2011-2-28 AD
|
||||||
|
曾司長宣讀預算 案，內容不過不失，新意欠奉，《蘋果》頭版標題話「全城喊打曾俊華」，未免誇張一啲，起碼有好多「意外得益」之人，會拍吓手掌。左丁山就係其中之一，受惠 MPF多六千蚊，全年差餉寬減共六千元，再加電費津貼一千八百，加埋共有一萬三千八百，壹生發，幾唔錯吖。信差Ｍ住在彩虹邨，亦直情笑到四萬咁口，佢計過 有六千元強積金，兩個月公屋租金，一千八百元電費，等於出雙糧。但係政府派糖，幾難惠及全體市民七百萬人，怨聲連連，在所多有。財爺出席三台聯播，聽市民 電話，罵者佔大多數，可見社會上有不少怨氣；聽真啲，就係人人為自己唔抵。電話之中，聽講最多人要講MPF，預算案第177段講：「強積金和職業退休計劃 一直發揮協助就業人口儲蓄的作用，使他們的退休生活得到更佳保障。為增加有關計劃成員的退休儲蓄，我建議為所有在二○一一年二月二十三日已成為強積金計劃 或職業退休計劃下受香港《僱傭條例》涵蓋的成員的人士，向他們的強積金戶口一次過注入6,000元。這次的注資建議不設收入上限，希望協助更多市民為退休 作好準備。這既不會增加通脹壓力，也是我們現在財政上可負擔的。」原來有好多市民唔知道自己有冇份，對職業退休計劃亦不甚了了，特區政府要認真詳細解釋， 令市民明白多啲。曾司長上面講到：「不會增加通脹壓力」，其實聽眾要求退稅，司長話會增加「通脹壓力」，但一般市民聽極都唔明。其中道理並不複雜，經濟學 理論老早說明退稅、減稅、貨幣寬鬆等措施為「膨脹性」的（expansionary），旨在刺激經濟增長，帶動物價上升在所不惜，呢啲政策通常在不景氣時 候出台。反之，在經濟好好景，GDP增長強勁，通脹率去到4.5%（全年預測）嘅時候，退稅或送現金畀市民就是鼓勵通脹繼續向上，故此曾司長一於唔制。但 矛盾在於，佢同時派糖（差餉、電費、免公屋租等）近二百億元，此外又增加公共開支676億元，呢啲唔係expansionary嘅話，你話係乜？市民即使 明白退稅係通脹性嘅道理，亦覺得政府言行不一，唔順氣啫！ |
||||||