ZKIZ Archives


【獨家】California全線冚旗老闆現身爆內幕

2016-07-14 NM

有十二間分店的加州健身中心(California Fitness)及mYoga等,本星期二全線停業,大批被欠薪的員工、已付費的顧客,到警署備案。

加州老闆王炳權(PK Wong),一直避見傳媒、未有交代事件。本刊找到他首度現身,接受獨家訪問。他對於加州現況,表示既心灰意冷,亦很憤怒。他指自己本來是加州會員,直至去年十二月被教練游說,買入California Fitness做老闆。入主不足半年時間,前後已「泵水」近八千萬,他怒指今次事件,自己才是最大「水魚」:「我仲被海關調查咗兩次!」

而他口中,騙他買入加州的,是他的健身教練、前加州董事鄭家達(Michael Cheng)。由被說服買入加州會籍,到買入整間公司,至全線停業,他將整個過程大公開。說到尾,加州十萬名會員,是這次內鬥的最大犧牲品!

「我舊年買入呢間公司,係因為一個前董事同我講有錢賺。」PK Wong說。他指這名前董事鄭家達(Michael Cheng),在加州健身任職教練廿多年,亦是他的私人教練,兩人更成為朋友。在去年十二月,鄭家達突然提議,叫PK Wong用五千萬元買起California Fitness,並指由於上手老闆身體有事,要求他數日內要簽約。

PK Wong一直只是替發展商從事工程設備,並藉此發跡。由於他很信鄭家達這名加州老臣子,故盡職審查也來不及,已倉促買入,「鄭家達仲俾份文件我睇,話有間上市公司都想買,叫我快啲同佢一齊搞!」

被海關拉兩次

然而,PK Wong指,他正式成為加州老闆,並委派財務總監睇數後,才發現貨不對辦,「上手留低好多舊債,間公司又亂七八糟,都唔係鄭家達講嗰樣嘢!」不過,他拒絕再科水救加州的導火線,在於他與太太曾被海關調查。自《商品說明條例》實施後,有人向海關投訴加州不良銷售,連累了他,「我同老婆係董事,所以被海關查咗兩次。我買咗之後,我老婆連California Fitness都未去過呀,我屋企人覺得呢件事情好滋擾,叫我一係賣咗佢,一係執咗佢,加上中期已經蝕咗好多錢。」據知,加州旗下十二間鋪,每月租金達一千九百萬元,而支付的人工亦要過千萬。PK Wong除了收購加州的五千萬元外,做老闆的半年間,他已額外再注資二千多萬。據知,現時加州剩餘的現金,約為一千六百萬元。

覺得被搵笨

PK Wong又指,現時回想起來,覺得被人搵笨,「佢(鄭家達)係騙我去買呢間嘢o架,如果我無入來,呢間公司早已經執咗笠,我係拿咗一些資金去頂住!」記者問他現在執笠,令顧客受害,他帶點激動指:「我都係受害者!如果講到辜負會員,全部都係鄭家達做出嚟,佢先係騙子﹗」PK Wong指自己心軟,除了被騙入股外,他也幫襯了加州二十多年。過去被要求買教練堂,每次都十幾萬十幾萬的買,「我自己都買咗幾百萬呀!」PK Wong最終與鄭家達決裂,並怒炒了對方。而據一名現時仍在加州任職的高層透露,鄭家達曾私自加了教練及sales人工,令管理上非常混亂,「一個香港區總教練,可以搵三十五萬元一個月。單係出糧,公司總共每個月使多幾百萬。」據知令PK Wong更不滿的,是他後來才發現,原來鄭家達當初聲稱前加州老闆、即Michael Wu(吳戈)身體有問題,但實情並非如此,而是去年他被澳洲當局指舞弄股價認罪被判刑,當地報章亦有報導,令PK Wong更感受騙。

負面消息多 新買家卻步

不想跌入無底深潭,PK Wong決定賣盤。據消息人士指,在銅鑼灣及中環都有分店的拳館FFG、股東杜恒霖曾表示有意收購,知情人士透露:「係加州總教練Mike Chan,介紹風之子杜恒霖去買。對方話想睇數,PK Wong咪俾佢睇囉,條數暫時得佢一個睇過,雙方有保密協議唔可以公開資料。」後來竟有傳媒報導,其公司負債達一億三千萬,令PK Wong感到奇怪。而傳聞杜恒霖的收購價達一億,PK Wong澄清:「佢無出過價!」他反而不滿行家從中抽水,令真正有意的買家卻步,「我知有好幾間想買,但太多負面消息,令到佢哋卻步。」事實上,不少行家已經展開「抽水」行動,包括在加州門外擺檔,以優惠價接收加州會員,而FFG的杜恒霖亦向傳媒表示,會與另一拳館FAC合作,接收新會員,有知情人士透露,「杜恒霖已經叫晒班教練過去跟佢!」

土皇帝 捽數靠爆粗

今次事件的惹火人物鄭家達,在加州任職教練廿多年,手下有很多私人教練「自己友」。他一向只做大客,東亞主席李國寶老婆,都曾經是他的客人。有員工指他是公司最大Sales,「捽」數亦一流,加州職員透露:「佢最鍾意人哋叫佢做大佬Mic。點捽數?講晒粗口鬧班同事囉!」有需要時,亦會對員工隻眼開隻眼閉,「公司規定跑幾多數先可有佣金,並一定要新客,但只要有鄭家達嘅special approval,就算係舊客都接受,令同事可以到數。」所以他有一班忠心班底。另外,公司規定員工基本佣金百分之十,跑的數愈多,分佣比例更高。有教練為賺更多而出蠱惑,「佢哋個個將自己跑嘅數,撥晒落其中一個教練嘅戶口,咁咪可以賺到公司最多嘅佣金囉。高層點會唔知!」有員工爆鄭家達如加州的「土皇帝」,「佢最叻一招,如果老闆搞佢,佢就唔交數,並且叫手下hea做。老闆最怕咩?無生意呀,惟有由得佢!」本刊早前找到鄭家達接受訪問,他承認與PK Wong不和:「我重視服務,佢重視生意!」鄭家達曾捲入禁藥事件,他於二○一○年參與全港健美錦標賽,並奪得冠軍,但同年香港運動禁藥委員會宣布,連他在內四位健美運動員,因違反運動禁藥管制規條而被處分,並褫奪他的健美錦標賽冠軍資格及被罰停賽。

大爆料揭加州劏客賤招

第一招:口水攻勢sell感情加州的銷售手法不良,並非今天的事。有前員工爆料,指最簡單的做法,就是出軟功,「好多舊客同佢哋有感情,唔係真係想買,佢哋會不斷咁游說佢,三十堂唔得,二十堂啦,二十堂唔得就十堂,總之說到你最少都要放低一蚊o架喇。」他指最後即使你只買一堂,他們下堂開始會繼續游說你:「你得一堂點train到咩呀,你嘅狀況係最少要三至四個月嘅program先搞得掂。」Sell感情通常都得手,如果客人堅拒唔買?這些「感情」當然收番,無!情!講!

第二招:揸客戶證件唔還對於新客,第一堂免費堂,保證令你「回味無窮」,「新客有一堂free training,第一堂會好好service,又細心,免費同你做個幾兩個鐘!」按規定,sales一般要求客人放低證件,當然也可以是其他卡,如visa,「Sales死都唔會俾番個客,直至游說到佢入會為止。除非你大叫要報警,佢哋先會俾番張卡你囉。」入會之後,會再游說你買私人教練堂,如果唔成功,就會出另一招,行內術語係T.O,「即係會叫senior啲嘅教練出來親自sell你。捉你心理,你話貴sell你平plan,但其實會再游說你做更多堂。即係耽你時間,疲勞轟炸到你怕咗而去買!」

第三招:試玩證引誘客戶前員工指,他們表面上是令永久會員「有咁尊貴得咁尊貴」,於是每個永久會員送現金券及十張一個月試玩證,讓他們能帶朋友來試玩。而發出的試玩證,通常被亂用,在廣州分店,試過有人拿試玩證來出售。拿着試玩證入會買一年送半年,買兩年送一年不等,太混亂令廣州分店收到過千宗投訴,最後要退錢俾會員。「不過高層做嘢好小心,因為出手嘅都係下屬,如果件事揚咗,就會同公司講炒咗班垃圾,劃清界線。」

大狀陳淑莊:追數唔樂觀

加州鐵定全線停業,已買下課程的顧客都感無奈。身為大律師、公民黨副主席陳淑莊,接受本刊訪問時指,已收到三百多個求助,「全部有名有姓,有相關合約資金,涉及的金額,大概超過三百萬。」其中受影響的梁生,是加州熟客,他的合約於一八年才滿約,今年已被教練強力推銷,並簽了「平plan」續約,「慣例係一年前先叫你續約,佢話見我做咗十幾年係熟客仔,話好快會加價,每月去到六百幾蚊,依家簽五十個月,每月只要二百幾。」他怒指教練應知道公司有問題,但竟要他提早續約,他對取回萬多元未曾使用的課堂金額不抱期望,「我點證明佢係明知公司有事都sell我喎!」陳淑莊指,公司進入清盤程序對會員不利:「我都幾擔心,因為好多人已經一次過俾晒錢。公司已經被人申請清盤,除咗法庭批准,否則無人可以拎錢。清盤所得嘅錢,係排住隊還,第一係清盤人,第二出糧俾員工,第三交稅,第四係有抵押的債權人,最後先係會員(即顧客)。有抵押的債權人,例如係銀行,我查過公司一二年開始,大概有幾千萬數。如果單計銀行都幾千萬,去到會員仲有幾多剩呢?所以我唔太樂觀。」

California老闆滿手磚頭

Fitness大比併

California Fitness大事表

1996由美國24 Hour Fitness創立。7/1996香港首間健身中心在中環威靈頓街開幕。4/2008在MegaBox 18樓開設逾6.5萬平方呎、香港第十間中心,該店為其中一間旗艦健身分店。201224 Hour Fitness出售California Fitness全線業務,新股東為NOVA INVESTMENTS ASIA LIMITED,其中一名董事是吳戈(Michael Wu)。12/2015上手以5,000萬港元售予J.V. Fitness Ltd。28/4/2016消委會點名譴責California Fitness的不良銷售手法。28/6/2016J.V. Fitness Ltd遭鎂燦科技工程入稟高等法院申請清盤。市傳FFG武術健身中心創辦人杜恒霖等,計劃以1億元收購香港及中國的業務。

4/7/2016California Fitness黃埔分店暫停服務。6/7/2016California Fitness屯門、鰂魚涌分店被指欠租,而全線分店已停止招收會員及續約。7/7/2016California Fitness前董事王炳權的獨立屋,被貼大字報追數。8/7/2016就欠薪問題,勞工處督察到California Fitness部分分店了解和搜集證據。11/7/2016海關拘捕2名California Fitness高層人士,涉違反商品說明條例。12/7/201612間分店全線停業。

撰文:財經組攝影:關永浩攝錄:關永浩news@nextdigital.com.hk

獨家 California 全線 冚旗 老闆 現身 內幕
PermaLink: https://articles.zkiz.com/?id=205469

黎姿老公掃California Fitness夜冷貨

2017-02-12  BN

卓珈控股(8358)上週搶晒鏡,焦點都落在由藝人進身為上市公司主席兼CEO的黎姿身上,其實她背後的男人——老公馬廷強默默支持,卓珈七成半的股份由兩公婆齊齊持有之餘,卓珈上市後可能仲有後着。

馬廷強行動不便,有空都喜歡到健身中心做吓拉筋;近日搵埋商界友好向加州健身(California Fitness)的臨時清盤人,購入加州健身嘅資產,包括健身器材,意味去年七月執笠嘅California有機會復活,前老闆P.K.王就話:「我都有聽聞,但細節就唔清楚。」其實所謂有形資產如健身器材折舊唔少,而且加州健身收過千幾宗投訴,個「朵」都麻麻哋,商譽呢個無形資產更難叫價,所以馬廷強都唔係花好多錢,當執「夜冷貨」咁啫,不過執靚佢再唧入上市公司可能又變銀紙喎,所以話兩公婆,一人計短,二人計長。

林鄭兄弟手足情深

林鄭宣布參選特首,特別提到最喜歡做社會福利署署長一職,因為可以體驗關愛共融思想,奶媽味道甚濃,其實林鄭的阿哥同細佬也學得林鄭咁,危難之時有一份守望相助嘅精神。話說○五年,林鄭兄長鄭宏光破產,那時林鄭父母鄭阿毛和林鳳蘭持有的鰂魚涌南豐新邨單位在九九年已賣掉,呢位林兄落難之時,就報住林鄭細佬鄭孝光持有的南豐新邨另一個單位,足見兄弟之間手足情深!

中環寸嘴潮廳自廢武功

祖籍潮州嘅岳少呢幾年又搞China Tang、Kowloon Tang,喺皇九入面以前間食廣東菜Island Tang(港島廳),舊年底裝修小執過,變身做Chiu Tang(潮廳),唔知係潮人嘅潮,定潮州菜嘅廳,即管踩吓場。入到呢間潮廳,原來嘅酒吧位變咗滷水檔,仲吊咗隻大肥鵝喺度,入潮州菜館踩場一定係整碗潮州翅啷啷口,咁就知佢有幾高級,吖,原來呢度碗翅貴上環「尚興」幾廿蚊咋,啲翅針又粗啲,計埋地點裝修,咁都算抵食喎。潮廳個老總叫我唔好寫,話老細怕食翅啲環保人士唔鍾意,唔敢promote,唓,呢啲叫做一時唔偷雞做保長;潮州菜最出名就係凍蟹同埋招牌翅,呢啲正式係又痕又怕痛,顧住做唔夠數交唔到業績上唔到市呀!計我話,咩食家都假,偷食就最滋味嘅!不過呢間潮廳都係自廢武功,本來賺錢風水酒吧位變咗滷水檔,做高級食肆唔promote酒死梗,賣一支酒頂十碗八碗翅啦!嗰日寒寒哋,開番支「滴滴金」d'Yquem配吓點心,驅吓寒氣,令我憶起廿幾三十年前,初初返香港識羅兆輝,我不嬲都係英國style,雪茄送Port Wine,羅兆輝教路叫靚女點着支蘸過白蘭地嘅雪茄,咁就賜「滴滴金」俾啲女飲,唔知岳少識唔識呢?

楊國佳工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

御用建築師分級數

西九故宮有「御用建築師」嚴迅奇,香港發展商亦有,揀建築師通常講夾唔夾,例如長實地產近年多用凌顯文建築師,皆因其妻吳佳慶是長實地產董事,亦是李澤鉅的大學同窗;而新地御用建築師為呂元祥建築師樓,話晒係郭炳江親家,不過講到大孖沙興建自家嘅地標,其「御用建築師」級數又唔同,通常起用洋人建築師樓,與設計大型屋苑講求用盡地積比率有別!如長江中心起用Leo A Daly和Cesar Pelli,國金二期亦找Cesar Pelli及嚴迅奇,胡應湘最親力親為,合和中心正是出自其手筆!

黎姿 老公 California Fitness 冷貨
PermaLink: https://articles.zkiz.com/?id=235063

摸魚手札:California的黑吃黑

1 : GS(14)@2016-07-17 16:00:10

私人公司的透明度不及上市公司,所以在外界得知的資料都是主要董事、員工雙方願意或有意披露幾多資料,然後主力都是媒體的第四權挖料工作,大體上公司是無責任把財務資料公開。California Fitness這當中的花生炒作都已經去到尾聲,做得生意都無話好人、壞人,只有高手低手之分。我睇網上留言,兩邊都有人罵,不過就咁睇公關戰,PK Wong是先發制人,略勝一籌。董事爭權都係黑吃黑,可惜苦了十萬消費者。有一位很有街頭智慧的會計師前輩一語中的:「好簡單,你睇吓邊個睇數,同埋佢肯唔肯公開過條數?那就知道邊個有絕對權力。」一般私人公司對街條大數都係年結,主板就半年結,創業板就季結,佢所講的「條數」唔係講呢類,而係講每個月都見到數簿上面的那條大數。如果真係等年結先埋單計,咁就一切都太遲了。所以,在事件中公開那個德勤核數報告只能參考,並不能交代到由上年年結到現時的賬目,如果有董事或有睇數權力的人中間上下其手,報告是無法反映出來,一切都要係睇邊個揸數。根據PK Wong的講法:他自己無做盡職審查,所以被人「過一棟」,被人哄入主後才發現賬目有很多爛數。這個講法,我是偏向不相信,因為現在是講緊過千萬的交易,如果找相熟會計朋友做盡職審查,幾十萬元可以埋單了,這筆錢按比例來講也不算貴,但卻是保命的,無可能無睇過數就買。正如街邊師奶買西瓜,都會拍兩下、摸兩下先買,你估真係個個都儍的嗎?至於私人公司在轉移資產的操作,是比上市公司寬鬆很多。首先,上市公司偷錢要計「five tests」,也就是上市規則第14章的5個比例,如果是但一個比例太大,那就要出通告披露,就會有監管的眼睛望住你。有時要轉錢,支出一定好過把錢資本化,因為支出花了就是蝕了,但一資本化了,可能就是負債等,容易被追蹤到。私人公司無限考慮,要轉移就轉移。這也回歸到第二段所講的問題癥結,就是到底揸數的是邊個?佢有無交代過條數出來?如果無,真係疑點歸於揸數那個。揸數這個問題會引伸至到底找不找到白武士,根據流出的錄音指,潛在白武士杜恆霖多次要求睇數但不果。你站在白武士角度去睇都幾無奈,叫人接爛貨又唔畀條數人睇,佢點知自己買完會唔會中伏?何況杜先生背後有金融界做刁高人,佢一定係計到PK Wong成個算盤計乜,唔係咁易過到骨。渾水
http://www.facebook.com/muddydirtywater





來源: http://hk.apple.nextmedia.com/financeestate/art/20160717/19697892
摸魚 手札 California 黑吃黑
PermaLink: https://articles.zkiz.com/?id=304021

California FITNESS停業 5巨舖近20萬呎招租

1 : GS(14)@2016-09-06 04:29:44

【明報專訊】早前已全線停業的健身中心California FITNESS 母公司J.V. Fitness Ltd遭入稟申請清盤後,原由該公司租用的多個市區巨舖亦陸續推出招租,其中由麥當勞餐廳持有,位於鰂魚涌栢蕙苑巨舖,市場消息稱,業主計劃以月租180萬元推出招租,連同早前已於市場推出的4個市區舖,近20萬方呎樓面正待市場吸納。

栢蕙苑巨舖180萬招租涉2.7萬呎

原由California FITNESS 租用的栢蕙苑低層地下部分及高層地下全層,總樓面達2.7萬方呎,代理透露雖未完成收樓程序,不過業主已計劃於市場招租,上址舊租180萬元,業主現時意向價租金介乎180萬元至200萬元水平,呎租由68元至76元不等。資料顯示,上址由麥當勞餐廳於89年以1.5億元一籃子購入,其中低層D及E舖,以及上層舖位,2008年起租予J.V. Fitness Ltd,當時月租已達110萬元。

永倫伊利莎伯大廈商場吉舖225萬招租

此外,位於銅鑼灣伊利莎伯大廈商場全層巨舖,面積約3.64萬方呎,California FITNESS早於2012年前以約200萬元承租。市場消息稱,業主永倫集團已於市場以月租225萬元招租,呎租62元。該公司租用的旺角雅蘭中心1期5、6樓兩層樓面,市傳業主亦有意以96萬及108萬元招租,按每層樓面分別為1.6萬及1.8萬方呎計,呎租約60元水平。

另外,California FITNESS早前租用的華置(0127)大股東劉鑾雄尖沙嘴The ONE L9至L11樓3層,面積約3.89萬方呎,代理消息透露,該批樓面近期以意向月租約175萬元推出,呎租約45元。至於嘉里(0683)九龍灣MegaBox L18樓,市場消息稱,業主以月租240萬元推出招租,上址涉逾6萬方呎樓面,呎租約40元。


來源: http://www.mpfinance.com/fin/dai ... 4369&issue=20160905
California FITNESS 停業 巨舖 舖近 20 萬呎 招租
PermaLink: https://articles.zkiz.com/?id=307521

老人院租California屯門舊舖 減租兩成

1 : GS(14)@2016-10-21 04:35:40

【明報專訊】原本由健身中心California FITNESS 租用的屯門仁政街7至35號地下09A號舖及1樓至3樓,早前被業主入稟高院追租收舖後,市場消息指,舖位最新獲老人院以約85萬元租出,上址地舖面積約700方呎,上層面積各約11,000方呎,總樓面約33,700方呎,平均呎租25元,較舊租約105.8萬元、呎租約31元低兩成。

85萬租出 呎租25元

資料顯示,California FITNESS於去年2月起租用上址,租期至2018年,惟早前出現欠租,業主遂入稟追討今年6月及7月租金逾211.6萬元,管理費、差餉和地租等逾11.5萬元,以及提早結束租約招致的損失。

另外土地註冊處資料顯示,市建局斥9024萬元購入深水埗東京街34至38號3個地下舖位及單位。


來源: http://www.mpfinance.com/fin/dai ... 0745&issue=20161021
老人院 老人 California 屯門 舊舖 減租 兩成
PermaLink: https://articles.zkiz.com/?id=312944

【最無奈】California突結業

1 : GS(14)@2016-12-29 08:16:11

有逾20年歷史的健身中心California Fitness,旗下9間分店突於今年7月全線結業,母公司J.V.Fitness於11月底被頒令清盤。結業後記者走訪9間分店發現7間重門深鎖,部份留下小量健身器材,黃埔及屯門分店(圖)分別由時裝店及老人院承接。受影響會員達10萬,有退休人士稱損失90萬元無法追討。




來源: http://hk.apple.nextmedia.com/news/art/20161229/19879611
無奈 California 結業
PermaLink: https://articles.zkiz.com/?id=320416

California Fitness已獲接手

1 : GS(14)@2017-10-22 16:52:01

【本報訊】連鎖健身中心California Fitness去年7月突然全線結業,員工和用戶一夜間變成苦主,不少用戶已預繳大部份費用,損失慘重。事隔不足一年,有傳部份California Fitness分店已獲接手,改名Goji Studio,可見本港健身中心仍不乏買家垂青。至於早前曾有傳醫學美容公司卓珈(8358)主席黎姿及老公馬廷強有份投資,惟他們的發言人否認有參與。今年4月有報道指,新的連鎖健身中心Goji Studio即將開業,除黃埔分店,不少店舖為California Fitness舊址。去年California Fitness出事後不久,FFG武術健身中心創辦人杜恆霖亦傳過有意入主,冀斥1億元收購,但債務不清問題令交易膠着。另一邊廂,California Fitness欠薪案早前開審,母公司J.V.Fitness前股東王炳權原本否認控罪,其後上庭時又突然承認所有控罪,拖欠近百名員工共114萬元薪金,終判罰款20.2萬元。




來源: http://hk.apple.nextmedia.com/financeestate/art/20171018/20186454
California Fitness 已獲 接手
PermaLink: https://articles.zkiz.com/?id=343034


ZKIZ Archives @ 2019