ZKIZ Archives


接棒二百億王國大劉仔離奇慳家

2007-6-7  NM




股市㷫烚烚,三月初由大劉劉鑾雄 長子劉鳴煒入主揸旗的金匡(286),一度由0.305元炒至3.49元,勁升十一倍。不過上週五(六月一日),身兼父親旗下華人置業執行董事的劉鳴煒突 然宣布唔撈,理由是「須投入更多時間履行華置執行董事的職務」。消息一出,金匡股價連續幾日插水,截至本週二(五日),以1.78元收市。

功成身退,下一步是專注接棒父親近二百億的地產王國。雖然有大水喉射住,但劉鳴煒離奇踏實慳家。上週六,記者發現他跟太太Wendy於銅鑼灣行街,二人無保鏢跟身,衣著打扮極之普通。平民化

今年二十六歲的劉鳴煒,去年年中由英國返港,先出任華置投資者關係經理,到年尾被大劉升為執行董事,協助父親打理市值二百億的華置業務。

老豆有銀,但劉鳴煒慳家,上年十月,他被發現由灣仔逼地鐵落中環。據了解,大劉雖然擁有多部名車,包括價值六百多萬元的Maybach,但劉鳴煒平日常以地鐵代步。知情者說:「佢成日搭地鐵返工。」

除 了搭地鐵,劉鳴煒的衣著亦普通。上月二十六日傍晚,記者於銅鑼灣發現他拖着太太Wendy於景隆街一帶的寵物店睇貓狗。當日劉鳴煒身穿三百幾蚊的 A&F polo T恤,手戴千二蚊Casio膠錶,孭着五百幾蚊的The North Face背囊,而不施脂粉,樣貌賢淑的Wendy,亦跟丈夫一樣街坊。二人走在銅鑼灣街頭,完全唔似有錢人。

聽教聽話

二人於寵物店外齋睇一輪,再步行到時代廣場「食通天」準備醫肚。其間劉鳴煒發現有記者,於是拖實老婆開行turbo甩記者。

事隔一星期,劉鳴煒突然宣布辭掉金匡主席一職,據了解,他之所以請辭,其實只是聽從父親聖旨。

由 細到大都聽教聽話的劉鳴煒,在大劉悉心培育下,廿歲出頭便獲得紐約州註冊律師以及特許財務分析師資格(CFA),並持有倫敦大學法律學士學位、倫敦經濟及 政治科學學院法律碩士學位,更即將完成法律哲學博士學位。除了在華置學嘢,今年三月,他在大劉穿針引線下,於華置持百分之五十股權的金匡企業出任主席。入 主後,由於市場流傳金匡將會有「大動作」,所以股價最高試過被炒高十一倍,市值由二億幾升至廿七億。

大功告成,傳聞大劉即召兒子歸隊,積極鋪路給兒子接棒。據大劉的身邊人說:「佢好聽話,大劉成日派佢去世叔伯啲公司『學嘢』,佢就好似見習生咁,戴住個臨時職員證去睇人哋做嘢。大劉見佢咁乖,都表現得好開心。」

 

大劉前妻寶詠琴○三年因腎衰竭病逝,她曾說最錫大仔劉鳴煒(左),因他性格溫順,處事成熟和節儉。相反妹妹劉秀融就較任性,九九年兩母女歐遊時曾大打出手。

住酒店

大劉錫仔錫到燶,但兩父子就分開住。

據知大劉本想將華置旗下的白加道三十一號,其中一幢豪宅送給兒子及媳婦,不過最後因為市價高,才公開放售。而劉鳴煒亦好體諒,自行租住中環四季酒店的四季匯,跟徐子淇做鄰居,一住接近一年。

即使大劉有N個豪宅物業,但劉鳴煒從不要求父親送樓。「佢話想靠自己,所以情願租樓住,都唔想老豆送俾佢。」知情者說。

接掌二百億王國指日可待,有腦又肯捱的劉鳴煒當然唔使急。

渣甸山大地主

人稱大劉的劉鑾雄是華置主席,也是崇光百貨大股東。根據今年福布斯全球富豪榜,大劉身家達164億港元,全球排名458。但由於大劉「私產」豐富,估計現時他上市資產和個人物業投資等,總計身家達400億港元。

有「渣甸山大地主」之稱的他,手持的豪宅物業包括白建時道6號、睦誠道11號、高士美路2-3號等。與女友呂麗君同住的白建時道獨立屋,佔地二萬呎,擁全維港海景,市值逾三億。雖然家有大宅,但劉鳴煒情願靠自己租住酒店,都唔住父親的豪宅,頭。


PermaLink: https://articles.zkiz.com/?id=24426

Next Page

ZKIZ Archives @ 2019