這些年，你我一齊捱Grant Loan的日子
1 :
GS(14)@2014-09-07 12:01:33「有錢，真係唔借？」拿著Starbucks tumbler，啜著屋企沖的雀巢即溶咖啡，聽著此起彼落「呢張表點填」，「妖，唔記得帶老竇個id copy......」的聲音，我一個人走在大學校園。「Hey！Michael，你又入咗呢間U？呢個世界真係細......」佢係Jonathan，我嘅中學同學。佢搭住我膞頭，懶熟咁問。我唔係入呢間U，唔通嚟返工咩，縮開你隻手啦！我心諗。「係囉，又會咁橋嘅。」我諗完之後，決定咁答。「聽日截grant loan囉喎，你搞掂晒啲文件未？嘩，未搞真係唔知咁鬼煩！」「你呢個有錢仔都搞grant loan？你住私樓個喎，仲要好似係供斷咗嗰囉喎!」我不經意地問，心裡面希望佢同我講佢老竇生意失敗，連層樓都按埋，仲搬埋去劏房。「Grant唔得，仲有non means loan，依家年息好似一厘多啲，即係借4萬，都係嗰500幾蚊息，借嚟旅行溝女買iPhone6都好吖，有得借，真係唔借？」「有得X，真係唔X？」呢個潮語patent，最早應該係喺高登嗰啲睇囡囡的post到出現，係早排先畀政府惡搞，仲要發揚光大。又即是咁，如果班正苦官真心覺得「有得X，就要X」嘅話，正所謂有得食唔食，影響生殖，佢哋咁濫食法，應該個個都變晒做肚滿腸肥，身體機能衰退，各有各病法的「打壞」。患重病的人，係應該留喺醫院/家中休息，唔應該成日出嚟咁頻撲。「喂，我問你借唔借吖，呆咗咁嘅？」「借？借！唔使還就一定借！」「超，年息1.395厘還唔起咩？！今年我就諗住借盡八萬幾，我睇過啲財經版話，有啲股票好得，嗰價又升得勁，啲息又派得多，冚返借錢啲息之餘，仲有錢落袋....」買？買！唔會跌就一定買！不過，除咗iBond，我真係無聽過其他嘢係賺硬。可能係我孤陋寡聞......****幾年後****讀大學呢四年，我除咗走堂返part time，就係返part time走堂，拍拖呢啲對銀包百害而無一利的事，我一啲興趣都冇。雖然我都試過追校花Jessica、Hazel、思思、Virginia、佩怡......，不過喺佢哋應承之前，我就決定斬纜。身為一隻無雀的腳仔，無謂累到人。四年大學課程，除咗頭一年要屋企人幫手之外，year234，我都係靠自己賺錢交學費，一蚊都無借到。畢業之後，係尖沙嘴搵咗份office工，月薪萬令蚊，基本上一大半畀咗家用、交租，淨返幾千蚊，扣埋搭車食飯，一個月都儲到一千幾百，起碼唔使好似其他同學咁，一畢業就負債。想到呢點，我食住個咸蛋肉餅飯，都覺得甜甜哋。估唔到今日，我又撞返佢，Jonathan。「咦？Michael？西裝骨骨，相睇吖？」「喂，Jonathan，相咩睇，係都唔會喺茶記啦，放lunch嚟食個飯啫。你呢，今日weekday都可以著polo人字拖，你間公司都好open吓喎。」「公咩司，都未開始搵工，啱啱去完grad trip，做嘢？抖多排先啦。」「大安旨意得你，讀U嗰陣好似年年都loan盡嗰喎，借咗有冇二三十萬吖？真係好似嗰陣講嘅咁，炒股賺凸，一次過還晒？！」「......」
Jonathan沉默咗5秒，喺呢5秒我幻想咗好多嗰答案，不外乎都係「輸晒玩晒用晒」，或者係「我覺得自己無可能還得晒」。「......」「唔使擔心嘅，計你借三十幾萬，分十五年還，每個月都係還二千幾三千啫，還得晒嘅......」呢一刻我真係對佢有兩分同情，雖然我知呢個結果係佢自己一手造成。「借嗰啲錢，使嘅使咗，輸嘅輸咗，不過好彩，阿媽用私己幫我一次過還晒，佢話唔想我還得咁辛苦喎。」「......」世上只有媽媽好，最緊要係錢儲到。輪到我，保持咗一陣(不必要嘅)沉默。「今日約咗經紀係呢頭睇新盤，依家樓價咁高，講真，真心覺得買唔過，不過老竇話遲啲可能仲會升，兩萬蚊呎元朗區都要買住先喎，咁佢都話會畀首期供住先咯，有樓，唔通唔要咩。」「係囉，有樓唔通唔要咩......唔同你講啦，我出咗嚟好耐，要返office，走先，再傾啦。」離開前，我偷偷地回頭，望多Jonathan一眼，諗住佢講嘅嗰句「有樓，唔通唔要」，慢慢行返office......歌莉
來源:
http://hk.apple.nextmedia.com/financeestate/art/20140905/18856200