|
||||||
|
辦一場豪華夢幻婚禮，是不少女士 的夢想。明年十一月結婚的Erica，正忙於籌備婚禮，除了試婚紗，拍婚照，還要為結婚當天佩戴的金飾四處奔走。「傳統上長輩會送金飾，但依家金價咁貴， 就算送都係細細隻，唔夠體面。」無奈的Erica，難以向長輩啟齒，惟有自行打點，假金看不上眼，真金又嫌貴，但原來可以租。 去年底剛結婚的陳宇瀚（Kenneth，二十七歲），亦曾經歷Erica的窘境。眼見飾金價兩年前才七千多元一兩，轉眼已過萬，他相信愛面子又心痛「荷 包」的新人大有人在，便於今年一月在工廈內開設「Hon to Ken」，買入一批真金龍鳳鐲及金豬頸鏈出租，二兩金飾租金五百元。踏入婚嫁旺季，生意越做越有，上月穩袋四萬五千元之餘，金價更升值逾三成，一箭雙鵰賺 到盡。 上週六下午，剛放工的Erica，約了未婚夫Jamin睇金飾，但不是去金鋪，而是乘地鐵到工廈林立的荔枝角。左穿右拐，十分鐘後，終於找到藏身於工廈頂 樓的「Hon to Ken」。大門裝有密碼鎖，按下門鐘，開門的是兩位二十來歲的後生仔——老闆Kenneth及員工Nelson。一對情人甫坐下，Nelson先遞上產品 相簿，Kenneth立即從夾萬拿出數盒金飾，放在玻璃枱上問道：「係咪先睇龍鳳鐲？」「係。」說時Erica已目不轉睛地細看着枱上六、七對耀目的金 鐲。 「鍾意傳統定新潮款？如果想大體啲，影相出啲，呢對雕咗九條龍的『九龍鈪』就最好。」Kennth手執金鐲介紹道。「我朋友十月結婚時租咗對一隻龍一隻鳳 的鈪，好新潮嘅……」Erica努力回憶着。「有！」Kenneth再從夾萬中拿出另一對金鐲，說道：「呢對鈪可以分開戴，亦可以合併起來一起戴，你試 下。」「係呢對啦。」Erica雙眼發光道。一輪審視之後，Erica雖然喜歡新潮金鐲，但最後卻租下分量最重，一對超過四兩的「九龍鐲」。「結婚戴嘅金 器始終係為睇分量多過睇款式，想戴幾多對？最好梗係戴到手肘啦，呵呵。」手戴多對龍鳳鐲的Erica，興奮地捲起衫袖，在手臂上比畫着，身旁的未婚夫 Jamin亦笑着點頭稱是。 面子荷包兩全 Erica坦言，金價飆升，雖然家中長輩會送金器，但預計數量及分量都會「大縮水」，而近年不少朋友結婚都遇到相同難題，要靠自已「出術加料」，充撐場 面。「我都係朋友介紹過來，之前係金都睇到仿金嘅，睇落較啞色，感覺好假。」前後不夠二十分鐘，除了「九龍鐲」，Erica還睇中一條二兩多重的龍鳳頸 鏈。「呢條可以襯嗰套紅色晚裝。」Erica側頭對Jamin說。 「我哋嘅租金係按金飾的重量計，總共係一千九百元，你有我哋八月份喺婚紗展派的一百元優惠券，折扣後係千八，而家先俾九百元訂金。」Kenneth說。看 見未婚妻一臉陶醉的模樣，Jamin早已掏出錢包，準備付訂金之際才突然記起︰「如果整爛咗，又或者唔見咗，點計呀？」Kenneth馬上笑着安慰道： 「幾隻金鐲一齊戴，輕微花痕一定有，不用賠償，除非隻鈪嚴重變形或整斷咗，要賣俾金行，再買對新的，就會同客人收取當中的差價。真係唔見咗，就收晒你哋嘅 按金，唔使咁擔心，以上情況暫時未發生過。」 Kenneth繼續解說道，出租期為三日兩夜，客人結婚前一天提貨時，繳付租金餘數，並按當天飾金市價，乘以該金器的重量，以信用咭支付全數做按金，但只 是扣起「信用額」，不會過數。現時，每個客人的消費約二千元，開鋪至今最豪的反而是一個珠海來的自由行者。「佢嘅香港朋友喺網上搵到我哋，佢先打電話來 問，問我有咩貨先落嚟。」珠海豪客最後租了三對龍鳳鐲、三條龍鳳頸鏈，連店鋪剩下的一套鑽石鏈都租下，單是租金已要六千元。「佢要我將每件首飾都擺落去部 黃金純度檢測機，測過真假先租。最難忘係佢來拿金嗰日，大拿拿拎住二十萬港紙來做按金，咁大個仔第一次見咁多現金，呵呵，擺喺公司夾萬，嗰幾日我仲驚過 佢。」Kenneth笑說。 自由行豪客暫時只有兩宗，鋪頭仍主要做本地人生意，大多是二十多歲，收入較少的年輕新人，店內的龍鳳鐲亦以二兩重（一對計）居多。「按金係一大問題，年輕 人買唔起先來租，一對二兩重嘅鈪，按金已要三萬幾。試過有客人俾兩萬幾蚊按金，都要分兩張咭碌。」Kenneth說，金鐲分量適中，豐儉由人。「有錢咪租 多對囉。」 傳統款式最受落 開鋪時，Kenneth用四十萬買咗六對龍鳳鐲，三條龍鳳頸鏈，及一套鑽石首飾。後來再用二十萬陸續添置新貨，主打龍鳳鐲及金頸鏈。「鑽石入貨貴又唔保 值，出租率亦不如金飾，冇再買。」現時，公司有十一對金鐲，五條金頸鏈等，分別從六福、周生生及謝瑞麟等大行買入，除了有熟人可用員工價買金，更重要是增 加客人信心。「我哋鋪頭咁細，自行設計金飾，客人會質疑係假嘢，大行金器刻有商號印鑑，跟埋原裝盒，客人信心大好多。」Kenneth表示。 雖然做年輕人生意，但店內最受歡迎是傳統款式的龍鳳鐲。「新潮款好多時有通花，同樣八錢重嘅金鈪，傳統款同新潮款擺埋一齊，望落去一定係前者大隻啲、得體 啲。」Kenneth今年五月才買入的「九龍鐲」，更成為鎮店招牌。「對鈪要五萬元，好貴，我喺網上討論區試探咗網民反應先敢買，上月已有七個客人租借， 每次租金千二元，唔使一年就可以收回成本。」 細瑕疵防換貨 金價飛升，最近多次傳出有金行「失手」收到假金。為免真金出租後被偷龍轉鳳，除了靠那部日本製的黃金純度檢測機外，在修整金飾時，還會刻意留下少許細微的 瑕疵，以作識別。「你睇唔睇到，呢隻鈪裡面有條好幼的線斷咗，我專登唔補番，你唔好影相啊，費事個客以為我租隻爛鈪俾佢。」Kenneth手執金鈪笑說。 Kenneth最擔心的反而是公司位處工廈，人流較雜，所以保安一定要做足。平日，金飾都會放在夾萬內。開業時，Kenneth用兩萬元安裝防盜警報系 統，包括紅外線感應器及窗口的磁力感應器，晚上警報啟動後，公司再有人進出，保安公司便即時收到訊號。為防萬一，Kenneth為金飾買重保險，每年保費 約一萬二千元。 保安之外，最頭痛的莫過於宣傳。從事鑽石設計行業出身的Kenneth，兩年前被裁員後，貪工廈平租，便在此開設公司做熟客生意。「Hon to Ken」開業後為慳錢，沿用舊址，初時幾乎日日拍烏蠅。當時，除在熱門婚嫁討論區如新婚易等留言外，Kenneth在Yahoo!開了個網誌，用作公司網 頁，定期上載最新消息及傳媒的訪問。每逢假日，便請學生哥在太子金都商場門口派傳單，並在結婚雜誌《GP Wedding Moment》及《YES I DO》落廣告。最近，更與一間婚宴紅酒商合作，互相介紹客人。 現時，公司一個月淨賺四萬五千元。由年頭到現在，金價已急升三成，Kenneth手上的金飾亦一同升值，賺租再賺埋升值，十分和味。但Kenneth內心 卻十分矛盾：「金價咁高，我都唔敢再入貨，怕摸頂。」最近，太子始創商場正籌備於寫字樓的二十三樓，另闢婚嫁專區，邀請「Hon to Ken」進駐。「我會在新鋪加裝飾物櫃，方便客人揀金。經濟差，珠寶金飾未必有人捨得買，但總有人會結婚，唔怕無生意。」Kenneth一臉自信地說。 維修保養四部曲 開業資料﹙01/2010﹚ 租金：$9,900 * 入貨：$400,000 工具：$28,000 防盜：$20,000 保險：$12,000 總投資：$469,900 *兩個月按金一個月上期 營業資料﹙11/2010﹚ 營業額：$60,000 * 人工：$7,000 租金：$3,300 宣傳：$3,000 雜費：$1,000 盈利：$45,700 *包括一萬元售賣結婚戒指的營業額 壹點意見 劉克斌九龍珠石玉器金銀首飾業商會副理事長 1 假金內的合成金屬如果跟真金重量相若，黃金純度檢測機的「比重法」未必能偵測到； 2 金器表面的花痕可以用簡單的工具清走，但嚴重的損壞，如︰撞凹、鉸位移位，必須找工場師傅維修，增加經營成本； 3 與鑽飾不同，金器本身有光澤，所以設計反而比較重要，花絲金手鐲及立體設計的金鐲近年頗流行。 |
||||||