賽都輸。鄧麗君感動了全球二十億華人，你《我是歌手》再厲害，都係二億。」

並非爛gag

火鍋這晚，我提起第二天會訪問他旗下脫星袁嘉敏（已刊於上期《豪語錄》），黃高說：「放膽傾吧，幾複雜的人都有單純一面。」在說人也像說自己。我咬海鮮餃子，弊，未熟透，心仍是冷！或者，熟透世情如Paco，反而接近《心仍是冷》的境界：看透了冷眼，心早慣沒有說感嘆。冷笑似四散，掩飾我夢裡的燦爛……——梅艷芳、倫永亮

---