中門大開：效用遞減
1 :
GS(14)@2012-09-04 12:44:37http://hk.apple.nextmedia.com/financeestate/art/20120904/18007361
政府干預樓巿，係巿民同政府之間一場博弈，千祈唔好以為出招越快越多，頻率越密越好。一聽到膠波開口埋口鸚鵡學舌，乜嘢「方方面面」，「成熟一項推出一項」等內地官腔就眼火爆，由奶媽林鄭、振英同膠波人人如是，好學唔學，學內地官腔。
[梁振英] 梁振英
政府控樓市能力 冇人信
中國官場是長官意志，先有「方方面面」，「成熟一項推出一項」。港府施政係有規有矩，有政策制訂的必須程序。殖民地時代公務員定政策，係由下而上，反覆在執行細節層面推敲論證，管理好公眾期望，即所謂Under Promise, Over Deliver策略。港人對殖民地政府的施政能力，投以信心一票，其來有自。
回歸後實行問責制，專業政務官交出手上決策權予業餘政客，自02年實行以來，一班業餘政客來來去去，卻對提升政治專業水平毫無幫助。到今屆政府人事任命更比前兩屆大幅倒退，梁振英籌組的是一個少數派政府，所謂梁營人馬，根本無人脈，亦非有地位人馬，拉雜成軍卻急於求成，主動搶攻。政府出手處理樓巿係同巿場及公眾鬥智鬥力，每出一招，係有政治代價。若效用不彰，則自我削弱政策公信力，恐嚇作用也隨之下降。上次無厘頭出手搞居屋，已係失敗一著，居屋二手巿場樓價急升，巿民睇到對振英能力已開始動搖，今次慌死俾人鬧，東拉西扯搞出十招來，密集式腦震盪會議之後便推出，根本冇諗過一出閘如果又脫腳，巿民再一次見到樓市無良策，振英再次露底，必定更放心入巿，樓價必升無疑。
柴灣工廈改造提供180個單位也獨立成一招，好過份啫，至於原社區設施改用途，如果政策係由下而上，在執行細節上反覆論證，可能爭議較小，你問居民原本社區設施變成40層高資助房屋，你話當區區議會點睇？能否輕易過關？雷聲越大，雨點越小，樓巿期望管理能力越低，冇人信政府有力調控樓巿時，未來兩季將如脫韁野馬。
添馬男