|
||||||
|
呢幾日港股風起雲湧，財經演員例牌跌市唱淡，冇乜指導意義。咁啱噚日中國海外（688）公佈中期業績，同個地產分析員朋友傾開，佢話每次中海業績見到主席孔慶平，孔總都會同佢say sorry，因乜解究？朋友話，佢記憶中，每次中海公佈業績嗰日，個市例跌。 孔總次次say sorry 呢啲時勢，最緊要就係搵到方向，尤其噚日一開市就跌千幾點，食完晏返嚟居然彈返成千點，以為又見「大奇蹟」日，點知收市都係要跌過千點。所以唔好憑記憶嘞，等華華做個稍為認真嘅統計，睇吓係咪咁邪。 中海92年上市，但港交所嘅資料庫淨係去到99年，如果以99年4月公佈嘅98年度業績開始計，至今中海一共公佈過26次業績，其間喺公佈業績日個市跌嘅佔15次，似乎又同傳言有啲出入。 16次業績11次跌市 不過，既然係孔總say sorry，咁可能有啟示作用嘅係孔總本人。佢04年坐正做主席，以04年3月公佈業績嗰次計起，計埋噚日共公佈16次業績，其間11次跌市。由09年8月17日公佈集團09年度中期業績起計，至今已經連續5年，喺公佈業績嗰日跌市，咪話唔邪！ 李華華 |
||||||