專訪王菲億萬演唱會幕後軍師 超級經理人 陳家瑛
1 :
GS(14)@2011-03-11 21:53:232011-3-5 iM
在台上，王菲復出的歌聲，再一次把萬千粉絲俘虜。一趟中港台的巡迴演唱會，贏盡億萬票房，內地最高門票索價3,999元人民幣（約4,740港元），比香港還要高出逾4倍。
在台下，一直在背後發功的超級經理人陳家瑛成為了全城焦點人物。
看看陳家瑛旗下的藝人，粒粒巨星，有王菲、陳奕迅及陳百強，就知道這個經理人的分量。王菲和陳奕迅都叫她做Katie媽，她以「家庭式」營運「陳家瑛製作公司」，她經手的演唱會無不爆滿。陳家瑛嘴裏形容自己是一個理財白痴，實情她卻是挑通眼眉，憑其幾十年的經驗，有一套「保證不蝕本」的演唱會生意經。
傳說中的陳家瑛，是天王天后身邊響噹噹的超級經理人。向來甚少接受傳媒訪問的她，有一點遙不可觸。
在眼前的陳家瑛，卻是一位母愛滿溢的女強人，強得把王菲及陳奕迅視為自己的仔女，一個人包辦演唱會、接廣告，搵贊助，還不時親手煲燕窩魚翅讓他們進補；強得幾年前患上乳癌，也未有放下工作。向來習慣素顏的她，專誠為了訪問塗上了口紅，跟記者談生意經、談人生、談婚姻、談死亡，親切得令記者惦掛着家裏的母親。
一頭黑髮，梳上齊蔭，衣着入時的她，看不出年屆六十之齡，訪問甫開始先談起王菲的天價演唱會。
暌違了6年的王菲，歌聲再次在香港亞洲國際博覽會響起，全場可容納1.4萬人，比紅館更大，最高票價賣980元，而內地最高票價比香港還要高出幾倍，成都站索價3,999元人民幣（因座位數目較少，門票較貴），黃牛票更被炒至1.2萬元人民幣，而北京及上海站最高票價2,500元人民幣。據內地傳媒報道單是北京和上海的10場演唱會，王菲已吸金6,500萬元人民幣，若計算台灣、香港、及廣州等內地城市巡迴演唱的收入，歌酬勢必破億。
對於阿囡王菲復出的成績理想，陳家瑛心感安慰，又以不同市場分析中港票價的差距，「內地人口多，演唱會對佢哋嚟講係好罕有嘅嘢，唔係成日可以見到歌手真人唱歌，是近十年八年開放了好多，舊時不是成日可以上大陸做Show的，亦覺得是一個好新鮮的群體活動。」
由門票變成送禮佳品
演唱會在內地仍然是新的體驗，成為一種奢侈品之餘，也演變為搶手的送禮佳品，形成一票難求的搶票熱，「香港市場比較成熟，票價較為便宜，是因為香港人已習慣睇演唱會，同日本市場一樣，有幾十年歷史，所以價錢亦比較合理，但演唱會對於內地來說，是一個Luxury Item，近年才興起，就好似王菲細個時，只可以聽到鄧麗君卡式帶，好難才有機會聽到歌星現場真人唱歌。同時，內地公司和機構之間，經常都把演唱會門票作送禮之用，可以說是一個禮品市場，結果愈貴愈搶。」
內地消費力澎湃，王菲大顯吸金神功，反應之熱烈，也出乎陳家瑛所預期，「北京上海2,500元（人民幣）一張門票，在內地不算是甚麼一回事，張學友都係3,000幾，但唔知佢（王菲）真係好可以咁叻，5場都爆晒，甚至有黃牛2,500蚊炒到1萬蚊一張。」
今次演唱會的製作班底都是以香港人為主，音樂總監為梁翹柏，而樂手班底亦有鼓手恭碩良與負責鍵琴的何秉舜等；曾替陳奕迅拍攝音樂會紀錄片的Susie Au，今次亦會替王菲拍攝。王菲今次演出以四季為主題，觀眾入場時可聽到現場播放「四季」配樂，如鳥鳴、雷雨等環境聲效，製作落本認真。
內地開演唱會必備批文
由TVB出身做歡樂今宵監製的陳家瑛，曾加入周梁淑儀開辦的富財製作公司，專門做演唱會，當年做過林子祥、徐小鳳及關正傑等一代紅歌手的演唱會，累積了多年經驗，而北上開發內地市場，還要數八十年代的陳百強演唱會，自此開始認識到中港兩地的文化差異，以及到內地開演唱會的竅門。
提起已去世的陳百強，陳家瑛顯得有一點傷感，眼球一轉，時光倒流20年，初次北上的回憶仍歷歷在目，「上海一向最摩登，八十年代有人請我哋上去做演唱會，係香港第一次有歌手到內地開演唱會，去到上海啲歌迷好瘋狂！」
豈料，演唱會後，熱情的歌迷一下子造成混亂，「我們上了一輛旅遊巴，大批歌迷把我們團團圍着，然後成架旅遊巴捧起，即係菲律賓槍殺事件的旅遊巴咁大！好驚呀！坐在車上感覺到架車突然升起了！好彩後來公安好快趕到，歌迷把旅遊巴放下。當時大家都無經驗，是第一次。」
其後一步一步汲取內地搞演唱會的經驗，「每一個媒體都有一個過渡期，甜酸苦辣都試過。」她透露，曾替一名本港女歌手在內地開演唱會，事前已把演唱歌曲名單交由當局審批，並取得批文，到演唱會尾聲，在歌迷要求安歌下，臨時即興唱了一首較為敏感的流行曲，翌日隨即被國家封殺，不可繼續內地演唱會行程，汲取了沉痛的教訓。
「所有痛苦都係Learn from experience！」陳家瑛稱，後來習慣了，就學會了每次到內地都必然申請批文，還要把所有歌曲都一併申請，好讓當局把有問題的剔除。
隨着港人在內地開演唱會愈來愈頻密，雙方也建立了互信和了解，「大家互相學習，觀眾又在學習怎樣控制情緒，公安學習怎樣維持秩序，我哋又學到，要經甚麼關卡，怎樣可以把演唱會物資用完後可以安全地運送返香港。內地一定要批文，就等於去美加都要申請工作簽證！」
內地找贊助商比港容易
走到便利店，不難發現王菲演唱會的海報，原來是雀巢飲品的廣告宣傳。作為贊助商的雀巢，利用一票難求的演唱會門票作抽獎禮品，這也是陳家瑛與贊助商的合作模式之一。
「我的想法是以門票跟贊助商Barter（以物易物），例如用作出地鐵廣告，餘下錢可以在報紙賣Front Page，幫到宣傳，例如飲雀巢可以抽王菲票，又可以做宣傳。」
有內地傳媒報道，王菲演唱會不但門票收費高，連贊助費收入也不菲，曾經傳出每場贊助費達500萬元人民幣。雖然陳家瑛拒絕透露贊助費金額，但承認內地贊助的比例的確較香港高，「香港地方細，贊助商不會俾幾千萬你使，即使係酒類產品，都唔會比內地多，這要視乎Promoter的經驗。」
以王菲北京站的場館布置為例，贊助商是分場出現的，即每一場的主要贊助商也是不同，首場演唱會贊助的Logo是一個洗頭水品牌，第二場則換了一家啤酒商，贊助商還包括化粧品公司、電訊及銀行等。
陳家瑛坦言，內地較容易找到贊助商，「內地的市場很大，無論是汽水、啤酒，衣食住行，有數不盡的商品，全部規模都好大，例如去到上海，銀行都有不同的特色產品，如果去到內蒙，也可以有大型的奶品公司做贊助。」
港贊助商被電視台寵壞
她又慨歎要在香港找贊助十分困難，因為贊助商都被電視台寵壞了，「香港的贊助商都給電視台寵到壞，一晚不同的電視劇有不同的贊助，我哋做演唱會邊有咁多呢，我哋又要人俾錢，又無咁多曝光。」
王菲是陳家瑛旗下的藝人，陳家瑛製作公司順理成章也成為演唱會香港站的主辦單位，而內地則由來頭不少的上海聖峰文化演藝有限公司做主辦單位，「主辦有好多責任，台燈音、樂隊、宣傳賣飛，要知得好清楚，自己不做主辦單位。這家內地公司在當地做開廣告，又做製作，又做過張學友演唱會，經驗豐富。」
演唱會黃金投資法
近日除了王菲開演唱會外，闊別7年的梁詠琪亦在紅館開個唱，但入座率只得七成，甚至傳出當晚門外有人以半價出售門票。演唱會是一門難以預測的生意，而且支出成本大，稍為少一點經驗，分分鐘會蝕錢。
擁有幾十年搞演唱會經驗的陳家瑛，有一個獨門黃金投資法則，早已關了蝕本門，「因為我識計條數，已經係老油條，總之成個預算，包你唔會蝕！收入幾多支出幾多，如果支出超過七成就唔好做，否則難以Break Even。支出包括台燈音、藝人歌酬，收入包括門票收入及贊助等，收入與支出，對一對條數，如果條數超過七成，賣飛要賣到八成幾才打和的，就唔好做啦，這個是我的營運方法。」
做預算也要眼光夠準，因為演唱會場數愈多，Break Even Point就愈低。「台燈音，建一個舞台，很多開支都係Fixed Cost，做一場又係咁多錢，做十場又係咁多錢，所以愈做得多場，風險就愈細。」
然而愈多場數平均成本就愈低，哪為何王菲演唱會只開5場？「有時唔使咁盡，王菲自己脾氣又係咁，唔鍾意做十幾廿場，復出係玩的心態，最緊要以最好的狀態見人，我可以保證到這5場狀態是無事的，做到六七場，如果狀態唔好我咪仲大件事，質素好緊要。」
...................
王菲復出背後玄機
久休6年的王菲，被邀復出之聲不絕於耳，今次復出做演唱會，陳家瑛是背後的靈魂人物。
「之前大陸有份雜誌，講到我好有心計，收埋王菲6年，設計這個局，係無咁嘅嘢，佢自己話休息就休息，從來無同我講6年後會復出的事。」陳家瑛指，事緣兩年前，有主辦單位透過她問王菲會否做客串嘉賓，「王菲女又生埋，就問佢唱唔唱呀，點知佢話考慮吓。我心諗，點解佢會考慮呢，咁分分鐘可能會出來唱演唱會都唔奇㗎喎。」
後來，又有另一主辦單位力邀王菲復出開演唱會，「咁啱又有人問，咪試下問下佢囉，我話好貴㗎喎，我亂講㗎咋，好貴好貴，主辦單位話，『嘩！咁貴呀，都好啦，』，我去問阿菲，佢最初都話唔做，但我話，而家啲錢好貴喎，於是王菲回覆，都可以。」
王菲答應復出後，陳家瑛立即馬不停蹄安排演唱會製作，由樂隊、Led燈、日本及法國設計師，成本以百萬計。「王菲不止是香港的天后，也不止於是內地的天后，是要打做到大中華、亞洲的天后，王菲已變了一個品牌。」
復出之前，王菲甚少接廣告，有報道指，陳家瑛為王菲接下的霸王廣告，有傳是2,000萬元人民幣天價酬金。
----------------------------------
「家庭式管理法」巨星當仔女
不少天王巨星背後都有龐大的經理人公司，但陳家瑛一直是以單對單，奉行「家庭式」管理法，她形容自己是「家庭式經理人」，「我跟英皇等經理人公司好唔同，佢哋工作量好重，有十幾個藝人，壓力都好大，但我做咗咁多年都係自己做，周梁（周梁淑儀）是我師傅，除了TVB和ATV，我都無打過工。」
由陳百強、王菲到陳奕迅，粒粒都是性格巨星，一般人都認為與他們溝通相處好不容易，而陳家瑛則把巨星都當作是仔女，按照他們本身的性格彈性處理，從而發揮他們的長處與性格，而並非刻意改造做一個觀眾受落的形象。
「我份人好彈性，王菲同我講『我唔做啦，要結婚啦！』，咁你咪去囉，我唔係啲死難，要住藝人做好多嘢嘅人。」
她叫陳奕迅做「阿囝」，「陳奕迅唔同，後生，有家庭，自己好動，唔做嘢喺屋企都係唔瞓覺，那倒不如唱下歌賺錢啦！」
王菲丈夫李亞鵬拍《將愛》，王菲就找來陳奕迅合唱，「阿菲好錫Eason，當佢係細佬，阿鵬（李亞鵬）套戲，阿菲就叫Eason一齊唱，好似一家人咁，係家庭式，唔係英皇，唔係東亞，不是用好多錢去養住十幾個藝人，我無咁嘅資源同精力，無錢請好多大經理人，全部自己親身睇，佢哋全部叫我做媽咪。條路就係咁行出來的。」
發掘巨星潛能表現真我
栽培一個巨星，陳家瑛背後有一個理念，就有如培養自己仔女一樣，讓他們發揮內在的潛能與長處，「每個藝人都有其長處，問題是有沒有信心，同埋會否俾你發掘出來。每一個人都有佢好的一面，如果成日限制佢，不讓他自由發揮，變成不是真正的自己，要用自己的真性情，做到一樣嘢，觀眾又接受，咁就叫成功。」
王菲出道，就被唱片公司改名為王靖雯，直至陳家瑛接手，把「王靖雯」變回原名「王菲」，「王菲這個名係我叫佢用番嘅，因為我叫她王靖雯佢唔睬我，她本名就是王菲，王靖雯係藝名，所以人哋叫王靖雯，佢都發緊夢，叫佢王菲，佢就立即有反應，就好似叫細路仔咁，佢唔睬你，如果叫佢陳家瑛（意思是叫真名），咁佢就睬你，呢啲係捉心理，佢英文名都係叫阿Faye，我接手做經理人後，覺得唔好咁複雜啦，就叫返王菲啦！」
不勉強旗下藝人去做事，她就順其道而行，「王菲本身性格就係咁Cool，我唔會叫佢笑㗎，佢夾硬笑假到死，否則到今日，都唔會有一個王菲出來，佢就係咁孤癖的性格。其實你睇佢微博玩到癲咗，平日係一個好活潑的人，但怕醜，怕陌生人，做嘢幾揀（擇），講嘢好簡短，全部單字，去、坐、食！咁多年都係咁，我哋接受咗，就要令觀眾都接受。好彩！觀眾喜歡呢個Style。」
陳家瑛眼中的陳奕迅，是一個樂天派，所以安排接廣告都找一些快樂和家庭路綫的產品，好讓陳奕迅可以自然地以本身的性格為產品做宣傳，「陳奕迅擺明係鍾意亂講嘢，你哋鍾意聽就聽，佢係一個好Positive的人，帶給好多人快樂，天生鍾意Entertain人，不停講嘢，所以接廣告，都係M&M'S、麥當勞、潤唇膏，全部是細路哥嘅嘢，啱一家大細。」
陳家瑛又釋放陳奕迅的男性魅力，「佢（陳奕迅）成日扮話自己好肥好論盡，其實佢好貪靚，有時扮有儀態。阿囝（陳奕迅）其實幾靚仔，佢（陳奕迅）話，『係咩？其實我都覺得我自己幾靚仔！』佢有男性魅力，要發揮到佢呢樣嘢，就由得佢去囉！」
了解喜怒哀樂助其減壓
對於藝人的喜怒哀樂，陳家瑛掌握得十分通透，「我是一個超敏感的人，一個人開心唔開心，我一眼就知，媽咪話我有第六靈感。我又係老天真，女兒有時話我幼稚，我個人好樂觀，睇嘢好正面，有些人明明係搵我笨，搵咗我笨10次，我都會原諒佢，可能第十一次係真呢？算啦！唔好咁記啦！」她哈哈大笑。
做經理人好像照顧子女一樣，她認為最重要是關懷，「Caring，好緊要，其實佢哋做每件事都好大壓力，佢哋做每件事都是我哋做唔到的，例如王菲如果唱唔到，我代唔到佢。佢哋壓力好大，做經理人要同佢哋減壓，同佢哋傾心事，煲啲嘢佢食，阿菲最鍾意食甜燕窩，陳奕迅則鍾意食鹹燕窩。」
陳家瑛每月起碼下廚煲兩次補品給陳奕迅，「花膠、魚翅、燕窩、鮑魚，我識煲，叫我煮白飯就唔識。煮下東西可以減壓嘛！」
﹏﹏﹏﹏﹏﹏﹏﹏﹏﹏﹏﹏﹏﹏﹏﹏﹏﹏
摘星記
由陳百強、王菲到陳奕迅，都是主動找陳家瑛做經理人的，3粒巨星3個摘星故事。
助王菲解圍 赴台撕合約
王菲初出道時，以一首容易受傷的女人已爆紅，當時與新藝寶還有一年合約，新藝寶想再續約3年，後來殺出了另一份滾石合約，令王菲即時被新藝寶雪藏，於是向陳家瑛求救，「王菲當時簽了新藝寶，點知之前簽了的經理人Leslie Chan，把合約賣給了台灣的滾石，而滾石當時又想打入香港市場，咁死啦！點可以同時有兩份約！」
後來有人介紹王菲找陳家瑛幫手，她接到王菲的電話，「『我係王菲呀！』，把聲好似細路女咁，大家約了去尖沙咀以前的Regent酒店咖啡廳，她跟我說合約好亂，咁我打去新藝寶，睇吓我可唔可幫手啦。」
陳家瑛為了幫助王菲，翌日就飛到台灣，一手執着王菲的合約與滾石的老闆段中沂會面，「我跟他說，其實你哋咁多年簽咗阿菲都無同佢做過嘢，依家先計劃到香港，新藝寶現在要雪佢，如果你未開公司就唔好阻佢啦！」陳家瑛引述段中沂，「好！就憑你這句說話，我就撕咗份合約！」
陳家瑛至今提起這段成功事迹仍不禁眉飛色舞，「開心到我發癲！當時立即安排王菲跟新藝寶續約。後來，王菲就叫我做佢經理人。」
捱過逆境陳奕迅翻身
陳奕迅也是主動找陳家瑛做經理人的。2003年陳奕迅與英皇唱片公司因未能就續約問題達成共識關係，而遭到雪藏。同時其任職房屋署總屋宇設備工程師的父親陳裘大被控受賄罪成入獄，此事對陳奕迅打擊甚大。在整個2004年，除接拍電影外，陳奕迅的事業處於休息狀態。
不久，他找上了陳家瑛做經埋人，她又認為陳奕迅的潛力還未完全發揮，於是一拍即合。過檔後，陳奕迅連出3張專輯，成功翻身。
無心插柳遇上陳百強
陳家瑛遇上陳百強也是一個無心插柳的故事。
「我嗰陣做歡樂今宵監製，是全包宴，有電影、唱歌、問答比賽、趣劇，乜都有齊，晚上9點做到11點，我是監製，我就識晒所有唱片公司的人，可能要請薰妮、呂方，上來唱隻歌。工作太辛苦啦！當時監製早上9點返工開會，晚上11點幾放工，後來結婚生了兩個細路就決定唔做。跟了周梁做演唱會製作，這時就遇上了陳百強。」
當時是紅館剛剛開幕，詎料演唱會就因場地碰釘，「陳百強周六就要開演唱會，怎料周一打風，紅館漏水，所有坐位和Setting都濕透，然後發現紅館建牆身與建屋頂是兩間公司，互相推卸責任。」
於是陳家瑛打電話給陳百強，告知演唱會要改期，「Danny仔好Cute回應，『哦！OK啦，無事啦！』我還以為佢會發難渣。後來他打電話給我傾心事，唱片麻麻哋，屋企點點點、把聲點點點、公司點點點，不如咁呀，你幫我做經理人呀！吓？經理人？都好喎，試吓啦，做經理人好容易啫，單對單。」
自此陳家瑛開始經理人的生涯。
----------------------------------
戰勝癌魔無懼死亡
1993年，是陳家瑛最沉痛的一年。丈夫林賜祥（七十年代TVB的助理總經理）、父親與陳百強相繼離世，一時間痛失身邊最重要的3個男人。
「我對死亡並不恐懼。」陳家瑛的丈夫36歲英年早逝，同一年，父親在同一醫院隔離一個病房死亡，同樣是死於癌症。
「我好細個已受衝擊，我會掛念佢哋，羅記、梅豔芳、張國榮、陳百強，上面已一枱麻雀。」6年前陳家瑛發現患上第三期乳癌，性格堅強的她，只流過一滴眼淚，然後不停繼續工作，「死啦！剛剛簽了陳奕迅，仲有大把東西要做，我唔走得喎！診症後3日內開刀，立即做手術，已擴散了第三期，兩個瘤都是4.5厘米，做了7次化療，30幾次電療。當時唯一想的，就是快點醫好個病，為Eason安排工作。」
在治療過程中，陳家瑛即使捱痛也不輕言放棄工作，「做化療時，每10日打一次毒針，我叫秘書把一周的會議安排在同一日進行，打到第七次，骨頭痛到癲左，醫生幫我打瑪啡，兩個鐘後再痛，再打多枝，醫生話，『打唔到㗎啦，再打你會死㗎啦！』。」幸好，經過30次電療後，身體慢慢康復。
「從來無休息過。做嘢係寄託，坐喺到養病，你一定病呀！」永不言休，面對問題是陳家瑛做人的原則，「如果有問題，病又好，公司又好、人事又好，最緊要面對，選擇唔面對，反而係一個弱者，或者永遠唔知個結果是怎樣，好與唔好都要接受，不要停下來，這個是我做人的道理。」
----------------------------------
陳家瑛（Katie）
年齡︰60歲
家庭︰丈夫林賜祥，是七十年代無綫電視助理總經理，36歲因癌病去世，二人育有一子一女
事業︰
˙入行任職無綫電視觀樂今宵節目監製
˙婚後加入周梁淑儀成立的富財製作公司，曾主辦多個演唱會
˙自立門戶，成立陳家瑛製作公司，旗下藝人包括陳百強、王菲及陳奕迅