ZKIZ Archives


深紅二代威脅大酒店

2017-07-13  NM

由嘉道理家族控制的大酒店(45)股價與資產淨值折讓逾四成,近日披露由一名僅三十二歲的坡仔蔡華波(Chua Hwa Por)從broker手上接貨至10%,即引來狙擊疑雲。

蔡華波此人從未曝光露面,但似乎水喉充足,年初花過千萬從英國買入贏過大不列顛錦標賽的「赤兔名駒」。蔡華波年紀輕輕且初次養馬,看其出手非等閒之輩;追查落去,發現他與習近平訪港時的大內總管栗戰書的女兒——栗潛心關係密切,二人共同成立一間叫Chua & Li Membership Company Ltd,二人同樣報住赤柱灘道六號,物業前身名為麗安閣,是新華社接待政要及上賓之地,前社長周南亦曾居於此,○七年由中國海外向中聯辦收購重建為豪宅,四年前由栗潛心為董事的海外公司,以$1.17億購入其中一間獨立屋,栗潛心曾任建銀資產管理聯席董事,現時在中信資本做副總裁,亦是紅色商會華菁會的副會長;蔡華波出手掃10%大酒店,資金動輒要廿億,自然財來自有方。以大陸官場之哲學,有權勢就有財富,栗潛心父親栗戰書是習近平愛將,任中共中央辦公廳主任,祖父栗政修為中共地下黨員。蔡華波同此深紅女子行得咁埋,掃起你大酒店都咪話冇可能!

中環寸嘴有錢佬放個屁都香啲

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

我不時都請朋友出海睇煙花;但七.一去咗回歸廿周年晚宴,初初講到習大大會出席,有銀紙都買唔到枱,要「飛士」搭夠,乜叫「飛士」,天曉得,總之臨尾有飛入場啦。以煙花嘅水準,我睇香港再過廿年都係咁!廿年前喺青馬橋放煙花pattern我最有記憶,雖然短短哋幾分鐘,好似瀑布咁,嗰次係得到小學同學蔡冠深眷顧,「掹衫尾」坐船去霸頭位睇煙花,啲阿太喺隻船度「啷吓啷吓」,嘔到好似小瀑布咁。香港一年放幾次煙花,環保團體都非常有意見;晚宴上兩個煙花贊助商嘅接班人,就上台講嘢,乜乜「欣欣向榮」,行貨到唔行,一啲都冇年輕人嘅活力創意,正一「幼承庭訓」,唔似得係「優化」咗嘅庭訓;雖然佢哋Born with a silver spoon,但都要百煉鋼先得,純銀度或飾金度太高,會軟「瀨瀨」o架。有人話我成日對飲食有所批評,其實我想幫吓香港咋,都唔知點解香港自稱飲食天堂,我唔篤爆佢又點自稱姓楊呀?有時啲企枱唔知,以為我好似普通「食評家」收咗紅包就講好,冇收就唱衰,好彩人哋話我堪稱香港最有錢食評家,直頭massage到我個soft spot!正所謂有錢佬放個屁都香啲,不過我又未去到神仙放屁,非同凡響嘅境界!以免影響大家食慾啦。

農場變上等人俱樂部

香港有錢家庭愈來愈多,高級會所會籍有價,新世界(17)旗下的Hong Kong Golf & Tennis Academy位於西貢大涌口村山坡之上,聽講要兩百萬入會費,仲要經過遴選,睇吓閣下是否golf及tennis運動底子先有資格;入到去恍如世外桃源,一幢幢別墅供會員度假,一於搞名牌效應,由世界級golf老手Jack Nicklaus設計課程,及網球名將Bruguera坐鎮,仲引入峇里名牌Fivelements有瑜伽班,又有spa,真係有錢就有生活品味。其實,呢幅地有段古,前身是華興農場,主人李祥記係西貢市經營糧油、雜貨及火水的商人,以往在大涌口村養豬務農,睇農場個招牌就知其政治立場,其子李秉禮曾任西貢鄉事會主席,六七年暴動曾經被拉,後來獲釋。聽西貢鄉紳報料,李秉禮已過身,現時在此高級俱樂部邊皮,仍有一排原是農舍的石屋出租作汽車維修,由李秉禮老婆收租;但拍埋一齊睇顯得大殺風景!

PermaLink: https://articles.zkiz.com/?id=254641

Next Page

ZKIZ Archives @ 2019