|
|||
|
到底兩公婆一齊做生意、打天下，會係事半功倍，定係寧舍多拗撬呢？華華覺得，呢個問題好難有個定論，不過可以肯定係，就上市公司講，如果兩公婆一齊做，最後搞到分手收場話，對小股東講就絕對係一個麻煩。好似老牌工業股實力建業（519）大股東洪建生同前妻王家琪咁，一齊打江山，之後轉型搞巴拿馬及英屬處女島的度假村及物業項目，但最終都要分手，仲累到上市公司o忝。 不願支持前妻任執董 話說實力上個禮拜舉行股東大會，點知洪建生場上無啦啦動議要休會兼延期，原因係佢同前妻王家琪的官司有手尾跟。事緣法庭10月15日，要求洪建生行使佢投票權，支持番佢前妻由非執董轉做執董。洪建生梗係唔制啦，決定向法院提出上訴。所以佢話最好等到上訴有結果，即係差唔多出年1月先再開股東會，咁樣會適合喎！ 佢兩個之間恩怨，數埋其實一疋布咁長。今年8月，洪建生主導下實力建業就曾經入稟，向王家琪追討一批古董，包括國畫大師徐悲鴻、潘天壽及劉海粟作品。公司話呢古董只係交畀王氏託管，王家琪間山頂豪宅只係好似貨倉咁，用擺放畫，o依家公司需要錢周轉，好應該交番古董出拍賣套現啦！王家琪都不甘示弱，無幾耐又告洪建生同實力建業，要求拎番附屬公司賬目、銀行結單、出糧紀錄、會議紀錄同律師行仲有港交所之間書信等等，實行要大起底。睇呢單都唔會咁易收科! |
|||