財經CAREFREE - 順叔 順叔自道 (2011年10月31日)
1 :
GS(14)@2011-10-31 22:51:52http://www.am730.com.hk/article.php?article=79270
戲台搭在現實金融世界，個個想搵著數，人人要做演員，講穿咗，有邊個唔係演員？不過講緊台戲做俾乜人睇，股評家又好，講股佬又好，吹水唔抹咀，最多令牛頭角順嫂輸幾餐茶錢；有本事令人以為有料到財星到，結果累成村人一鋪清袋甚至全人類身家大轉移嗰班，先至係真正「財經演員」。上市公司又好投資銀行又好，「財經演員」場場大龍鳳鋪鋪大茶飯，因為劑劑都有散戶做墊屍底的茄哩啡。如果將所有投資者放埋一齊，必定形成一個「常態分布」(Normal Distribution)，最右邊總有一兩個巴菲特賺到盤滿砵滿，最左邊又必定有人輸突輸身家，依家呢個分布又必定有大量面積位於負數，因永遠輸錢人多，賺錢只是非常少數，明白呢個道理，就算做唔到巴菲特，最少唔會輸身家。聽聞陳泉後來在加拿大發咗達，不過當然唔係因為做茄哩啡，而是繼續做老本行搞停車場致富。
財經茄哩啡鍾意「鬥噏」，當然繼續做老本行，繼續八八卦卦指手劃腳吹水唔抹咀，樣樣都講行行皆論的話，唔使問阿桂，唔會篇篇皆精，街坊智慧，只可幫助刺激思維，千祈唔好當係投資建議。呢台戲09年11月首個星期開始上演，咁就兩年，當然要多謝一啲長期支持的朋友，仲有多謝老編容忍，期期包底執咗唔少錯漏，及除審查咗順叔中文原名外，從來冇阿支阿咗唔准呢樣唔好嗰樣，自由度呢家嘢，在今時今日真係非常難得，賣花讚花香，有品，唔係一句宣傳空號。
由今日開始，財經茄哩啡每天上演，之前其實係一個星期一個題目，一拆為二，依家多咗篇幅，亦要頭諗多啲題目，好難再日日上上下下左左右右咁，集中討論一間公司或一個議題，或會多咗東拉西拼風花雪月，各位多多包涵。戲多戲少唔緊要，最緊要「有戲」，人人想做主角，未必個個做得好，選好適合自己角色，可能只是小配角，反而可做一場好戲，財經茄哩啡這台戲，希望大家喜歡收看。